Uyghur akadémiyisi qurulghanliqining bir yilliqini tebriklesh murasimi ötküzdi

Murasimgha istanbuldiki sherqiy türkistan ammiwi teshkilatlardin, sherqiy türkistan wexpining idare hey ‘et mes'ulliridin memet eysa hajim, yawro- asiya tetqiqat fondi, shundaqla teklimakan Uyghur neshriyatining mes'uli abdujélil turan, sherqiy türkistan yashlar jem'iyitining bashliqi tibet yüjetürk, sherqiy türkistan ma'arip we hemkarliq jem'iyitining mu'awin bashliqi, eysa yüsüp aliptékin fondining bashliqi arslan aliptékin, yaponiyidin kelgen kompyutér mutexessisi gheyret toxti kenji qatarliq shexsler we istanbuldiki her qaysi uniwérsitétlarda oquwatqan Uyghur oqughuchilardin qiz - oghul bolup köp sanda kishi qatnashti.

Murasim qur'an kerim tilawet qilish we istiqlal marshi oqush bilen bashlandi. Murasimda Uyghur akadémiyisining re'is wekili ablimit qaraxan ependi échilish nutqi sözlidi. Kéyin Uyghur akadémiyisining bash katipi ablet turan ependi söz qilip, Uyghur akadémiyining bir yildin buyan élip barghan xizmet - pa'aliyetliri we qolgha keltürgen netijilirini tonushturup ötti. Arqidin Uyghur akadémiyisining xizmet ‏- pa'aliyetliri tonushturulghan höjjetlik resim körsitildi.
Murasimda, sherqiy türkistan ammiwi teshkilat wekilliri we muhim shexsler munberge chiqip söz qildi. Murasimda yene tirakiye uniwérsitéti türkologiye bölümidin dem élishqa chiqqan proféssor sultan mexmut qeshqerli, yaponiyidin istanbulgha kelgen Uyghur kompyutér mutexessisi gheyret toxti kenji ependiler söz qilip, Uyghur akadémiyisi maddiy we meniwi jehettin qollap quwwetleydighanliqini bildürdi we akadémiyining xizmet tereqqiyati heqqidiki pikir - qarash we arzulirini ipadilidi.

RFA/Arslan

Murasimda yene istanbulda pa'aliyet qiliwatqan sepiri'alem xelq'araliq qiz oqughuchilar jem'iyitining bash katipi muzeyyem tashchi xanim söz qilip mundaq dédi:
"Uyghur akadémiyisining qurulghanliqini tebrikleymiz, buningdin kéyin Uyghur akadémiyisi Uyghur yashlarning istiqbali bolidu dep oylaymiz. Biz sepiri alem jem'iyiti bolush süpitimiz bilen, Uyghur yashlarning istiqbalining qurulushida ilgirikige oxshash buningdin kéyinmu her jehettin qollap quwwetleymiz. Bu heqte bizning néme qilish mes'uliyitimiz bolsa uni orunlashqa teyyar ikenlikimizni ipadileymen. Chünki Uyghur akadémiyisidin yükselgen parlaq nur we bu nurni kötürgen yashlar Uyghur xelqining istiqbalini quridu. Bu biz üchün bek muhim. Biz türk xelqi özimizning istiqbali üchün qanchilik ehmiyet bergen bolsaq, Uyghur xelqining azadliqi we kelgüsi istiqbali üchün oxshash ehmiyet bérimiz. Bu parlighan nur xudayim buyrusa dunyaning her qaysi jaylirigha tarqilidu we qisqa waqit ichide Uyghur xelqini Uyghur yashlirini birlik barawerlik, küchlük we azadliq ichide güzel bir istiqbalini körüsh hemmimizge nésip bolidu. Buningda bizning azraq bolsimu hessimiz qoshulsa biz buning bilen özimizni xushalliq hés qilimiz. Uyghur akadémiyisi yaxshi ishlarning wujudqa chiqishigha wasite bolushni arzu qilimiz."

Murasimda yene istanbuldiki her qaysi uniwérsitétlarda elachi bolup oquwatqan Uyghur oqughuchilardin 10 neper oqughuchigha mukapat bérildi.

Murasimda yene bir qisim Uyghur oqughuchilar shé'ir déklamatsiye qildi, saz chélip naxsha oqudi. Murasim 2 sa'et dawam qilghandin kéyin qizghin keypiyat ichide axirlashti.