Rabiye qadirgha munasiwetlik kishiler xitay saqchilirining tehdidige uchrimaqta

• Muxbirimiz gülchéhrening bu heqtiki toluq melumati
• Download story audio

Rabiye qadir, 27-april küni amérika dölet mejliside Uyghurlar mesilisi boyiche guwahliq bergen idi. Rabiye qadir xanim parlamént ezasi tom lentos bilen. (Ongdin: Mrs. Annette Lantos, Tom Lantos, rabiye qadir, sidiq haji, nury türkel)

Ürümchidin ige bolushimizche, 13 - may etigen sa'et 9 etrapida rabiye qadir soda sariyini nechche yüz xitay qoralliq saqchiliri qorshighan bolup, 30 dek qorallan'ghan saqchi soda saraydiki eqide hessidarliq shirkitige bösüp kirip, héchqandaq qanuniy resmiyetsizla, shirketning mal- mülüklirini axturup, pul we muhim höjjetlerning hemmini élip ketken.

Qara-qoyuq tutqun

Körgüchilerning bildürüshiche, axturushqa kelgen xitay saqchiliri ikki kün awal qolgha alghan shirket dériktori ayshemgül bilen katip rozi memetni aldigha sélip élip kelgen bolup, axturush axirlashqanda ular yene bu ikkisidin bashqa, shirket qarmiqidiki résturanning dériktori exmetjan memtilini qoshup tutup ketken. We uni bir nechche sa'ettin kéyin qoyup bergen.

Bu jeryanda xitay saqchilirining özini tutmaqchi boliwatqanliqini pemligen rabiye qadirning oghli ablikim qéchip ketken.

Igilishimizche 10 - maydin hazirgha qeder xitay saqchiliri rabiye qadirgha munasiwetlik kishilerdin beshni qolgha alghan. Ularning ichide hetta rabiye qadirning shérkitining qeriz élish ishini béjirgen jonggo bankisining xadimimu bar iken.

Xitay saqchilirining rabiye qadir soda sariyidiki bulangchiliq qilmishidin xewer tapqan rabiye qadir xanim, xitay hökümitining bu qilmishlirigha naraziliq bildürdi hemde öz perzentlirining amanliqidin intayin ensirewatqanliqini éytti.

Xitay hökümitining taktikiliri

Men qiliwatqan kishilik hoquq pa'aliyitimdin bu tehdit bilen hergiz toxtap qalmaymen. Öz xelqimning kishilik hoquq üchün toxtimay küresh élip barimen, hergiz toxtap qalmaymen.

Xitay hökümitining asaritidin qutulup yéngila amé'ikigha kélip, Uyghurlarning kishilik hoquqini ilgiri sürüsh üchün aktip heriket qiliwatqan dangliq kishilik hoquq pa'aliyetchisi rabiye qadir, ürümchidiki baliliri hemde shirketliri shundaqla özige munasiwetlik kishilerning xitayning parakendichilikige uchrighanliqini, xitay hökümitining ilgiri özini siyasiy töhmet bilen türmige élip ziyankeshlik qilghan bolsa, emdi uning hör dunyada démokratiye kishilik hoquq üchün qiliwatqan küreshlirige tosqunluq qilish meqsitide heriket qiliwatqanliqi dep bildürdi.

Munasiwetlik da'irilerdin rabiye qadir soda sariyidiki adem tutush hemde axturushni, Uyghur aptonum rayonluq jama'et xewpsizlik nazariti beshinchi bashqarmisining élip barghanliqini igiligendin kéyin, jama'et xewpsizlik nazaritining qomandanliq shitabi, ürümchi sheherlik jama'et xewpsizlik idarisi hemde xitay dölet bixeterlik idarisi qatarliq jaylargha téléfon qilduq emma ular oxshashla jawab bérishni ret qildi.

Biz yene bu heriketke biwaste qomandanliq qilghan 5 - bashqarma bashliqi jangning öyige téléfon qilip izdiduq, uning ayali bir- ikki kündin buyan jangning nahayiti aldirashliqi kechtimu öyge qaytmay ishlewatqanliqini éytti.

Rabiye qadir: xitayning tehdidi méning irademni boshitalmaydu

Nöwette rabiye qadirning shérkiti xitay saqchilirining axturishigha - bulangchiliqigha uchrighandin bashqa, ürümchidiki besh perzenti hemde newriliri xitayning tehdidide qalghan bolup, xitay saqchilirining birer süyqest pilanlawatqanliqidin endishe qilghan rabiye xanimning kichik oghli alim, amérikidiki anisi rabiye xanim hemde dadisi sidiq hajilargha özining bayanatini dunyagha anglitishni ötün'gen. (Bu heqtiki bayanatni, yuqiridiki awaz ulinishidin anglang).

Rabiye xanim gerche alte yil xitay türmisige qamilip yéngila erkinlikke chiqip amérikidiki yoldishi hemde baliliri bilen jem bolghan bolsimu, emma ürümchidiki besh balisi yenila xitayning nazariti astida turmaqta, rabiye qadir xanim perzentlirining endishiside, judaliqta örtiniwatqan bolsimu yenila qehriman anilargha xas jasariti bilen, xitayning qandaqla tehdidige uchrashtin qet'i nezer, Uyghurlarning heq - hoqoqi üchün élip bériwatqan küreshlirini toxtatmaydighanliqini, bu yolda her qanda q qarshiliq küchning iradisini sunduralmaydighanliqini bildürdi.