Тунис рәиси ибни елиға 15 йиллиқ ғияби қамақ җазаси елан қилинди

Тунис рәиси зәйнил абидин ибни ели туниста намайиш чиқип, бир айдин кейин сәуди әрәбистаниниң җиддә шәһиригә қечип келип панаһланған иди.
Ихтиярий мухбиримиз өмәрҗан
2011.07.06
tunis-namayish-305.jpg Туниста намайишчилар ливийә консулиниң алдида намайиш қилмақта. 2011-Йили 21-феврал.
AFP

Тунистики адаләт мәһкимиси 20-июн күни тунис рәиси ибни ели билән аяли иккисини дөләтниң мал-мүлкини елип қачқанлиқи билән әйибләп, һәр иккисигә 35 йиллиқтин ғияби қамақ җазаси елан қилған вә аялиға 25 милйон, ибни елиға 41 милйон йоро җәриманә қойған иди. Кейинчә бу һөкүмгә “ алдирап елан қилинған һөкүм” дегән қаршилиқлар көп көрүлгәндин кейин, 2011-йили 4-июл күни ибни елиниң адвокатлириниму қатнаштурған муһакимидә, ибни елини пуқраларни қәстән өлтүргүзгән, дөләтниң мүлкини өзиниң қиливалған, тунисниң асарә-әтиқилирини елип қачқан, өйидә көп миқдарда зәһәрлик чекимлик сақлиған, намайишчиларни қанлиқ бастурған дегәндәк 93 түлүк җинайәт билән әйибләп, униң һәққидә 15йил6 айлиқ ғияби қамақ җазаси елан қилди вә 54миң йоро җәриманә қойди.

Лондонда чиқидиған “оттура шәрқ” гезитиниң 2011-йили 5-июл санидики хәвиригә көрә, ибни елиниң адвокатлири бу қетимқи муһакимидә ибни елини ақлаш үчүн көп күч сәрп қилған вә униң җазасиниң азайтилиши үчүн тиришқан. Ливан пайтәхти бейрут шәһиридин йүсүп дияб дегән кишиниң “оттура шәрқ”гезитиниң 2011-йили 5-июл санида елан қилған бир мақалисидә мундақ дәп йезилған: “тунис адаләт мәһкимисиниң түнүгүнки елани тунис рәиси зәйнил абидин ибни ели һәққидә елан қилинған иккинчи қетимлиқ һөкүм елани болуп, алдинқи һөкүмдин кейин ибни елиниң адвокатлири тәйярлиқини пухта қилған вә алдинқи һөкүмни қисқартишта ғәлибә қилған болди. Әмма қандақла болмисун, зәйнил абидинниң хәлқи тәрипидин муһакимә қилинғанлиқи вә вәтинидин мәңгүлүк айрилғанлиқи униң үчүн кичик җаза әмәс. Залимлар қандақ йәрдә панаһланмисун, чоқум бир күни җазасини чекиду. Униң үстигә зәйнил абидин һәққидики ғияби җаза йәнә қайтилиниши мумкин. Чүнки униң һәр бир җинайити үчүн айрим җаза кесишкә тоғра кәлсә, униңға 35 йилму азлиқ қилиду.”

Мақалидә йәнә мундақ дейилгән:“ тунис рәиси ибни һәққидики бу һөкүм әң ахирқи һөкүм әмәс, бәлки у бир қанчә қетим қайтилиниши мумкин. Чүнки тунис адаләт мәһкимисиниң сотчиси мухтар йәһявиниң билдүрүшичә, тунис рәиси ибни ели һәққидә елан қилинған бу һөкүм шәклий бир һөкүм болуп, уни тутуп келип мәһкимигә чиқарғанда һәммә иш нөлдин башлинидикән. Һазир муһим болуватқан мәсилә ибни елини тунисқа қандақ елип келиш мәсилиси болуп, униң ихтиярий һалда келиши еһтималдин бәкму йирақ иш икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.