Dölet mejlisi ezasi ted kénnédiyning hayat musapisi

77 Yéshida méngisdiki ösme seweblik hayat bilen widalashqan amérika dölet mejlisi ezasi ted kénnédiyning ölüm xewiri peqet amérikidila emes, pütün dunyada zor tesir qozghidi. Amérikidiki muhim dölet erbabliri we her qaysi dölet lidérliri arqa - arqidin teziye téligrammiliri yollap, uning hayatigha yüksek baha berdi.
Muxbirimiz irade
2009-08-28
Share
Ted-Kennedy-We-Karolin-Kennedy-305.jpg Süret, amérika dölet mejlisi yuqurqi kéngesh ezasi ted kénnédiyning, prézidént obamaning saylimi mezgilide, akisining qizi karolin kénnédiy bilen birge chüshken süriti.
AFP Photo

Amérika prézidénti brak obama bu heqte qilghan sözide mundaq dédi: "birlikte ötken yillar boyiche, xizmetdishim, meslihetchim we dostum bolghan ted kénnédiyning ölüm xewirini anglighandin kéyin tolimu qayghurdum. 50 Yildin béri insan heqlirini, amérika xelqining saghlamliq xizmetliri we iqtisadi sewiyisini tereqqi qildurush yolida xizmet qilghan idi. Nurghun muhim qanunlarning chiqishida muhim rol oynighan kishi idi. Tariximizdiki muhim bir sehipe yépilghan boldi."

En'giliye bash ministiri gordon browinmu ted kénnédige baha bérip: "ted kénnédiy üchün peqetla amérika emes, pütün qit'elerde matem bolidu. U ma'arip we saghlamliq xizmetliri jehette dunyagha bashlamchi boldi. U her bir balining talantlirini jari qildurush pursitige érishishi kéreklikige ishinetti," dédi.

Amérikining sabiq prézidéntliridin jon kénnédiyning qérindishi bolghan ted kénnédiy dölet mejlisi ezasi bolghan 50 yildin béri dawamliq halda ézilgenler, heqsizlikke uchrighuchilar we yoqsullar üchün xizmet qilip kelgen idi. U hayat mezgilide dunyadiki panahlan'ghuchilarning heqliri üchün nurghun xizmetlerni ishligen bolup, 1980 - yillarda jenubiy afriqidiki érqiy ayrimichiliqqa qarshi qanun chiqirilishida zor küch chiqarghan idi. Uning ölümidin kéyin jenubiy afriqa prézidénti, insan heqliri küreshchisi nélson mandilamu bayanat élan qilip, bir démokratiye we insan heqliri küreshchisini yoqatqanliqidin qattiq qayghuruwatqanliqini ipade qildi.

1932 - Yili bostonda dunyagha kelgen ted kénnédiy 9 balining eng kichiki. U 1962 - yili massachutés shitatidin saylamgha qatniship dölet mejlisi ezasi bolghan. 1963 - Yili uning amérika prézidénti bolghan akisi jon kénnédiy suyqestke uchrap ölgen. 1968 - Yilida yene bir akisi robért kénnédiymu démokrat partiyisining prézidéntliqi üchün saylam pa'aliyetliri qiliwatqanda suyqestke uchrap ölgen we uning üchinchi akisi, uchquchi jo kénnédiy ikkinchi dunya urushida hayatidin ayrilghan.

50 Yildin béri dölet mejlisi ezasi wezipisini ötep kelgen ted kénnédiy amérika démokratlar partiyisining muhim isimliridin biri. U siyasiy hayatida her da'im erkinlikni, ochuq pikirlikni yaqilap kelgen. U yalghuz démokratchilarningla emes, belki bashqa siyasi köz qarashtikilerningmu oxshashla hörmitige sazawer bolghan. Uning sayiside ishchi we köchmenler heqqi, ma'arip, tashqi siyaset we pursette barawerlik bolush qatarliq jehetlerde muhim ilgirileshler boldi. A'ilisi we xizmetdashliri ted kénnédiyni "ishchilarning, yoqsullarning we mezlumlarning awazi" dep teriplidi.

Ted kénnédiy amérikining tashqi siyasitidimu zor tesir qozghighan bir isim bolup, u amérikining iraqta urush qilishigha qattiq qarshi chiqqan idi. 2002 - Yilida amérika dölet mejliside iraqqa urush qozghash yaki qozghimasliq toghrisidiki ray sinashta qarshi awaz bergen we buni " amérika dölet mejlisi ezasi bolush süpitim bilen bergen eng toghra qararim" dégen idi.

U, hazirqi amérika prézidénti borak obamaningmu muhim qollighuchisidin biri bolup, u qurultayda qilghan sözide obamaning yéngi dewr lidérlirige we yéngiliqqa wekillik qilidighanliqini éyitqan idi.

Amérika xelqining hörmitige sazawer bolghan ted kénnédiyning jesiti hazir bostondiki jon kénnédiy kitabxanisige ziyaretke qoyulghan bolup, her küni minglighan kishiler uning jesitini ziyaret qilip teziye bildürmekte. Ted kénnédiyning depne murasimi shenbe küni bostonda élip bérilidighan bolup, depne murasimida amérika prézidénti brak obamamu söz qilidiken. Ted kénnédiy washin'gtondiki arlington milliy yerlikide akiliri jon kénnédiy we robért kénnédiylarning yénigha depne qilinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet