13 - Нөвәтлик түрк дуняси рәссамлар учришиши истанбулда давамлашмақта

Сабиқ совет иттипақи парчиланғандин кейин түркийә түркий җумһурийәтлири вә түркий милләтләр билән болған мунасивитини тәрәққий қилдуруш үчүн һәр хил паалийәтләрни уюштурмақта. Булардин бири түрксой рәссамлар учришишидур.
Мухбиримиз әркин тарим
2010-06-23
Елхәт
Пикир
Share
Принт
Сүрәттә, истанбулда давамлишиватқан 13 - нөвәтлик түрк дунйаси рәссамлар учришишиға уйғур рәссамларға вакалитән қатнишиватқан, һазир германийиниң мйунхен шәһридә олтурушлуқ, тонулған уйғур рәссам мәрвайит һапиз ханим.
Сүрәттә, истанбулда давамлишиватқан 13 - нөвәтлик түрк дунйаси рәссамлар учришишиға уйғур рәссамларға вакалитән қатнишиватқан, һазир германийиниң мйунхен шәһридә олтурушлуқ, тонулған уйғур рәссам мәрвайит һапиз ханим.
RFA Photo / Erkin Tarim

Бу паалийәтниң биринчи қетимлиқи 1997 - йили өткүзүлгән болуп, 13 - қетимлиқи бу йил истанбулниң асия тәрипидики мармара коңгире мәркизидә өткүзүлмәктә. Бу нөвәтлик паалийәт 6 - айниң 15 - күнидин 30 - күнигичә өткүзүлидиған болуп, 18 түркий милләттин 19 тонулған рәссам қатнашмақта.

Уйғур рәссамларға вакалитән һазир германийиниң мюнхен шәһридә олтурушлуқ, тонулған уйғур рәссам мәрвайит һапиз ханим билән қазақистанлиқ тонулған рәссам әхмәт әхәт әпәнди қатнашқан.

Бу паалийәтни уюштурған хәлқаралиқ түркий милләтләр мәдәнийәт идариси мәсуллиридин санҗар мулайимоғлу әпәнди мәзкур паалийәт һәққидә мәлумат берип мундақ деди: "түрксой йәни хәлқаралиқ түркий милләтләр мәдәнийәт идариси қурулған 1997 - йилиниң башлирида түрк дуняси рәссамлар учришиши өткүзгән идуқ. Бу паалийәткә түрксойға әза түркий милләтләрдин тонулған рәссамлар қатнашмақта. Бүгүнгичә болған 12 қетимлиқ учришишта 800 дин көп рәсим сизилди. Һазирғичә 150 рәссамни бир йәргә җәм қилдуқ. 13 - Қетимлиқ рәссамлар учришишини даңлиқ түрк рәссам осман һамди әпәндиниң вапат болғанлиқиниң 100 - йиллиқиға атап өткүздуқ. Бу паалийәткә қатнишиватқан рәссамлар икки һәптә бирликтә рәсим сизиду. Бу рәсимләр 6 - айниң 30 - күни чүштин кейин саәт 2дә истанбул археологийә музейида көргәзмигә қоюлиду. Уйғур рәссам әхмәт әхәт билән мәрвайит һапиз ханимниң рәсиминиму қойимиз. Истанбулдики уйғурлар келип зиярәт қилса болиду."

Қисқартилма нами "түрксой" дәп аталған хәлқаралиқ түркий милләтләр мәдәнийәт тәшкилати түркий хәлқләрниң мәдәнийитини қоғдаш вә тәрәққий қилдуруш мәқсити билән қурулған болуп, мәркизи әнқәрәгә җайлашқан. Бу тәшкилатқа мустәқиллиққә еришкән оттура асия түркий җумһурийәтлиридин башқа татар, тува, хакас вә чувашқа охшаш түркий милләтләрму әза болған. Хитай һөкүмити рухсәт қилмиғачқа уйғур елидики уйғурлар әза болалмиған.
 
13 - Нөвәтлик түрк дуняси рәссамлар учришиши һәққидә техиму тәпсили мәлумат елиш үчүн уйғур рәссам мәрвайит һапиз вә әхмәт әхәт әпәндиләр билән сөһбәт елип бардуқ.

Юқиридики аваз улинишидин, бу һәқтики сөһбитимизниң тәпсилатини аңлайсиләр.
Пикирләр (0)
Share
Толуқ бәт