Түркийиниң мәзлумлар җәмийити хитай консулханисиниң алдида намайиш қилди

Түркийә мәтбуатлирида хотәндә 600 нәпәр аял тутқун қилинип түрмигә қамалғанлиқ тоғрисидики хәвәр арқа ‏- арқидин кәң түрдә тарқалғандин кейин , түркийә хәлқи вә аммиви тәшкилатлар хитайларға болған наразилиқини вә уйғурларға болған һесдашлиқини билдүрүп йиғин вә намайишлар оюштурмақта.
Мухбиримиз арислан хәвири
2008.04.22
Хотәндә аял тутқун 21 ‏- Апрел, дүшәнбә күни, туркийә "мәзлумлар җәмийити" вә "шәрқий түркистан маарип вә һәмкарлиқ җәмийити" бирликтә уюштурған намйштин көрүнүш.
Photo: RFA
 Өткән һәптә саадәт партийси билән шәрқий түркистан маарип вә һәмкарлиқ җәмийити бирликтә хитай консулханисиниң алдида намайиш қилип хитай һакимийитиниң уйғурларға қарита елип бериватқан бастуруш һәрикәтлирини тохтитишни вә хотәндә тутқун қилинған аялларни шәртсиз дәрһал қоюп беришни тәләп қилған иди.

Бу һәптә йәнә 21 ‏- апрел дүшәнбә күни инсан һәқлирини қоғдаш вә зулумға учриған хәлқләргә ярдәм қилиш үчүн хизмәт қилидиған "мәзлумлар җәмийити" вә "шәрқий түркистан маарип вә һәмкарлиқ җәмийити" ниң бирликтә уюштуруши билән 50 кишидин тәркип тапқан бир гуруппа, қоллирида ай юлтузлуқ көк байрақ билән түркийиниң байриқини көтүрүп "мәзлумларниң авазиға қулақ салмиғанларға аһ уримән" , "зулумға қаршилиқ көрсәт , болмиса униңға көнүп қалисән"дегән чоң хәтләр йезилған вивискиларни көтүргән һалда хитай консулиниң алдиға топлинип намайиш қилди.

 Намайишчилар хитай һакимийитиниң уйғурларға қарита елип бериватқан бастуруш һәрикәтлирини тохтитиш вә хотәндә тутқун қилинған аялларни шәртсиз һалда дәрһал қоюп беришни тәләп қилди . Хитайниң истанбулдики консулханиси алдиға топланған намайишчиларға вакалитән мәзлумлар җәмийитиниң истанбул шөбә башлиқи айхан күчүк сөз қилип 2008 ‏- йили 23 ‏- март күни хотәндә елип берилған намайишта тутқун қилинип түрмигә қамалған 600 нәпәр ханим ‏- қизларниң қоюп берилиши үчүн б д т инсан һәқлири тәшкилати , яврупа иттипақи вә америка қатарлиқ пүткүл дөләтләр вә хәлқаралиқ аммивий тәшкилатларниң хитайға бесим ишлитишни тәләп қилди. Һәмдә сөз қилип, хитайниң шәрқий түркистан хәлқини вәһшиянә бастуруш һәрикәтлирини тохтитиш вә хотәндә қолға елинған 600 нәпәр ханим ‏- қизларниң түрмидин қоюп берилиши үчүн хитай һакимийитигә бесим ишлитиштә хәлқаралиқ аммиви тәшкилатларниң қоллап ‏- қуввәтлишини тәләп қилди.

Намайишқа көп санда радио ‏- телевизийә мухбирлири вә ахбаратчиларму кәлгән иди. Ахбаратчилар хитай консулхана бинасиниң деризисидин мәхпий шәклидә рәсимгә тартиватқан вә синалғуға еливатқан 2 нәпәр хитай қизни көргәндин кейин уларму рәсим вә синалғу аппаратлирини хитай консулхана бинасиниң ичидики у икки нәпәр хитай қизға тоғрилиди. Намайишниң бихәтәрликини көздә тутуп көп санда сақчиларму кәлгән иди.

Биз намайишқа қатнашқан пишқәдәм вәтәнпәрвәр зат мәмәт сәләй һаҗим артуши билән сөһбәт елип бардуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.