Торонтодики уйғур җамаити оттуриға қойған уйғур мәсчити селиш келәчәк пилани канада һөкүмитиниң тәстиқлишидин өтти

Бундин 2 йил аввал торонтода яшаватқан уйғурлардин 7 киши бирлишип торонто шәһиридә уйғур мәсчити селишқа рәһбәрлик қилиш даимий комитети қурған иди.
Ихтиярий мухбиримиз гүлшән абдуқадир
2011.08.29
Share on WhatsApp
Share on WhatsApp
herem-yengi-meschit-305.jpg Мәсчити һәрәмгә йеңидин қошулуши пиланланған йеңи қурулушниң ичидин көрүнүши.
www.waraqat.net

Йеқинда бу даимий комитет әзалириниң канада һөкүмитигә йоллиған торонто шәһиридә уйғур мәсчити селиш һәққидики келәчәк пилани, канада һөкүмитиниң тәстиқлишидин өтти вә канада тәвәликидә уйғур мәсчити үчүн ианә топлашқа болидиғанлиқи һәққидә иҗазәтнамә берилди. Уйғур көзәткүчиләр буни канададики уйғурларниң келәчәк үчүн салған тарихи әһмийәтлик бир һүли дәп қарашмақта.

Бу мунасивәт билән биз торонто шәһиридә уйғур мәсчит селишқа рәһбәрлик қилиш даимий комитетиниң әзаси ибраһим қаримини зиярәт қилдуқ. У уйғур мәсчити селишниң канададики уйғурларниң миллий кимлики вә диний етиқадини сақлап қелишта муһим әһмийәткә игә икәнлики һәққидә тохталди.

Торонто шәһиридә уйғур мәсчити селишқа рәһбәрлик қилиш даимий комитетидики хадимлардин игилишимизчә, 7 кишилик даимий комитет әзалири дәсләптә бир мәхсус банка һесабати ечип һәр айда 100 канада доллирини мәсчиткә аташтин иш башлиған болуп, һазир уларниң топлиған мәблиғи 50 миң доллардин ашқан.

Ибраһим қарим йәнә, уйғур мәсчити селишқа рәһбәрлик қилиш комитетиниң кирим-чиқим һесабат ишлири интайин тәшкили принсиплиқ һаләттә елип бериливатқанлиқини тәкитлиди.

Өз исми вә авазини ашкарилашни халимиған бәзи даимий комитет әзалириниң билдүрүшичә, торонтода уйғур мәсчити селиш келәчәк пиланиниң канада һөкүмитиниң тәстиқлишиға еришиши, хитай һөкүмитигә уйғурларниң мәйли дуняниң нәридә болушидин қәтийнәзәр бирлишәләйдиған, иттипақлишалайдиған, өзлири турушлуқ дөләтләрдики қанун вә принсиплардин үнүмлүк пайдилинип өзлириниң миллий кимлики, диний етиқади тил вә өрп-адәтлирини қоғдиялайдиған милләт икәнликидин ибарәт сигнални беридикән. Уларниң йәнә билдүрүшичә, келәчәктә торонто шәһиридә бир уйғур мәсчитиниң қәд көтүрүши, уйғурларниң хитай һөкүмити ойлиғандәк,мәдәнийәт, диний етиқад вә өрп-адәт җәһәттин оңай йоқ болуп кетидиған милләт әмәсликиниң рошән бәлгиси болуп қалидикән.

Келәчәктә торонто шәһиридә селиниши пиланлиниватқан уйғур мәсчити пәқәт ибадәт орни болупла қалмастин йәнә, торонтодики уйғурларниң, миллий мәдәнийәт паалийәтлирини елип бериш, уйғур тили мәктәплирини ечиш, йиғилиш вә той-төкүн, нәзир-чирағ ишлирида орун йоқ болуштәк бошлуқни толдуридикән.

Юқиридики улиништин бу программиниң тәпсилатини аңлиғайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.