Torontoda tibetliklerni qollash namayishi ötküzüldi


2008-03-24
Share

Yekshenbe küni xitay hökümitining tibettiki zorawanliq heriketlirini eyiblesh we tibette yüz bergen weqelerni tekshürüsh heqqide kanada hökümitini birleshken döletler teshkilatigha bésim ishlitishke ündesh yüzisidin kanadaning toronto shehiride chong tiptiki birleshme naraziliq namayishi élip bérildi.

Tibetlikler we ularning kanadaliq qollighuchiliri bolup 4 ming etrapida kishi qatnashqan bu naraziliq namayishigha sherqi türkistanning ayyultuzluq kök bayraqlirini kötergen 40 etrapida Uyghur ishtirak qildi.

Bu tibettiki naraziliq namayishliri xitay hökümiti teripidin qanliq basturulghandin kéyinki torontodiki Uyghurlarning tunji qétim tibetlikler bilen birlikte élip barghan naraziliq namayishi bolup hésablinidu. Ontari'o shitatining qanun organliri we torontodiki xitay konsulxanisining aldi hemde torontoning nuqtiliq kochilirida kocha aylinip 15 kilométirliq musapini bésip, naraziliq namayishi élip barghan namayishchilar qoshuni "xitay hökümiti tibettiki qirghinchiliqni toxtat!" , "xitaylar tibettin chiqip ketsun", "tibetke erkinlik," "kishilik hoquq bolmisa olimpikmu bolmaydu,"dégen shu'arlarni towlashti. 5 Sa'et etrapida dawam qilghan naraziliq namayishi jeryanida Uyghurlarning wekillirige alahide söz qilish pursiti bérildi.

Bu qétimqi namayishqa qatnashqan bir qisim Uyghurlarni ziyaret qilghinimizda bu pa'aliyet arqiliq Uyghurlarning dawasini kanada xelqighe anglitish pursitige érishkenlikini, tibetlikler bilen Uyghurlarning teqdirining chemberchas baghlan'ghanliqi, tibetliklerning heqqani dawasini qollashning emeliyette Uyghurlarning dawasini qollash bolidighanliqi qatarliqlarni eskertti. Bu qétimqi namayish kanada axbarat wastilirining alahide diqqitini tartti. (Kamil tursun)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet