Канаданиң торонто вә ванкувер шәһәрлиридә олимпиккә қарши наразилиқ намайиши өткүзүлди

Хитай һөкүмитиниң олимпик мәшилини уйғур райониға елип келишигә вә олимпик һарписида уйғурларни бастурушни күчәйткәнликигә наразилиқ билдүрүш үчүн, 6 - айниң 25 күни, канаданиң торонто вә ванкувер шәһәрлиридә бирла вақитта наразилиқ намайиши елип берилди.
Мухбиримиз камил турсун хәвири
2008.06.26

Бу намайиш шундақла, хитайдин ибарәт кишилик һоқуқни еғир һалда дәпсәндә қиливатқан, пуқраларниң сөз - мәтбуат әркинликини пүтүнләй боғуватқан диктатор дөләтниң олимпик мусабиқисини өткүзүш һоқуқиниң йоқ икәнликини канада җамаитиниң сәмигә селиш мәқситидә, канаданиң торонто вә ванкувер шәһәрлиридики уйғурлар, бу икки шәһәрдики хитай әлчиханиси вә консулханисиниң алдида, бирла вақитта елип берилған наразилиқ намайиши һесаблиниду.

Канада уйғур җәмийитиниң уюштуруши билән елип берилған бу паалийәттә - олимпик мусабиқисини байқут қилишни тәшәббус қилидиған, хитайни кишилик һоқуқ дәпсәндичиликини тохтитишқа вә һүсәйин җелил шундақла башқа сиясий мәһбусларни қоюветишкә чақиридиған шуарлар товланди.

Канада уйғур җәмийитиниң рәиси руқийә ханим билән канада уйғур җәмийитиниң ванкувер шәһиридә турушлуқ һәйәт әзаси өмәрҗан әпәндини вә бир қисим уйғурларни зиярәт қилғинимизда, улар бүгүнки бу наразилиқ намайиши һәққидә тәпсилий мәлумат бәрди.

Бүгүнки бу намайиш канада тарихида тунҗи қетим икки шәһәрдә бирла вақитта өткүзүлгән хитай һөкүмитигә қарши паалийәт болуп һесаблиниду.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.