Су чечиш байрими күни камбоджада көврүк чүшүп кетип көп адәм өлүш паҗиәси йүз бәрди

Б б с агентлиқиниң хәвәр қилишичә, хуң сән аяли билән бирликтә камбоджалиқларниң өрп-адити бойичә диний тәзийә паалийити өткүзүп, өлгүчиләргә гүлчәмбирәк қойған.

 22-Ноябир күни, йәни шәрқий җәнубий асия әллириниң су чечиш байриминиң ахирқи күни камбоджада көврүк чүшүп кетиш һадисиси йүз берип, өлгәнләрниң сани 456 кә йәткән, яриланғанларниң сани 700дин ашқан. Бирақ, бу вәқәдә өлгәнләрниң сани һәққидә охшимиған мәлуматлар бар болуп, б б с агентлиқи өлгәнләрниң саниниң 350 әтрапида икәнликини хәвәр қилған.

Мунасивәтлик хәвәрләрдин ашкарилинишичә, бу паҗиә 2006- йили мәккидә йүз бәргән һәҗ паалийитидики қистаңчилиқ сәвәбидин 362 адәм өлгән вәқәдин кейинки йәнә бир қетимлиқ аммиви паалийәт җәрянида көп адәмниң өлүш-ярилиниш һадисиси һесаблинидикән. Камбоджа һөкүмити бу вәқәни камбоджада йүз бәргән әң еғир трагедийә дәп елан қилған.

 Нөвәттә, бу қетимлиқ паҗиә һәққидә хилму-хил пәрәзләр оттуриға қоюлмақта икән. Камбоджаниң һөкүмәт мәлуматлирида дейилишичә, 22-ноябир күни кечидә тәхминән 3 милйондәк киши пайтәхт пхном пен шәһиригә орда алдидики дәряда өткүзүлидиған қолвақ мусабиқисини көрүшкә топланған. Мусабиқә аяғлишишқа аз қалғанда, кишиләр арисида аралға тутушидиған чоң көврүк мустәһкәм әмәскән дегән өсәк сөзниң тарқилиши билән вәһимә пәйда болуп, көврүктә еғир қистаңчилиқ йүз бәргән. Һәтта бәзиләр өзини көврүк үстидин дәряға етип, техиму көп адәмниң өлүш-ярилиниш вәқәси келип чиққан болуши мумкин икән.

Әмма, йәнә башқа инкаслардин мәлум болушичә, сақчилар көврүк үстидики қистаңчилиқни пәсәйтиш үчүн, кишиләр топиға юқири бесимлиқ су чачқан. Нәтиҗидә кишиләр арисида паракәндичилик йүз берип, нурғунлиған кишиләр өз җенини қутулдуруш үчүн һәр тәрәпкә қачқан. Вәқәдә өлгәнләрниң көпинчиси дәссилип өлгән һәм қистаңчилиқ сәвәбидин нәпси боғулуп өлгән болуши мумкин икән. Мәлум болушичә , бу қетим өлгәнләр ичидә аяллар нисбәтән көп болуп, өлгәнләр арисида йәнә камбоджаға саяһәт үчүн кәлгән чәтәлликләрму бар икән.

 Өткән әсирниң 70-йиллирида камбоджада коммунист қизил кихмер һөкүмити һакимийәт сүргәндә бир милйон 700 миң адәмниң җениға замин болғанлиқи мәлум.