Yene 2 neper tibetlikning saqchilar teripidin étip öltürülüshi jiddiy inkas qozghidi

23 - Yanwar sichüendiki naraziliq namayishida yarilan'ghan 2 neper tibetlikning 9 - féwral küni étip öltürülüshi xelq'arada jiddiy inkas qozghidi. Chet'ellerdiki tibet teshkilatliri dunya jama'etchilikini tibet weziyitige diqqet qilishqa chaqirdi.
Muxbirimiz méhriban
2012.02.10

Chet'ellerdiki tibet teshkilatliri xelq'ara metbu'atlarda bayanat élan qilip, dunya jama'etchilikini sichüen tibetler rayonida yüz bergen ikki neper tibetlikning xitay qoralliq saqchiliri teripidin étip öltürülüsh weqesige hem tibetler rayonida dawamlishiwatqan tibet rahiblirining özini öltürüwélish weqelirige diqqet qilishqa chaqirdi.

Radi'omiz tibet bölümi igiligen uchurlardin melum bolushiche, peyshenbe küni sichüenning genzi oblasti luxu nahiyisidiki 40 yashliq tibet rahibi yésxé rigsal we uning 38 yashliq inisi yésxé samdrub möküwalghan tagh arisida xitay qoralliq eskerliri teripidin étip tashlan'ghan.

Merkizi hindistandiki tibet sürgün hökümiti xadimining radi'omiz tibet bölümige bildürüshiche, rahib yésxé rigsal 23 - yanwar küni genzi oblastida yüz bergen xitay hökümitige qarshi namayishta saqchilarning oqi tégip éghir yarilan'ghan. Namayishtin kéyin yésxé rigsal inisi yésxé samdrub bilen birlikte tagh arisigha kirip mökün'gen. 9 - Féwral küni ular qollirida héchqandaq qarshiliq körsitish qorali bolmighan ehwalda qoralliq saqchilar teripidin qorshiwélinip étip tashlan'ghan.

Undin bashqa, 8 - féwral küni chüshtin kéyin chingxey ölkisining yulsul nahiyisidiki lab ibadetxanisining yene bir rahibi özige ot qoyuwalghandin kéyin, saqchi da'iriliri uni köyüp yarilan'ghan halette tutup ketken. Melum bolushiche, bu bulturdin buyan özige ot qoyuwalghan 22 - tibet rahibi iken.

Tibet sürgün hökümiti nöwettiki tibet weziyitining jiddiyliki heqqide bayanat bérip, xelq'ara kishilik hoquq teshkilatliri hem gherb démokratik döletlirini tibet weziyitige köngül bölüshke chaqirdi. Tibet sürgündiki hökümitining teshebbusi bilen dunyaning herqaysi jayliridiki tibetler pütün yer shari boyiche sham yéqip du'a qilish kéchiliki ötküzüp, 23 - yanwar sichüende yüz bergen tibetlerning naraziliq namayishida étip öltürülgen tibetlikler hem bulturdin buyan özige ot qoyuwélish arqiliq qarshiliqini ipadilep ölüp ketken tibetliklerni xatirilidi.

Melum bolushiche 8 - féwral kéchisi nyuyork shehirining manxatén meydanida ötküzülgen sham yéqip xatirilesh kéchilikige tibet herikitini qolli'ighuchi amérikiliqlar we bashqa kishilik hoquq teshkilatliri qatnashqan.

Tibet sürgündiki hökümiti bügün bergen bayanatida, tünügün sichüenning genzi oblastida tibetliklerni étip öltürüsh weqesini eyiblidi. Tibet sürgündiki hökümiti yene bu yil 23 - féwral tibetlerning yéngi yil bayrimi hem 10 - mart tibet qozghilingining 53 yilliq xatire küni yétip kélish aldida, xitay da'irilirining qoralliq eskerlirini tibetler rayonida téximu köpeytip, tibette yene bir qétimliq zor kölemlik basturush élip bérishqa teyyarliniwatqanliqini tekitlidi hemde dunya jama'itidin nöwettiki tibet weziyitige diqqet qilip, yenimu köpligen tibetlerning ziyankeshlikke uchrishining aldini élishni telep qildi.

Xitay da'iriliri 2012 - yili 23 - yanwar sichüende yüz bergen tibetlerning naraziliq herikitidin kéyin, weqeni chet'ellerdiki dalay lama terepdarlirining qutratquluq qilishi bilen yüz bergen bölgünchilik herikiti dep eyibligen hemde tibetler olturaqlashqan rayonlarda qoralliq eskerlerni köpeytip, rayonda qattiq bixeterlik tedbirliri élip baridighanliqini bildürgen idi. Emma tibetlerning xitay hökümitige qarshi naraziliq heriketlirining toxtimasliqi, rayon weziyitini téximu jiddiyleshtürüp, xelq'ara metbu'atlarning tibet weziyitige bolghan diqqitini tartmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.