Türkiyining qarari we esedning töhmetliri

Türkiye tashqi ishlar ministiri ehmed dawud'oghlu türkiye jümhuriyitining süriyide teshkillen'gen birleshme milliy komitétini étirap qilghanliqini we xelq'ara islam hemkarliq teshkilatinimu uni étirap qilishqa chaqirghanliqini élan qildi.
Ixtiyari muxbirimiz ömerjan
2012.11.16
suriye-turkiye-toqunushi-305.png Turkiye dölet erbabliri süriye-türkiye toqunushi toghrisida pikir almashturmaqta
AFP


Bu ehwal köpligen tereplerni we xelqlerni xush qilghan bolsimu, süriye re'isi beshshar el esedning oghisini qaynatqanliqi éniq. Chünki uning hedep türkiye bash ministiri erdughan'gha hujum qilishi buni ispatlaydu.

Se'udi erebistanida chiqidighan:“El weten” gézitining 2012 - yili 16 - noyabir sanida “Türkiye, süriye munasiwiti” dégen témida bir maqale élan qilin'ghan bolup maqalide mundaq dep yézilghan:

- Kéyinki waqitlarda ereb döletlirining teshwiqat wasitiliride türkiye, süriye munasiwetlirige köprek yer ayrilidighan bolup qalghan. Chünki bu ikki dölet qoshna döletler bolushtin tashqiri, otturisida eng köp sürkilish boluwatqan döletlerdur. Chünki türkyining süriye xelqining inqilabini qollighanliqi we süriyidin qéchip barghan inqilabchilargha panahliq bergenliki esed hakimiyitini bi'aram qilghan idi. Tehlilchiler beshshar el esedni “U jan achchiqida qiyniliwatqan bir nimjan adem. U etrapidiki ereb döletliri bilen ziddiyetleshkendin tashqiri, türkiye bilenmu ziddiyetliship kelmekte. Uning ottura sherqte irandin bashqa dosti yoq. U ilgiri türkiyini süriye hökümitige qarshi térrorchilarni qollidi dep eyiblep kelgen idi. Emdi hujumini türkiye xelqige emes, peqet bash ministir erdughan'ghila qaritip uni eyiblimekte.” eslide türkiyining süriyidin jénini qoghdash üchün panahliq telep qilip kelgen bichare xelq üchün quchiqini achqanliqi, aldi bilen musulmanliq qa'idisi, andin insanliq burchi idi, dep qaraydu.”

Esedning töhmetliri héchkimni ishendürelmeydu

Maqalide yene mundaq dep yézilghan:

- Süriye re'isi beshshar esed axirqi bayanatida, xuddi özide héchqandaq gunah yoqtekla, türkiye bash ministiri rejeb tayyib erdughanni qarilimaqchi bolup, “Süriyide yüz bergenlerning hemmisige erdughan sewebchi boldi, türkiye xelqide gunah yoq, hemmini qilghan erdughandur?” dédi. Xuddi ereb baharini erdughan bashlatqandek, zalimlargha xelqning qarshi chiqish heqqi yoqtek söz qildi. Tehlilchilerning qarishiche, esed eslide türkiyini özining oyunigha keltürmekchi we se'udi erebistan'gha, misirgha düshmen qilmaqchi idi. Emma uning pilani alliburun sugha chilashqan idi. Mundin bir qanche yil ilgiri süriye, türkiye munasiwitide jiddiy yéqinliq yüz berdi, hetta ikki dölet xelqi bir - birige wizisiz kirip chiqidighan bolup ketken idi. Süriyining wasitisi bilen iranmu türkiyige yéqinlashqan. Chünki iran bilen süriye ezeldin bir bolup, türkiyini özlirige tartish arqiliq uni ereblerge düshmen qilmaqchi we özliri aridin payda tapmaqchi idi. Emma ularning bu rezil pilani türklerning zéreklikidinmu yaki néme sewebtin bolmisun, berbat boldi. Shuning bilen esed türkiyidin ümidini üzdi. Andin türkiye hökümitini söküp bolsimu achchiqini chiqiriwélishni oylighan bolsa kérek.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.