Америка бүгүн террорчилиққа қарши туруш истратегийисини қайтидин җакарлиди
2011.08.04

Ройтерс агентлиқиниң бейҗиңдин баян қилишичә, йеқинда нопусниң мутләқ көп санлиқини түрк тилида сөзлишидиған уйғурлар игилигән қәшқәр шәһиридә йүз бәргән шиддәтлик һуҗумдин қаттиқ силкинип кәткән хитайда бүгүн, хитайниң әң чоң сақчи башлиқи, буниңдин кейин террорлуқ һәрикәтләргә һәргиз рәһим қилмаслиқ шоарини оттуриға қойди.
Шинхуа агентлиқиниң шинҗаң хәвәр тори бүгүн, хитайниң дөләт ишлири комиссари, җамаәт хәвпсизлик министири, мәмликәтлик террорчилиққа қарши туруш гурупписиниң башлиқи миң җәнҗу, үрүмчидә ечилған мәмликәтлик террорчилиққа қарши туруш йиғинида, қәтий нийәткә келип террорчилиққа қарши туруш керәк дәп чақириқ елан қилди дәп хәвәр қилди. Хитайниң шинхуа агентлиқи, хәлқ гезити, радио-телевезийилириму, бүгүн үрүмчидә ечилған мәмликәтлик террорчилиққа қарши туруш йиғини һәққидә чоң дағдуға пәйда қилишқа теришти.
Хитайниң биңтуән тәңритағ тори, миң җәнҗу террорчиларниң һәйвисини қаттиқ уруш керәк, деди дәп хәвәр елан қилди. Хитайниң шинҗаң бихәтәрлик тори, қәшқәр тинчиди, кәлгүси тәрәққиятқа болған ишәнч тикләнди дәп хәвәр елан қилди. Хитайниң шинҗаң гезити болса, миң җәнҗуниң сөзиниң текистини, мәркәзниң шинҗаң хизмәт йиғининиң роһини изчиллаштуруш дегән мавзу астида елан қилди.
Бүгүн хитай елан қилған бу хәвәрләрдә, террорчилиққа қарши турушта асаслинидиған қанун маддилири яки террорчилиқ дегәнниң тәбири пәқәт тилға елинмиди. Пәқәт уйғурлар нопусниң мутләқ көп санлиқини игиләйдиған хотәндә вә қәшқәрдә йеқинда йүз бәргән шиддәтлик қаршилиқлар тилға елинди. Хитай учур васитилири, әмәлийәттә бу вәқәләр дәл хитай һөкүмити көпләп көчмән йөткәп келип, йәрлик хәлқниң йәр земин, байлиқлирини игәлливалғанлқиға билдүрүлгән ипадә икәнликигә көз юмди. Хитай бүгүн елан қилған бу хәвәрләрниң һазир пүтүн хитайни, террорчилиққа қарши туруш дегән нам астида бирлишип уйғурларға зәрбә беришкә сәпәрвәр қиливатқанлиқи ениқ.
Америка һөкүмити бүгүн вашингтонда, америкиниң террорчилиққа қарши туруш истратегийисини қайтидин җакарлиғанлиқи, хитай һөкүмити бүгүн үрүмчидә, террорчилиққа қарши туруш сияситини җакарлиған вақитқа тоғра кәлди. Америка авазниң баян қилишичә, бүгүн ақсарай елан қилған доклатта, америка өзигә чоң тәһдит болуватқан әл қаидичиләр билән йәрлик террорлуқ һуҗумларға охшаш муамилә қилиду дәп көрсәтти. Шундақла, америка җәмийитигә йошурунған башқа диндики радикалларниң, америкиниң террорчилиққа қарши урушини исламға қарши уруш дәп бурмилап өсмүрләрни зәһәрләйдиған идеологийә һуҗумиғиму тақабил туриду дәп көрсәтти.
Америка террорчилиққа қарши туруш истратегийисини қайтидин җакарлиғанлиқи һәққидики бу хәвәр елан қилинған сәһипидиму бүгүн әркин муназирә болди. Муназириләрдә, америка шинҗаңда адәм өлтүрүп, от қуюп, булаңчилиқ қиливатқан уйғурларни, дуняға езилгән хәлқ дәп көрситиватқан дуня уйғур қурултийини тәкшүрүши керәк, дегән тәклипләрму оттуриға қоюлди. Әмма бүгүн бу һәқтә давам қилған муназириләрдә йәнила, америка бихәтәрлик органлири, америкиға сиңип керип чоңқур йошурунған хитай җасуслириниң америкиға әң чоң йошурун тәһдит икәнликини чүшиниши керәк вә уларни тез дин қезиши керәк; америкида яшашни халайдиған хитайлар дәрһал хитай коммунист җасуслирини қезишқа һәмкарлишиши керәк дегән тәклипләр үстүнлүкни игилиди.