Su chéchish bayrimi küni kambodzhada köwrük chüshüp kétip köp adem ölüsh paji'esi yüz berdi

B b s agéntliqining xewer qilishiche, xung sen ayali bilen birlikte kambodzhaliqlarning örp-aditi boyiche diniy teziye pa'aliyiti ötküzüp, ölgüchilerge gülchembirek qoyghan.

 22-Noyabir küni, yeni sherqiy jenubiy asiya ellirining su chéchish bayrimining axirqi küni kambodzhada köwrük chüshüp kétish hadisisi yüz bérip, ölgenlerning sani 456 ke yetken, yarilan'ghanlarning sani 700din ashqan. Biraq, bu weqede ölgenlerning sani heqqide oxshimighan melumatlar bar bolup, b b s agéntliqi ölgenlerning sanining 350 etrapida ikenlikini xewer qilghan.

Munasiwetlik xewerlerdin ashkarilinishiche, bu paji'e 2006- yili mekkide yüz bergen hej pa'aliyitidiki qistangchiliq sewebidin 362 adem ölgen weqedin kéyinki yene bir qétimliq ammiwi pa'aliyet jeryanida köp ademning ölüsh-yarilinish hadisisi hésablinidiken. Kambodzha hökümiti bu weqeni kambodzhada yüz bergen eng éghir tragédiye dep élan qilghan.

 Nöwette, bu qétimliq paji'e heqqide xilmu-xil perezler otturigha qoyulmaqta iken. Kambodzhaning hökümet melumatlirida déyilishiche, 22-noyabir küni kéchide texminen 3 milyondek kishi paytext pxnom pén shehirige orda aldidiki deryada ötküzülidighan qolwaq musabiqisini körüshke toplan'ghan. Musabiqe ayaghlishishqa az qalghanda, kishiler arisida aralgha tutushidighan chong köwrük mustehkem emesken dégen ösek sözning tarqilishi bilen wehime peyda bolup, köwrükte éghir qistangchiliq yüz bergen. Hetta beziler özini köwrük üstidin deryagha étip, téximu köp ademning ölüsh-yarilinish weqesi kélip chiqqan bolushi mumkin iken.

Emma, yene bashqa inkaslardin melum bolushiche, saqchilar köwrük üstidiki qistangchiliqni peseytish üchün, kishiler topigha yuqiri bésimliq su chachqan. Netijide kishiler arisida parakendichilik yüz bérip, nurghunlighan kishiler öz jénini qutuldurush üchün her terepke qachqan. Weqede ölgenlerning köpinchisi dessilip ölgen hem qistangchiliq sewebidin nepsi boghulup ölgen bolushi mumkin iken. Melum bolushiche , bu qétim ölgenler ichide ayallar nisbeten köp bolup, ölgenler arisida yene kambodzhagha sayahet üchün kelgen chet'elliklermu bar iken.

 Ötken esirning 70-yillirida kambodzhada kommunist qizil kixmér hökümiti hakimiyet sürgende bir milyon 700 ming ademning jénigha zamin bolghanliqi melum.