Torontoda hüseyin jélilni telep qilish, wankowérda olimpikke naraziliq bildurush namayishi ötküzüldi

Xitay da'irlirining olimpik mezgilidimu, kanada puqrasi hüseyin jélilni we Uyghur siyasiy mehbuslarni yenila turmida tutup turuwatqanliqigha shundaqla Uyghurlarning kishilik hoquqlirini éghir halda depsende qiliwatqanliqigha naraziliq bildürüsh üchün, jüme küni kechte, kanadaning toronto shehridiki Uyghurlar, bu sheherdiki xitay konsulxanisining aldida namayish élip bardi we xitay konsulxanisidin hüseyin jélilni qoyuwétishni telep qildi.
Muxbirimiz kamil tursun xewiri
2008-08-11
Share
Toronto-namayish-080808-305 8 - Awghust, kanada xitay konsulxanisi aldida élip bérilghan olimpikke naraziliq bildurush namayishidin bir körünüsh.
RFA Photo / Kamil Tursun

 Namayishqa Uyghurlardin bashqa yene kanadadiki "ijtima'iy adalet" teshkilatining ezaliri qatnashti.

Wankowérdiki béyjing olimpik musabiqisige naraziliq bildürüsh pa'aliyetliri dawam qilmaqta.Her sahedin bolghan nechche yüzligen kishi qatnashqan shenbe künidiki namayishta Uyghur wekilige söz qilish pursiti bérildi.

Kanada Uyghur jem'iyitining re'isi ruqiye xanim jüme küni kechte, torontodiki xitay bash konsulxanisi aldida ötküzülgen,kanada puqrasi hüseyin jélilning ikki yildin béri,xitayda qanunsiz tutup turulushigha naraziliq bildürüsh pa'aliyiti heqqide melumat berdi.

Ruqiye xanimning bildürüshiche, namayishchilar xitay konsulxanisidin hüseyin jélilni qoyuwétishni we uning teqdiri heqqide melumat bérishni telep qilghan bolsimu, emma xitay konsulxana xadimliri namayishchilar bilen yüz körüshüshtin özini qachurghan. Wankowérda Uyghurlarni öz ichige alghan xitay hökümitige qarshi birleshme naraziliq namayishi shenbe küni 3 - künige qedem qoydi.

Kanada Uyghur jem'iyitining hey'et ezasi ömerjan ependi, wankowérda ötküzülüwatqan pa'aliyetlerni tonushturdi. Shenbe künidiki chong namayishta söz qilish pursitige érishken ömerjan ependi, olimpik musabiqisini ötküzüsh hoquqini xitay hökümitige bérishning insaniyet tarixidiki xataliq ikenlikini we xitay da'irlirining olimpik bahanisida, Uyghurlarni basturushni kücheytkenlikini alahide tekitligen.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet