Tunistin tutashqan ot misirda ewjge chiqti

Misirning her qaysi jaylirida 5 kündin biri hökümetke qarshi namayish dawam qilip kelgen bolup, 28-yanwar jüme küni eng ewjge chiqti.
Ixtiyariy muxbirimiz ömerjan
2011-01-31
Share
misirdiki-namayishtin-bir-korunush-305.jpg Misirdiki namayish. 2011-Yili 28-yanwar.
RFA/Omerjan

Namayish bu küni misirning barche rayonlirigha oqtek tiz tarap, hemme jayda omumlashti. Xewerlerge asaslan'ghanda, jüme küni bir kün ichide ölgen namayishchilarning sani qahirede5, suweysta 13, jem'iy 18ge yetken, yarilan'ghanlar sani yüzdin ashqan. Emma, ötken 5kün ichide türmige élin'ghanlarning sani bir mingdin ashqan. Misirda intérnét, téléfon qatarliq alaqilishish wasitiliri ishtin toxtighan.

Qatarning "El jezire" téléwiziye qanilining xewirige qarighanda, jüme künidiki namayishta namayishchilar hakimiyet üstidiki partiye "Milliy démokratiye partiyisi" ning misirning her qaysi jayliridiki qarargahlirigha ot qoyuwetken. Ular misir dölet téléwiziye istansisining binasigha bésip kirgili az qalghanda misir armiyisi ariliship ularni toxtatqan.

Misirning weziyiti tunisqa oxshamdu?

Qahire uniwérsitétining siyasiy ilimler ustazi doktor seyfuddin abdulfettah "El jezire" téléwiziye qanili muxbirining misir tunisqa oxshamdu? dégen so'algha jawab bérip mundaq dédi: "diktatorluqta misir hakimiyiti bilen tunis hakimiyiti perqlenmeydu. Xelqning zalimlardin qutulush iradisi bu ikki memlikette oxshash. Emma, tunista 4 heptide qolgha kelgen ghelibe, misirda 4 künde qolgha kélidighandek turidu. Uning üstige tunista dölet armiyisi siyasetning sirtida turghan bolsa, misirda dölet armiyisi siyasetning ichide, hemde mubarekning qolida turmaqta. Shunga misir bu jehette tunistin perqliqtur. Emma, ghelibe choqum bir xil bolidu, yeni namayishchilar ghelibe qilidu, zalimlar yoqilidu."

Mubarekning nutqi

Misir re'isi muhemmed hösni mubarek jüme küni kéche sa'et 12din ashqanda, misirning dölet téléwiziyiside sözge chiqip mundaq dédi: "misirda namayish bashlan'ghinigha bügün 4 kün boldi. Xelq öz pikrini erkin namayan qilsun dep ularni namayishtin tosmiduq. Chünki, bizde démokratiye bar. Emma, namayishchilar ichide bezi yaman niyetlik kishiler ot qoyush, buzup, chéqish qatarliq ishlarni sadir qildi. Biz namayishchilargha qarshi küch ishletmiduq. Men xelqning bu namayishini qollaymen. Shunga namayishchilargha küch ishletmeslik heqqide emir berdim. Misirliq yashlarning ishsizliq mesilisini hel qilish üchün programmilirimiz bar idi. Biz xelq bilen birgimiz. Biz islahat üchün bashlighan yolimizdin qaytmaymiz. Misirda hakimiyet sürüwatqan partiyini istépa sorashqa buyrudum. Ete yéngi hökümet qurup chiqimiz. Xelqning telipini orundaymiz."

Mubarekning nutqigha jawab

"El jezire" téléwiziye qanili misir re'isi mubarekning nutqidin kéyin, misir karamet partiyisining re'isi doktor emin iskenderni sözge teklip qilghan bolup, u mubarekning nutqigha reddiye bérip mundaq dédi: "misir re'isi mubarekning bashqa partiye qurup mesilini hel qilimiz dégenliki op'ochuq aldamchiliq bolup, u waqit qazinish üchün yéngi bir sénariyini pilanlimaqta. Chünki, xelqning telipi mubarektin qutulush tursa, u bashqa bir partiye qurghandimu özining qol chomaqlirini tikleydu, ishning arqisida yene özi bolidu emesmu. Yene mubarek namayishchilargha qarshi küch ishletmigenlikini dewa qildi. Undaqta 20ge yéqin ademni kim öltürdi? minglarche bigunah xelqni kim türmilerge tashlidi? mubarek op'ochuq yalghan sözlimekte. U goya héch ish bolmighandek mesilini yögimekchi bolidu. Lékin, meyli mubarek bolsun, meyli bashqa zalimlar bolsun, ularning texttin chüshidighan waqti yétip keldi. Bu namayish toxtimaydu. Namayishchilar meqsitige yetmey toxtimaydu."

Doktor emin iskender el jezire muxbirining "mubarek néme üchün bashqa partiye qurushni tallidi?" dégen so'aligha jawab bérip, "chünki, mubarek weziyet bu halgha kelgen bir waqitta bashqa ish qilalmaydu. U hazir charisiz. Shunga xelqni achchiqidin qayturush üchün bu oyunni pilanlap chiqti. Emma, xelq eqilliq. Buninggha aldanmidi. Namayishchilar qahirening azadliq meydanida mubarekning sözini qulaq sélip anglidi. Uning sözi tügigen haman "yoqal mubarek!", "texttin chüsh!", "sen ketseng mesile hel bolidu" dep warqiriship namayishni dawam qildurdi. Bu namayish axirghiche shundaq dawam qilip choqum közligen nishanigha yétidu."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet