Рабийә қадирға мунасивәтлик кишиләр хитай сақчилириниң тәһдидигә учримақта


2005-05-13
Share

Рабийә қадир, 27-април күни америка дөләт мәҗлисидә уйғурлар мәсилиси бойичә гуваһлиқ бәргән иди. Рабийә қадир ханим парламент әзаси том ләнтос билән. (Оңдин: Mrs. Annette Lantos, Tom Lantos, рабийә қадир, сидиқ һаҗи, нурй түркәл)

Үрүмчидин игә болушимизчә, 13 - май әтигән саәт 9 әтрапида рабийә қадир сода сарийини нәччә йүз хитай қораллиқ сақчилири қоршиған болуп, 30 дәк қоралланған сақчи сода сарайдики әқидә һәссидарлиқ ширкитигә бөсүп кирип, һечқандақ қануний рәсмийәтсизла, ширкәтниң мал- мүлүклирини ахтуруп, пул вә муһим һөҗҗәтләрниң һәммини елип кәткән.

Қара-қоюқ тутқун

Көргүчиләрниң билдүрүшичә, ахтурушқа кәлгән хитай сақчилири икки күн авал қолға алған ширкәт дериктори айшәмгүл билән катип рози мәмәтни алдиға селип елип кәлгән болуп, ахтуруш ахирлашқанда улар йәнә бу иккисидин башқа, ширкәт қармиқидики рестуранниң дериктори әхмәтҗан мәмтилини қошуп тутуп кәткән. Вә уни бир нәччә саәттин кейин қоюп бәргән.

Бу җәрянда хитай сақчилириниң өзини тутмақчи боливатқанлиқини пәмлигән рабийә қадирниң оғли абликим қечип кәткән.

Игилишимизчә 10 - майдин һазирға қәдәр хитай сақчилири рабийә қадирға мунасивәтлик кишиләрдин бәшни қолға алған. Уларниң ичидә һәтта рабийә қадирниң шеркитиниң қәриз елиш ишини беҗиргән җоңго банкисиниң хадимиму бар икән.

Хитай сақчилириниң рабийә қадир сода сарийидики булаңчилиқ қилмишидин хәвәр тапқан рабийә қадир ханим, хитай һөкүмитиниң бу қилмишлириға наразилиқ билдүрди һәмдә өз пәрзәнтлириниң аманлиқидин интайин әнсирәватқанлиқини ейтти.

Хитай һөкүмитиниң тактикилири

Мән қиливатқан кишилик һоқуқ паалийитимдин бу тәһдит билән һәргиз тохтап қалмаймән. Өз хәлқимниң кишилик һоқуқ үчүн тохтимай күрәш елип баримән, һәргиз тохтап қалмаймән.

Хитай һөкүмитиниң асаритидин қутулуп йеңила амеикиға келип, уйғурларниң кишилик һоқуқини илгири сүрүш үчүн актип һәрикәт қиливатқан даңлиқ кишилик һоқуқ паалийәтчиси рабийә қадир, үрүмчидики балилири һәмдә ширкәтлири шундақла өзигә мунасивәтлик кишиләрниң хитайниң паракәндичиликигә учриғанлиқини, хитай һөкүмитиниң илгири өзини сиясий төһмәт билән түрмигә елип зиянкәшлик қилған болса, әмди униң һөр дуняда демократийә кишилик һоқуқ үчүн қиливатқан күрәшлиригә тосқунлуқ қилиш мәқситидә һәрикәт қиливатқанлиқи дәп билдүрди.

Мунасивәтлик даириләрдин рабийә қадир сода сарийидики адәм тутуш һәмдә ахтурушни, уйғур аптонум районлуқ җамаәт хәвпсизлик назарити бәшинчи башқармисиниң елип барғанлиқини игилигәндин кейин, җамаәт хәвпсизлик назаритиниң қоманданлиқ шитаби, үрүмчи шәһәрлик җамаәт хәвпсизлик идариси һәмдә хитай дөләт бихәтәрлик идариси қатарлиқ җайларға телефон қилдуқ әмма улар охшашла җаваб беришни рәт қилди.

Биз йәнә бу һәрикәткә бивастә қоманданлиқ қилған 5 - башқарма башлиқи җаңниң өйигә телефон қилип издидуқ, униң аяли бир- икки күндин буян җаңниң наһайити алдирашлиқи кәчтиму өйгә қайтмай ишләватқанлиқини ейтти.

Рабийә қадир: хитайниң тәһдиди мениң ирадәмни бошиталмайду

Нөвәттә рабийә қадирниң шеркити хитай сақчилириниң ахтуришиға - булаңчилиқиға учриғандин башқа, үрүмчидики бәш пәрзәнти һәмдә нәврилири хитайниң тәһдидидә қалған болуп, хитай сақчилириниң бирәр сүйқәст пиланлаватқанлиқидин әндишә қилған рабийә ханимниң кичик оғли алим, америкидики аниси рабийә ханим һәмдә дадиси сидиқ һаҗиларға өзиниң баянатини дуняға аңлитишни өтүнгән. (Бу һәқтики баянатни, юқиридики аваз улинишидин аңлаң).

Рабийә ханим гәрчә алтә йил хитай түрмисигә қамилип йеңила әркинликкә чиқип америкидики йолдиши һәмдә балилири билән җәм болған болсиму, әмма үрүмчидики бәш балиси йәнила хитайниң назарити астида турмақта, рабийә қадир ханим пәрзәнтлириниң әндишисидә, җудалиқта өртиниватқан болсиму йәнила қәһриман аниларға хас җасарити билән, хитайниң қандақла тәһдидигә учраштин қәти нәзәр, уйғурларниң һәқ - һоқоқи үчүн елип бериватқан күрәшлирини тохтатмайдиғанлиқини, бу йолда һәр қанда қ қаршилиқ күчниң ирадисини сундуралмайдиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт