Әнқәрәдә ' түрк дунясидики соқушларниң сәнәттики излири' мавзулуқ йиғин чақирилди

Түркийидики университетлар, аммиви тәшкилатлар вә түрк хәлқи оттура асия түркий җумһурийәтлири вә түркий милләтләр билән болған мунасивәтләргә вә уларниң мәсилилиригә алаһидә көңүл бөлиду.
Мухбиримиз әркин тарим
2009.04.28
Turk-dunyasi-yighini-305 Ғази университети оқуғучилар уйушмисиниң башлиқи өзгүр қалә әпәнди "шәрқий түркистан" темисида сөз қилмақта.
RFA Photo / Erkin Tarim

Болупму 1991 - йили совет иттипақи парчилинип түркий җумһурийәтләр мустәқил болғандин кейин, түрк дуняси һәққидә давамлиқ һалда һәр хил паалийәтләр өткүзүлмәктә. Булардин бири 4 - айниң 27 - күни әнқәрә ғази университетиниң залида чақирилди.  Ғази университети гүзәл сәнәтләр факултети тәрипидин чақирилған  "түрк дунясидики соқушларниң сәнәттики излири"  мавзулуқ 2 күн давам қилидиған бу хәлқаралиқ илмий муһакимә йиғинниң ечилиш мурасими ғази университетниң залида өткүзүлди.

Йиғин залиға оттура асия түркий җумһурийәтлири, татаристан, қирим, шималий сипурус түрк җумһурийити, ирақтики түркмәнләрниң байриқи вә шәрқий түркистанниң ай юлтузлуқ көк байриқи есилған. Йиғинниң ечилиш мурасимиға парламент әзаси, сабиқ милли мудапиә министири сабаһәттин чақмақоғлу, бирләшкән дөләтләр тәшкилати мусапирлар ишханисиниң түркийә вәкил ярдәмчиси роланд счиллиң, ғази университети мудири проф. Др. Риза айхан қатарлиқ кишиләр қатнашти вә муһим сөз қилди. Болупму бирләшкән дөләтләр тәшкилати мусапирлар ишханисиниң түркийә вәкили һазир дуняда 10 милйон әтрапида инсанниң өз вәтинидин айрилишқа мәҗбур қелип мусапир болуп қалғанлиқини, буларниң ичидә түркий милләт мусапирлириниң аз әмәсликини ейтти. Буларниң көпиниң сияси сәвәбләр түпәйлидин өз юртидин қечишқа мәҗбур қалғанлиқини ейтти.

Кейин һазир сияси бесим инсан һәқлири дәпсәндилиригә дучар боливатқан түркий милләтләрниң вәкиллири, өз районидики мәсилилирини, болупму тарихта болған урушларниң өз сәнитидики излири һәққидә тохтилип өтти. Биринчи болуп ғази университети оқуғучилар уюшмисиниң башлиқи өзгүр қалә әпәнди "шәрқий түркистан" темисида, қиримлиқ татар сәнәтчи рустәм әминов "қирим татарлири вә сүргүн" темисида сөз қилди.

Кейин йәнә руслар тәрипидин грузийиниң ахиска районидин сүргүн қилинған ахиска түрклириниң вәкили юнус зәйрәк әпәнди сөз қилди. Кейин азәрбәйҗанлиқ сәнәтчи али һәрисчи әпәнди әрмәнийиликләр бесивалған қарабағ мәсилисини аңлатти. Әң ахирида ирақлиқ сәнәтчи мәлтәм қатиранчи хеним ирақ түркмәнлири саддам һүсәйин мәзгилидә тартқан зулумини аңлатти.
   
Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.