Хитай сақчи органлири чәтәлдики уйғурларға тәһдит қилишни давамлаштурмақта

• Ихтияри мухбиримиз абдусәмәтниң бу һәқтики мәлумати
• Download story audio

Хитай һөкүмити уйғурларниң чәтәлләрдә, кишлик һоқуқ, демократийә вә милли мустәқиллиқ үчүн елип бериватқан һәққани күришини тосуш вә йоқ қилиш мәқситидә һәр хил вастиләрни қоллинип кәлди. Илгири улар асаси нишанини чәтәлләрдә паалийәт елип бериватқан һәрқайси уйғур тәшкилатлири вә актип палийәтчиләргә қаратқан болуп, буниң үчүн бир тәрәптин уйғур тәшкилатлири вә сияси палийәтчиләрни "тәррорист тәшкилат" вә " тәррорист" дәп қарилиса йәнә бир тәрәптин уларниң вәтәндики аилиси вә уруқ – туғқанлириға һәр түрлук бесим вә тәһдитләрни пәйда қилиш арқилиқ оз мәқсидигә йетишкә урунуп кәлгән иди.

Йеқинқи мәзгилләрдин бәри хитай даирлири тактикисини өзгәртип телефун, интәрнәт вә башқа алақә вастилири арқилиқ чәтәлдики уйғурларға бивастә тәһдит селишқа урунмақта. Нөвәттә уларниң бу хил тәһдити ялғуз актип сияси палийәтчилиәр биләнла чәкләнмәстин, һәтта һечқандақ сияси паалийәтләргә қатнашмиған башқа уйғурларғиму қаритилишқа башлиған.

Өзлири мушу хил әһвалға дуч кәлгән уйғурларниң инкас қилишичә, уларға телефун қилған кишләр, уйғур әлиниң һәрқайси шәһәр, наһийә вә йезилиридики мәхсус вәзипиләндүрүлгән. Хитайниң сақчи вә бихәтәрлик идарисиниң хадимлири болуп, уларниң көпчилики уйғур яки уйғурчини яхши сөзлийәләйдиған хитайлар икән. Улар дәсләп бәзиләрни өзлири билән һәмкарлишишқа, әһвал йәткүзүшкә дәвәт қилидикән, рәт қилишқа учриғандин кейин попоза вә тәһдит селишқа башлайдикән.

Кишини техиму ғәзәпләндүридиғи, телефун қилған хитай сақчилириниң көпчилики муттәһәм вә әдәпсиз болуп, өзлири сөзлишиватқан қарши тәрәптики кишигә худди җинайәтчигә гәп қилған тәләппузда гәп қилидикән.

Һазир норвегийидә яшаватқан әркин әпәнди юқириқидәк көңүлсиз телефун зияритигә дуч кәлгәнләрдин бәри болуп, у өзи баштин кәчүргән әһвалларни баян қилди.

Һәммигә мәлумки хитай даирлириниң бу хил йолсиз қилмиши вә һәддидин ашқан мутәһәмлики инсан һәқлиригә қилинған ашкарә таҗавузчилиқ, һәмдә хәлқара қанунларға түптин хилап. Қанун түзими мукәммәл, шәхсләрниң һәқ – һоқуқи вә иззәт – ғурури қаттиқ қоғдилидиған ғәрбтики демократик әлләрдә, бир кишигә қилинған һәрқандақ шәкилдики тәһдит вә һақарәт җинайәт һесаблинип тегишлик чарә көрилиду.

Нөвәттә чәтәлләрдә яшаватқан вә хитайниң һәр түрлук тәһдити вә роһи паракәндичиликигә дуч кәлгән уйғурлар өзлири дуч кәлгән әһвални дәлил – пакитлири билән қошуп өзлири турушлуқ дөләттики қанун органлири вә башқа мунасивәтлик орунларға мәлум қилип бу дөләттики мунасивәтлик даирләрниң бу мәсилә үстидә хитай даирилиригә мунасип инкас қайтурушни тәләп қилиш арқилиқ хитай сақчи даирлириниң йолсиз паракәндичилигидин сақлинишқа вә қанун арқилиқ оз һоқуқ – мәнпәтлирини қоғдашқа һәркәт қилмақта.