Түркийә енергийә министири танер йилдиз шәрқий түркистан тәшкилатиға келип уйғурлар билән һейтлашти

Түркийә енергийә вә тәбиий байлиқлар министири танер йилдиз әпәнди билән қәйсәри қоҗасинан районлуқ һөкүмәтниң башлиқи бекир йилдиз әпәнди башчилиқидики бир һәйәт 9 - айниң 11 - күни , йәни рози һейтниң 3 - күни қәйсәри шәрқий түркистан мәдәнийәт вә һәмкарлиқ җәмийитигә келип уйғурлар билән һейтлашти.
Мухбиримиз әркин тарим
2010-09-13
Share
Turk-ministiri-Qeyseri-Uyghur-wexpide-Siyit-Tumturk-305 Түркийә енергийә министири танер йилдиз әпәнди башчилиқидики бир һәйәт 9 - айниң 11 - күни, қәйсәри шәрқий түркистан мәдәнийәт вә һәмкарлиқ җәмийитигә келип уйғурлар билән һейтлашқан болуп, сүрәттә, министир танер йилдиз әпәнди, дунйа уйғур қурултийи муавин рәиси сейит түмтүрк әпәнди вә уйғур җамаити билән биргә.
RFA Photo / Erkin Tarim

Министир танер йилдиз әпәнди шәрқий түркистан тәшкилатиниң ишханисидики һейт дастиханиға дахил болуп, рози һейт үчүн тәйярланған назу - немәтләргә еғиз тәгди, кейин сәһнигә чиқип сөз қилди. У өзиниң шәрқий түркистан мәдәнийәт вә һәмкарлиқ җәмийитигә келишидики сәвәбләр үстидә тохталғандин кейин, пүтүн дунядики уйғурларниң роза һейтини тәбриклиди.

Танер әпәндиниң сөзи ахирлашқандин кейин, биз "униңдин түркийә баш министири рәҗәп таййип әрдоған, рәис җумһури абдуллаһ гүл вә сиз уйғурларни зиярәт қилип улардин һал соридиңлар, буниңдин уйғурлар интайин хурсән болди. Әмма түркийә рабийә қадир ханимға техиғичә виза бәрмиди, бу һәқтә бирәр йеңилиқ барму? " дәп сориғинимизда, у соалимиздин өзини чәткә елип ениқ бир җаваб бәрмиди.
Turk-ministiri-Qeyseri-Uyghur-wexpide-mihman-Siyit-Tumturk-305
Түркийә енергийә министири танер йилдиз әпәнди башчилиқидики бир һәйәт 9 - айниң 11 - күни, қәйсәри шәрқий түркистан мәдәнийәт вә һәмкарлиқ җәмийитигә келип уйғурлар билән һейтлашқан болуп, сүрәттә, министир танер йилдиз әпәнди уйғурниң һейтлиқ дастирхени үстидә.
RFA Photo / Erkin Tarim
 
Биз у күни тәпсили әһвални игиләш үчүн нәқ мәйданға телефон қилдуқ.
   
Түркийә енергийә вә тәбиий байлиқлар министири танер йилдиз вә қоҗасинан районлуқ һөкүмәтниң башлиқи бәкир йилдизниң шәрқий түркистан мәдәнийәт вә һәмкарлиқ җәмийити ишханисида уйғурлар билән һейитлишиш мурасимида алди билән дуня уйғур қурултийи муавин рәиси сейит түмтүрк әпәнди сөз қилип мундақ деди:
   
"Министиримизниң тәшкилатимизға һейтлап келиши, түркийә җумһурийити дөлитиниң шәрқий түркистанлиқ қериндашлирини қоллап - қуввәтләйдиғанлиқиниң, һеч бир заман қериндашлирини ялғуз ташлап қоймайдиғанлиқиниң ипадиси. Қоҗасинан районлуқ һөкүмәтниң башлиқи бекир йилдиз әпәндиниң шәрқий түркистан давасини түркийидә тонутуш җәһәттики төһписи интайин чоң. Мән бу йәрдә униңға алаһидә рәһмәт ейтимән. Мән уларниң һес қилғанлирини ипадә қилиши үчүн уларни сөзгә тәклип қилимән."
   
Қәйсәри қоҗасинан районлуқ һөкүмәтниң башлиқи бәкир йилдиз әпәнди уйғурларниң һейтини мубарәкләп мундақ деди:
   
"Мән алди билән һәммиңларниң роза һейтиңларни тәбрикләймән. Бу йәрдә силәр унутмайдиған бир нәрсә бар. Җиддидә, мәдинәдә, истанбулда вә дуняниң башқа җайлирида 1960 - йилларда хитай зулмидин қечип чиққан көп санда уйғурлар бар. Улар бир мәһәллигә җайлишалмиғачқа шәрқий түркистан давасини дуня сәһнисигә елип чиқиш күчини йоқутуп қойди. Башқа дөләтләрдә яшаватқан уйғурларниң көпи җан беқишниң койиға чүшүп кетип өз давасидин узақлишип кәтти. Силәрниң бир әвзәлликиңлар бар. Дәсләптә бу йәргә 100 әтрапида аилә келип җайлашқан идиңлар, һазир бала - чақилириңлар билән қошулуп техиму көпәйдиңлар. Силәрдә бирлик вә иттипақлиқ бар, буни қоғдаш бизниң вәзипимиз. Чүнки, силәрниң бу иттипақлиқиңлардин күч - қуввәт вә милли инқилаб мәйданға кәлмәктә. Мениң билишимчә дуняниң һечқандақ йеридә силәргә охшаш шәрқий түркистан даваси үчүн давамлиқ җурнал чиқирип, шәрқий түркистан давасини давамлиқ һалда күн тәртипкә елип келиватқан башқа бир мәркәз йоқ. Шуниң үчүн силәрниң һәммиңларниң бу мәһәллидә бирликтә яшишиңлар интайин муһим. Шуңа бу иттипақлиқни бузидиған ишлардин узақ туришиңларни, һәқлиқ давайиңларни давамлиқ һалда елип беришиңларни тиләймән. Әң ахирида пүтүн дунядики вә шәрқий түркистандики уйғур қериндашлиримниң роза һейтини тәбрикләймән."
   
Кейин, түркийә енергийә вә тәбий байлиқлар министири танер йилдиз әпәнди сөз қилди. У мундақ деди:
   
"Шәрқий түркистанлиқ қериндашлирим, алди билән силәргә һөрмәт билдүрүп сөзүмни башлаймән. Роза һейтиңларға мубарәк болсун. Силәр билән бирликтә болғанлиқим үчүн интайин хурсән болғанлиқимни ипадилимәкчимән. Силәрниң мәһәлләңләргә келишимдә мундақ икки түрлүк сәвәп бар. Биринчиси силәрниң һейтиңларни тәбрикләш вә силәр билән муңдишиш. Иккинчи сәвәб болса, әтә йәни 9 - айниң 12 - күни түркийә бойичә асасий қанунниң бәзи маддилири өзгәртилсунму өзгәртилмисунму дәп рай синаш елип берилмақчи. Силәр бурунла асасий қанунниң өзгәртилишини яқилайдиғанлиқиңларни баян қилдиңлар, буниңға рәһмәт ейтиш үчүн кәлдим. Биз түркийиниң тәрәққияти үчүн қолимиздин кәлгәнни қиливатимиз, силәр билән бирликтә күчлүк бир түркийә қуруп чиқиш үчүн тиришимиз. Мән министир болуш сүпитим билән силәрниң қошқан төһпәңләр үчүн рәһмәт ейтимән."
   
Түркийә енергийә вә тәбиий байлиқлар министири танер йилдизниң нутқи ахирлашқандин кейин, биз униңға дуня уйғур қурултийи рәиси рабийә қадир ханимниң түркийигә келиш визаси һәққидә соал соридуқ.

Бизниң, "һөрмәтлик министир сиз министир болуштин бурунму уйғур мәһәллисигә келәттиңиз, министир болғандин кейинму уларни унутмидиңиз. Түркийә рәис җумһури абдуллаһ гүлму уйғурларниң өйигә келип һал сориди. Әмма рабийә қадир ханимға түркийә техиғичә виза бәрмиди, бу һәқтә бир йеңилиқ барму? " дегән соалимизға министир танер йилдиз әпәнди мундақ җаваб бәрди:
   
"Биз һәр даим уйғур қериндашлиримиз билән биллә. Биз вәзийәтниң еһтияҗиға қарап қандақ ярдәм қилишимиз керәк болса шундақ қиливатимиз. Пүтүн шәрқий түркистанлиқ қериндашлиримниң һейтини тәбрикләймән. Худадин силәрниң саламәтлик ичидә көпләп һейт вә байрам өткүзишиңларни тиләймән."

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт