Tinchliq etriti teshkilati 50 yildin buyan dunya jama'etchilikige xizmet körsetmekte

Peace Chourps Teshkilatidiki 8 mingdin artuq kishi herqaysi döletlerde qiyinchiliqqa uchrighan kishilerning derdini yenggillitish xizmitige özini atighan.
Muxbirimiz eqide
2011.03.03

1960-Yili amérikining sabiq prézidénti jon kénidiy, amérikining mishigan uniwérsitétida nutuq sözlep, amérikiliqlargha, bolupmu yéngi uniwérsitét püttürgen oqughuchilargha tereqqiy qiliwatqan, bolupmu namrat bir qisim döletlerge bérip, jem'iyetke xizmet qilishni, bu jeryanda ulargha amérikining siyasiti, dölet qurulmisi qatarliqlarni toghra chüshendürüshni, qisqisi amérikini dunyagha tonutushni teshebbus qilghan idi. Sabiq prézidéntning shu qétimliq nutqidin kéyin, uzun ötmey amérikida Peace Courps teshkilati yeni tinchliq etriti teshkilati quruldi.

50 Yilliq xatire künini kütüwélishqa teyyarliq qiliwatqan bu teshkilatta, hazir 200 mingdin artuq yash qiz-yigitler xizmet körsetkendin sirt, nöwette 8 mingdin artuq kishi herqaysi döletlerde qiyinchiliqqa uchrighan kishilerning derdini yenggillitish xizmitige özini atighan. Teshkilatning asasliq ezaliri, sabiq prézidént jon kénidiy teshebbus qilghinidek, yéngi oqush püttürgen yashlardin terkib tapqan bolup, teshkilat heqsiz medeniyet bilimliri tarqitish, in'gliz tili ögitishni nishan qilghan.

Téksas uniwérsitétini ela netije bilen püttürgen nisha skari'a tinchliq etriti tor meydanida élan qilin'ghan melumatlargha asasen, hindonéziyige bérip, in'gliz tili oqutquchiliqi xizmitini tallighan bolup, u yolgha chiqishtin burun muxbirlargha: “Men téxi yash, hayatni qaysi yol bilen bashlaymen, néme ish bilen shughullinimen, bu jehette éniq bir qarargha kelginim yoq, hindonéziyige bérip, u yerdiki kishilerning hayatigha azraq bolsimu ijabiy özgirish béghishlisam, bu men üchün bext we bu arqiliq hayat tejribem yuqiri kötürülidu dep qaraymen” deydu.

Pénsilwaniye shtatida turushluq yash trawis blumlingmu in'gliz tili dersi bérish üchün özini tinchliq etriti teshkilatigha tizimlatqan bolup, u qaysi döletke bérish qararini kütüp turmaqta. Qiyinchiliq ichide yashawatqan kishilerge maddiy we meniwi yardemlerni bérish üchün, özlirinimu qiyinchiliq ichige atqan bu yashlar, wezipisi ayaghlashqandin kéyin amérikigha qaytip kélip hayat qedimini bashlighanda, elwette jem'iyet ulargha keng quchaq achidu.

Tinchliq etritining bashqa yardem bérish tüsini alghan teshkilatlardin perqi, chet döletke bérip yashash we shu dölette xizmet qilish bolup, teshkilatning taylandta turushluq rehbiri jon u'ilyamisning éytishiche, taylandta xizmet qiliwatqan bu teshkilatning xizmetchiliri oxshimighan sahelerge yardem qolini sun'ghandin sirt, balilarning bilim igilishige bolupmu in'gliz tili öginishige alahide yardem körsitip, özlirini xuddi tayland puqrasigha aylinip qalghandek hés qilidighanliqini bildürdi. U yene " : bizning mewjut bolghan barliq qiyinchiliqlarni toluq hel qilishimizgha qurbimiz yetmesliki mumkin, lékin yardem qolini sunup hel qilishqa bolghan tirishchanliqimiz nahayiti yuqiri " deydu.

“Omumen teshkilatimizning meqsiti, amérikining tashqi dunya bilen bolghan munasiwitini mustehkemlesh we chin dostluq ornitishtin ibaret” dégen u'ilyamis yene, “Bizning ezalirimizdin nisha skari'a, eng yirik musulman döletliridin biri hésablan'ghan hindonéziyige bérishtin burun azraq oylinip qaldi, emma hazir u nahayiti xushal xizmet qiliwatidu” deydu.

Nisha skari'a özi bu heqte toxtilip mundaq deydu: “Men hindonéziyini nahayiti radikal, diniy tertip-qa'idiliri qattiq bir jem'iyet dep tesewwur qilghan idim, eksiche bolghanliqini hés qildim, bu yerdiki hemme adem méhman dost, ochuq köngül bolup, méni qizghin kütüwaldi, biz xuddi bir a'ilidiki uruq-tughqanlargha aylinip qalduq, wezipem axirliship kétishke toghra kelgende bulardin qandaq ayrilishimni bilmeywatimen.”

Amérika puqraliri hindonéziyige oxshash bundaq döletlerde teqib astigha élin'ghan dégen xewerlerni anglighan trawisning ata-anisi oghlining bixeterlikidin endishe qilip, uning qaytip kélishini buyrughan biraq trawis buni ret qilip, ata-anisigha “Méning gumanlirim natoghra bolup chiqti, hindonéziyilikler méni hörmet bilen méhman süpitide kütüwaldi, manga aliy éhtiram körsetti. Men ularning pa'aliyetlirige, yighinlirigha qatnashtim hetta meschitlerge bardim, ulardin manga héchqandaq ziyankeshlik kelmeydu” dep mektup yollaydu.

Hazirgha qeder tinchliq etritining 200 mingdin artuq ezasi, özbékistanni öz ichige alghan 140 dölette pa'aliyet élip barmaqta. Ishenchlik xewerlerge köre, hetta tinchliq etriti teshkilatida, amérikida uniwérsitét püttürgen bir Uyghur qizning xizmet qiliwatqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.