Turpanyüzi déhqanlirining yer dawasi hökümet da'irilirini bi'aram qilmaqta

Igilishimizche, turpanyüzi déhqanlirining yer dawasi 2008-yili 4-ay mezgilide bashlan'ghan. 2008-Yili yil béshida ghulja nahiyilik hökümet hem turpanyüzi yéziliq hökümet béyjing chingxu'a shirkiti bilen turpanyüzi yézisida istirahet baghchisi qurush kélishimi imzalighan. Kélishimge asasen turpanyüzi yézisining yuqiriqi turpanyüzi kentidiki ili xelqi teripidin “Ghulja nahiyisining aq örük makani” dep atalghan 15 a'ililik déhqanning béghi hem bagh etrapidiki déhqanlarning yerliri mejburiy halda béyjing chingxu'a shirkitige sétip bérish qara qilin'ghan.

Eyni chaghda, turpanyüzi déhqanliri hem bagh igiliri yerlirini béyjing chingxu'a shirkitige sétip bérishni ret qilghan bolsimu, emma yéziliq hökümet hem nahiyilik hökümet déhqanlargha bésim ishlitip, “Bu, ghulja nahiyiside aylanma tereqqiyat rayoni qurush pilanining bir qismi, béghini sétishqa qarshiliq qilghanlar jazalinidu” dégendek sözler arqiliq turpanyüzi déhqanlirining baghlirini mejburiy sétiwalidighanliqini uqturghan.

Yézidiki déhqanlarning bildürüshiche, yéziliq hem nahiyilik hökümetning qattiq bésim qilishi netijiside yézidiki 15 a'ililik déhqan baghlirini chingxu'a shirkitige sétip bérishke mejbur bolghan. Emma, bulturdin bashlap yérini satqan déhqanlar sürüshtürüsh arqiliq, yéziliq hökümet hem nahiyilik hökümetning déhqanlarning baghlirini chingxu'a shirkitige sétip bérish arqiliq, aridin zor payda alghanliqini bilgen. Yerlirini yéziliq hökümetning mejburlishi bilen erzan bahada sétip qoyghanliqidin narazi bolghan bu 15 a'ililik déhqan ürümchidiki aptonom rayonluq erziyet idarisige turpanyüzi yéziliq hökümet hem nahiyilik hökümet üstidin erz qilip barghan.

Ehwaldin xewiri bar kishilerning bildürüshiche, bu yil xitayning chaghan bayrimi harpisida nahiyilik hökümet tuyuqsiz uqturush chüshürüp, yéza bashliqi pexirdinning xizmet munasiwiti bilen yéngi tam yézisigha yötkelgenlikini, yézigha yéngidin teyinlen'gen rena isimlik yéza bashliqi kelgendin kéyin, déhqanlarning yer dawasini yéziliq hökümet hem nahiyilik hökümetning qayta qarap chiqidighanliqini uqturghan.

Biz xitayning chaghan bayrimi ayaghlashqandin kéyin yeni 14-féwral küni, turpanyüzi yézisida yer dawasi qiliwatqan déhqanlarning erzini hökümet da'irilirining qandaq bir terep qiliwatqinini bilish üchün, Uyghur aptonom rayonluq erziyet idarisi hem turpanyüzi yéziliq hökümetke téléfon qilip ehwal igiliduq.

Uyghur aptonom rayonluq erziyet idarisige qilghan téléfonimizni bir xizmetchi xadim aldi.

U bizge idaride ish teqsimati éniq ayrilghini üchün, özining turpanyüzi déhqanlirining yer dawasi heqqidiki erzi heqqide konkrét ishlarni bilmeydighanliqini tekitlidi. U yene idaride chet'el agéntliqlirining ziyaritini qobul qilidighan mexsus belgilen'gen tashqi ishlar bölümi barliqini bildürüp, ziyaritimizni qobul qilishni ret qildi.

Emma, erziyet idarisining tashqi ishlar bölümige urghan téléfonimiz bolsa jawabsiz qaldi.

Biz sürüshtürüsh arqiliq turpanyüzi yézisining sabiq yéza bashliqi pexirdin hem yéziliq partkom sékrétari jang famililik kadirning téléfon nomurini alduq. Yéza bashliqi pexirdin'ge urghan téléfonimiz jawabsiz qalghan bolsimu, emma, partkom sékrétari jang ziyaritimizni qobul qildi.

Özini yézining partkom sékrétari dep tonushturghan jang famililik bu kadir, bizge özining shu tapning özide turpanyüzi yézisidiki déhqanlar bilen yer dawasi heqqidiki söhbet üstide ikenlikini bildürüp, özining déhqanlarning yer dawasi heqqidiki erzlirige bashqiche qaraydighanliqini ilgiri sürdi.

Jang famililik bu kadir sözide, yéziliq hökümetning eyni chaghda heqiqeten déhqanlarning yerlirini sétiwélish jeryanida, déhqanlarning baghliridiki derexlerning türige qarap oxshimighan baha qoyup sétiwalghanliqini, shundaq bolghini üchün déhqanlarning naraziliqi qozghalghanliqini étirap qildi. Emma u sözide, hazir déhqanlar bilen yéziliq hökümet arisida uqushmasliq boluwatqanliqini tekitlep, yéziliq hökümetning déhqanlarni baghlirining 25 yilliq ishlitish hoquqini chingxu'a shirkitige sétip bérishke righbetlendürüsh arqiliq, turpanyüzi yézisidiki pütkül déhqanlargha yaxshi turmush shara'iti yaritip bérish meqsitide bolghanliqini qayta -qayta tekitlidi. U sözide yene yéziliq hökümetning déhqanlar bilen kéngishish arqiliq bu mesilini hel qilalaydighanliqigha ishenchi barliqini bildürdi.

U muxbirning yéza bashliqi pexirdinning bashqa yézigha yötkiwétilishining déhqanlarning yéziliq hökümet üstidin qilghan erzi bilen munasiwiti bar-yoqluqi heqqidiki so'aligha jawab bérip, yéza bashliqi pexirdinning bashqa yézigha yötkilishi tamamen xizmet éhtiyajidin ikenlikini tekitlidi.

U yene, belkim öziningmu bir ikki yil ichide yuqirining orunlashturushi bilen bashqa jaygha yötkilishi mumkinlikini, junggoda hökümet kadirlirining xizmet teqsimatining tamamen yuqirining orunlashturushi bilen bolidighanliqini bildürdi.

Öz kimlikini ashkarilashni xalimaydighan turpanyüzi déhqanlirining bildürüshiche, nöwette déhqanlar bilen yéziliq hökümet otturisidiki yer dawasi hazirche söhbet sheklide dawamlishiwétiptu. Eger yéziliq hökümet hem nahiyilik hökümet déhqanlarning yer dawasi heqqidiki erzini déhqanlar razi bolghudek hel qilmisa, yéziliq hökümetning bésimi bilen baghlirini erzan bahada sétishqa mejbur bolghan déhqanlar béyjingghiche bérip erz qilish éhtimalimu bar iken.