Türkiye hemishe süriye xelqining teripini tutidu

Türkiye hökümiti we xelqi süriye xelqining beshshar el esed hakimiyiti teripidin tartiwatqan azab-oqubetlirini insaniy krizis dep tonup, süriye xelqining arzu-armanlirini emelge ashurush yolida ulargha yar yölek bolup kelmekte.

Türkiye hökümiti tünügün 2011-yili 29-noyabir küni süriye üchün néme kérek bolsa shuni qilishqa, hetta süriye xelqini qoghdash yolida türkiye bilen süriye otturisida alahide rayon qurushqimu hazir ikenlikini élan qildi.

Londonda chiqidighan “Ottura sherq” gézitining 2011-yili30-noyabir künidiki sanida “Türkiye süriye üchün her ishqa hazir” dégen témida bir maqale élan qilin'ghan bolup, uningda mundaq dep yézilghan:
“Türkiye hökümiti süriye xelqining hazirqi échinishliq weziyitidin bi'aram bolmaqta we süriye xelqining heq-hoquqini qoghdash yolida her ishqa hazir ikenlikini jakarlimaqta. Bu elwette teqdirleshke tégishlik ghemxorluqtur. Türkiye tashqi ishlar ministiri ehmed dawut'oghlining bayanatida, süriye hökümitining, xelqi bilen chiqiship ish körüshtin bashqa yoli yoqluqini, süriye hökümiti üchün ereb döletliri ittipaqining tekliplirini qobul qilish we süriye weziyitini onglash üchün hazirmu purset barliqini, eger süriye hökümiti xelqni qirish ishlirini dawam étiwéridiken, türkiye süriye xelqini qutquzush yolida herqandaq chare qollinishqa teyyar ikenlikini, imkanqeder herbiy yürüsh qilishtin saqlinidighanliqini ochuq jakarlidi. Türkiye hökümitining ereb döletliri ittipaqi süriyige qarshi élan qilghan jazani emeliyleshtüridighanliqi éniq. Hetta türkiyining “Hörriyet” géziti ereb döletliri ittipaqining süriyige qoyghan jazasini'eqilliq jaza dep teripligen.”

Türkiye jaza seweblik süriye xelqige ziyan yétishini xalimaydu

Mezkur maqalide yene mundaq dep yézilghan:
“Ereb döletliri ittipaqi süriye hökümitige qarshi belgiligen jazasini ötken yekshenbe küni élan qilghan bolsa, uning etisi düshenbe küni yawropa ittipaqi özining süriye hakimiyitige qaratqan mexsus jaza qararini élan qildi. Türkiye hökümiti shu künidin étibaren süriye hökümitining türkiye merkizi bankisidiki hésablirini tonglitish, süriyige satidighan tawarlarni toxtitish qatarliq resmiyetlerni bashliwetti. Shundaqtimu xelqning éhtiyaji bolghan, kündilik zörüriyet qataridiki tawarlarning süriyige kirishini tosmaydu. Bu süriye xelqini asrighanliqtin idi. Türkiye shundaqla esed we uning a'ilisining türkiye terepke seper qilishini chekleydu. Emma türkiye bilen süriye otturisida qatnaydighan yoluchi ayropilanliri sepirini dawam qilidu.”