Enqerede ' türk dunyasidiki soqushlarning sen'ettiki izliri' mawzuluq yighin chaqirildi

Türkiyidiki uniwérsitétlar, ammiwi teshkilatlar we türk xelqi ottura asiya türkiy jumhuriyetliri we türkiy milletler bilen bolghan munasiwetlerge we ularning mesililirige alahide köngül bölidu.
Muxbirimiz erkin tarim
2009.04.28
Turk-dunyasi-yighini-305 Ghazi uniwérsitéti oqughuchilar uyushmisining bashliqi özgür qale ependi "sherqiy türkistan" témisida söz qilmaqta.
RFA Photo / Erkin Tarim

Bolupmu 1991 - yili sowét ittipaqi parchilinip türkiy jumhuriyetler musteqil bolghandin kéyin, türk dunyasi heqqide dawamliq halda her xil pa'aliyetler ötküzülmekte. Bulardin biri 4 - ayning 27 - küni enqere ghazi uniwérsitétining zalida chaqirildi.  Ghazi uniwérsitéti güzel sen'etler fakultéti teripidin chaqirilghan  "türk dunyasidiki soqushlarning sen'ettiki izliri"  mawzuluq 2 kün dawam qilidighan bu xelq'araliq ilmiy muhakime yighinning échilish murasimi ghazi uniwérsitétning zalida ötküzüldi.

Yighin zaligha ottura asiya türkiy jumhuriyetliri, tataristan, qirim, shimaliy sipurus türk jumhuriyiti, iraqtiki türkmenlerning bayriqi we sherqiy türkistanning ay yultuzluq kök bayriqi ésilghan. Yighinning échilish murasimigha parlamént ezasi, sabiq milli mudapi'e ministiri sabahettin chaqmaqoghlu, birleshken döletler teshkilati musapirlar ishxanisining türkiye wekil yardemchisi roland schilling, ghazi uniwérsitéti mudiri prof. Dr. Riza ayxan qatarliq kishiler qatnashti we muhim söz qildi. Bolupmu birleshken döletler teshkilati musapirlar ishxanisining türkiye wekili hazir dunyada 10 milyon etrapida insanning öz wetinidin ayrilishqa mejbur qélip musapir bolup qalghanliqini, bularning ichide türkiy millet musapirlirining az emeslikini éytti. Bularning köpining siyasi sewebler tüpeylidin öz yurtidin qéchishqa mejbur qalghanliqini éytti.

Kéyin hazir siyasi bésim insan heqliri depsendilirige duchar boliwatqan türkiy milletlerning wekilliri, öz rayonidiki mesililirini, bolupmu tarixta bolghan urushlarning öz sen'itidiki izliri heqqide toxtilip ötti. Birinchi bolup ghazi uniwérsitéti oqughuchilar uyushmisining bashliqi özgür qale ependi "sherqiy türkistan" témisida, qirimliq tatar sen'etchi rustem eminow "qirim tatarliri we sürgün" témisida söz qildi.

Kéyin yene ruslar teripidin gruziyining axiska rayonidin sürgün qilin'ghan axiska türklirining wekili yunus zeyrek ependi söz qildi. Kéyin azerbeyjanliq sen'etchi ali herischi ependi ermeniyilikler bésiwalghan qarabagh mesilisini anglatti. Eng axirida iraqliq sen'etchi meltem qatiranchi xénim iraq türkmenliri saddam hüseyin mezgilide tartqan zulumini anglatti.
   
Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.