Түркийә қанал7 телевизийисидә уйғур мәдәнийити тонуштурулди

Түркийә қанал7 телевизийиниң "дияр, дияр" программисида уйғурларниң мәдәнийәт, өрп - адәтлири вә тамақлири тонуштурулди.
Ихтиярий мухбиримиз арслан
2012-12-27
Share
turkiye-uyghur-tamaq-mediniyiti-305.png Түркийә қанал7 телевизийиниң программисиниң уйғурларниң мәдәнийәт, өрп - адәтлири вә тамақлири тонуштурулған программисидин бир көрүнүш
RFA/Arslan


Бу программиға қанал7 телевизийисиниң риясәтчиси иқбал ханим риясәтчилик қилған болуп, программиға шәрқий түркистан вәхпиниң муавин рәиси әсәр сакаханим қатарлиқ уйғур ханим - қизлар қатнашти вә уйғурларниң мәдәнийәт, өрп - адәтлири, миллий таамлири, иҗтимаий һаяти, вәтүрмүш кәчүрүш усуллирини тонуштурди.

Әсәр сака ханим, уйғур мәдәнийитини тонуштурушниң, миллий мәдәнийәтни тонуштуруш паалийити болупла қалмастин, бәлки сияси паалийәтләр үчүн асас селиш болидиғанлиқини билдүрди.

Бу программида уйғур қизлар бир қанчә парчә нахша - усул тәқдим қилди. Программа җәрянида әсәр сака ханим, қанал7 телевизийә риясәтчисиниң уйғурлар тоғрисида сориған соаллириға җаваб бәрди.

Уйғур аяллар йәнә уйғур тамақлирини тонуштуруп, полу вә мантиниң қандақ тәйярлинидиғанлиқи вә қандақ пишурулидиғанлиқи тоғрисида нәқ мәйданда әмәлий мисал көрситип тонуштурди.

Бу программа нәқ мәйдандин бивастә тарқитилди. Биз қанал7 телевизийисидә тарқитилған бу программа тоғрисида шәрқий түркистан вәхпиниң муавин рәиси әсәр сакаханим билән сөһбәт елип бардуқ.

Соал: һөрмәтлик әсәр сака ханим, қанал7 телевизийә программида уйғурларға алақидар немиләр аңлитилди? немиләр көрситилди? программа қандақ өтти? алди билән бу һәқтә бизгә сөзләп бәргән болсиңиз?

Җаваб: түркийидә қанал7 телевизийә программисиға қатнаштуқ вә дияр, дияр дегән программида уйғурларниң мәдәнийәт, өрп - адәт вә тамақлирини тонуштурдуқ. Қанал7 телевизийиниң дияр, дияр программиси түркийидә көплигән кишиләр қизиқип көридиған программа болғанлиқи үчүн, биз бу программиға қатнишиш тәклипини қобул қилдуқ. Бизниң шәрқий түркистан вәхпиниң хизмәт саһәлириниң муһим бир қисми тәлим - тәрбийә вә иҗтимаий, мәдәнийәт саһәләрдә хизмәт - паалийәт қилиштин ибарәт болуп, биз бу хил телевизийә программиларға қатнишиш арқилиқ, уйғурларниң миллий мәдәнийәт, өрп - адәтлирини аңлитиш арқилиқ кишиләргә шәрқий түркистан вә уйғур хәлқини һәр саһәдә тонутуш үчүн тиришип келиватимиз. Биз бу қетимқи программида уйғурларниң муһим бир милләт икәнликини аңлитиш билән биргә, уйғурлар ким, қәйәрдә яшайду, өрп - адәтлири қандақ, йемәк - ичмәклири вә чалғу - әсваблири, нахша - усул сәнәтлирини әмәлий көрситиш арқилиқ уйғурларни тонуштурған болдуқ.

Соал: һөрмәтлик әсәр сака ханим, сизниңчә, бу хил телевизийә программилар уйғурлар үчүн қандақ бир әһмийәткә игә?

Җаваб: мән буниңдин илгириму бир қанчә қетим бу хил телевизийә программиларға қатнаштим. Чәтәлләрдә яшаватқан уйғурларниң чәтәл һаятида өз мәдәнийәт, өрп - адәтлирини сақлап қелиши үчүн буларни яшларға өгитиш интайин муһим. Чәтәлләрдә яшаватқан уйғурлар, өз миллий мәдәнийитини сақлап қелиш билән биргә, чәтәлликләргиму тонуштуруш интайин муһим. Чүнки чәтәлләрдә биз уйғур хәлқини қанчилик яхши тонуштуралисақ, уйғур хәлқи ким, шәрқий түркситан қәйәрдә, булар қандақ қийинчилиқларға дүч келиватиду дегән мәсилиләр уларни ойландурушқа түрткә болиду. Бу пәқәт мәдәнийәт паалийәтләрни тонуштуруш болупла қалмастин, бәлки сияси паалийәтләр үчүн асас салғанлиқ болиду, дәп қараймән.

Соал: шәрқий түркистан вәхпи уйғур мәдәнийитини тонуштуруш үчүн паалийәт қилип келиватиду, буниңдин кейин йәнә қандақ хизмәтләрни қилмақчи?

Җаваб: биз бу хил паалийәтләрни давамлиқ қиливатимиз, әмма бу йетәрлик әмәс дәп қараймән, шуниң үчүн йеңи - йеңи пиланларни оттуриға қоюп әмәлийләштүрүшимиз керәк болиду. Биз шәрқий түркистан вәхпи болуш сүпитимиз билән 2013 - йили уйғур хәлқиниң мәдәнийитини асас қилған чоң бир пилан - лайиһә түзүш үчүн тәйярлиқ қиливатимиз, бу пилан - лайиһә пүткәндин кейин уни түркийә баш министирлиқиға сунимиз. Алдимиздики йилда яхши хизмәтләр елип берилиду вә хәлқимиз үчүн пайдилиқ ишлар оттуриға чиқиду дәп ойлаймән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт