'Muhebbetning 10 sherti' xitayning 60 yilliq chong tebrik küni teywende qoyulidighan filim, dep muqimlandi

Rabiye qadir xanim awstraliye ziyaritini ghelibilik axirlashturghandin kéyin, amérikigha qaytish aldida muxbirimizning ziyaritini qobul qilip, awstiraliye hökümiti we xelqige minnetdarliq bildürdi. Süret, rabiye xanimning 8 - awghust küni, "muhebbetning 10 sherti" namliq filim qyulghan zalda filimni körgili kelgen awstiraliye tamashibinliri arisida hayajanliq körünüshliridin biri.

Uyghur milliy herikitining rehbiri rabiye qadir xanim heqqidiki höjjetlik filimning bügün teywende qoyulushqa bashlighanliqidin bashqa, bu filimni 'xitayning 60 yilliq chong tebrik küni teywende qoyulidighan filim' dep muqimlan'ghanliqi, bügünki eng chong yéngi xewer bolup qaldi.

'Muhebbetning 10 sherti' bügün teywende qoyulishqa bashlidi

Roytérs agéntliqining teybéydin bayan qilishiche, xitay hökümitining ürümchide yüz bergen Uyghur qozghilingigha riyasetchilik qildi, dep eyiblewatqan Uyghur rehbiri rabiye qadir xanimning kechürmishliri teswirlen'gen 'muhebbetning 10 sherti' namliq höjjetlik filim, teywende filim féstiwalidin bir'ay burun, yigirme ikkinchi séntebir küni aldin'ala qoyulushqa bashlighan. Bu filim hazir teywende chong daghdugha qozghawatidu. Bügünki élanlardin melum bolushiche, bu filim ete töt qétim qoyulidiken.

Bélet élish üchün sep bolup turghan kishilerge bélet yétishmidi

Merkizi agéntliqining gawshongdin bayan qilishiche, 'muhebbetning 10 sherti' dégen 59 minutluq filim, bügün gawshongda üch qétim qoyuldi. Her qétimda, bélet élish üchün sep bolup turghan kishilerge bélet yétishmidi.

23 ‏- Chislaning bélitimu bügün pütünley sétilip boldi. Medeniyet merkizining xizmetchiliri hazir bélet zakaz qilidighan kishilerdin kéliwatqan téléfonlarni élishqa ülgürelmeywatidu.

Bu filimni daghdugha qiliwatqan kishiler teywen da'irilirini tenqidlidi

Bügün teybéy ahaliliridin yang famililik bir xanimning bu filim heqqide teywende boluwatqan weqelerni sözlep bérishiche, teywen filim féstiwaligha tallan'ghan 'muhebbetning 10 sherti' dégen filim teywen féstiwaligha tallan'ghan filim tizimlikidin chiqiriwétilmigen, belki teywende bügün aldin ‘ala qoyulushqa bashlighan.

Bu filim teywende nahayiti chong daghdugha qozghighan. Bu filimni körüshke aldirawatqan kishiler teywen da'irilirini ' néme üchün kütüpxanilardila qoyisen? ' dep teqidlep naraziliq bildürüshke bashlighan.

'Shinxu'a agéntliqi' yalghan éytti

Emma, 'shinxu'a agéntliqi' bügün gawshongdin tarqatqan xewiride, gawshong shehiri hazir jem'iyetning bésimi astida qélip, pilanini özgertip, kéler ayda féstiwalda qoyushqa pilanlan'ghan 'muhebbetning 10 sherti' dégen filimni kütüpxanidila qoyup ayaqlashturmaqchi bolghan idi, teywen xelqining qattiq tenqidige uchridi, dep bayan qildi.

Gawshong shehirining sheher bashliqi bu filim 'shehrimizde ochuq qoyulidu' dep jakarlidi

Merkizi agéntliqining bügün kech élan qilghan eng yéngi xewiride bayan qilinishiche, gawshong shehirining sheher bashliqi chén chu, bügün sheherlik parlaméntta, "muhajirettiki Uyghur rehbiri rabiye qadirning kechürmishliri teswirlen'gen 'muhebbetning 10 sherti' namliq höjjetlik filim shehrimizde ochuq qoyulidu. Bu filim shehirimizning erkinlik we démokratik tereqqiyati üchün paydiliq. Shehirimiz gerche sayahet shehiri bolsimu, emma shehirimizning ishliri sayahetchilerge béqinip qalmaydu. Biz bu filimning tesirini 7‏- ayning 24 ‏- küni mélborn filim féstiwalida körduq" dep jakarlighan.

Teywen medeniyet merkizining bashliqi wu seyping bügün jem'iyetke yene, xitay pütün küchi bilen eyiblewatqan Uyghur rehbiri rabiye qadirning kechürmishliri teswirlen'gen 'muhebbetning 10 sherti' dégen bu filim 'xitayning 60 yilliq chong tebrik küni teywende qoyulidighan filim' dep, jakarlidi.

Teywenlikler Uyghurlarni chüshenmeytti ...

Néme üchün rabiye xanim heqqidiki höjjetlik filim teywende bu qeder daghdugha qozghidi? dégen so'alimizgha jawab bergen, hazir teywende turuwatqan musteqil yazghuchi lin bawxu'a ning chüshendürüshiche, teywenlikler Uyghurlarni chüshenmeytti. Belki xitay hökümiti Uyghurlarni bek köp qarilap, eyiblep ketti. Gerche, teywenlikler, dunyadiki bashqa dölet xelqlirige oxshash, kommunist partiye yaman dégen ademni yaman adem emes, dep qarisimu, emma yenila Uyghurlarni obdan chüshenmeytti. 'Muhebbetning 10 sherti' dégen höjjetlik filim teywenliklerge heqiqiy rabiye xanimni körsitip qoydi.