Türkiye qanal7 téléwiziyiside Uyghur medeniyiti tonushturuldi

Türkiye qanal7 téléwiziyining "Diyar, diyar" programmisida Uyghurlarning medeniyet, örp - adetliri we tamaqliri tonushturuldi.
Ixtiyariy muxbirimiz arslan
2012-12-27
Share
turkiye-uyghur-tamaq-mediniyiti-305.png Türkiye qanal7 téléwiziyining programmisining Uyghurlarning medeniyet, örp - adetliri we tamaqliri tonushturulghan programmisidin bir körünüsh
RFA/Arslan


Bu programmigha qanal7 téléwiziyisining riyasetchisi iqbal xanim riyasetchilik qilghan bolup, programmigha sherqiy türkistan wexpining mu'awin re'isi eser sakaxanim qatarliq Uyghur xanim - qizlar qatnashti we Uyghurlarning medeniyet, örp - adetliri, milliy ta'amliri, ijtima'iy hayati, wetürmüsh kechürüsh usullirini tonushturdi.

Eser saka xanim, Uyghur medeniyitini tonushturushning, milliy medeniyetni tonushturush pa'aliyiti bolupla qalmastin, belki siyasi pa'aliyetler üchün asas sélish bolidighanliqini bildürdi.

Bu programmida Uyghur qizlar bir qanche parche naxsha - usul teqdim qildi. Programma jeryanida eser saka xanim, qanal7 téléwiziye riyasetchisining Uyghurlar toghrisida sorighan so'allirigha jawab berdi.

Uyghur ayallar yene Uyghur tamaqlirini tonushturup, polu we mantining qandaq teyyarlinidighanliqi we qandaq pishurulidighanliqi toghrisida neq meydanda emeliy misal körsitip tonushturdi.

Bu programma neq meydandin biwaste tarqitildi. Biz qanal7 téléwiziyiside tarqitilghan bu programma toghrisida sherqiy türkistan wexpining mu'awin re'isi eser sakaxanim bilen söhbet élip barduq.

So'al: hörmetlik eser saka xanim, qanal7 téléwiziye programmida Uyghurlargha alaqidar némiler anglitildi? némiler körsitildi? programma qandaq ötti? aldi bilen bu heqte bizge sözlep bergen bolsingiz?

Jawab: türkiyide qanal7 téléwiziye programmisigha qatnashtuq we diyar, diyar dégen programmida Uyghurlarning medeniyet, örp - adet we tamaqlirini tonushturduq. Qanal7 téléwiziyining diyar, diyar programmisi türkiyide köpligen kishiler qiziqip köridighan programma bolghanliqi üchün, biz bu programmigha qatnishish teklipini qobul qilduq. Bizning sherqiy türkistan wexpining xizmet sahelirining muhim bir qismi telim - terbiye we ijtima'iy, medeniyet sahelerde xizmet - pa'aliyet qilishtin ibaret bolup, biz bu xil téléwiziye programmilargha qatnishish arqiliq, Uyghurlarning milliy medeniyet, örp - adetlirini anglitish arqiliq kishilerge sherqiy türkistan we Uyghur xelqini her sahede tonutush üchün tiriship kéliwatimiz. Biz bu qétimqi programmida Uyghurlarning muhim bir millet ikenlikini anglitish bilen birge, Uyghurlar kim, qeyerde yashaydu, örp - adetliri qandaq, yémek - ichmekliri we chalghu - eswabliri, naxsha - usul sen'etlirini emeliy körsitish arqiliq Uyghurlarni tonushturghan bolduq.

So'al: hörmetlik eser saka xanim, sizningche, bu xil téléwiziye programmilar Uyghurlar üchün qandaq bir ehmiyetke ige?

Jawab: men buningdin ilgirimu bir qanche qétim bu xil téléwiziye programmilargha qatnashtim. Chet'ellerde yashawatqan Uyghurlarning chet'el hayatida öz medeniyet, örp - adetlirini saqlap qélishi üchün bularni yashlargha ögitish intayin muhim. Chet'ellerde yashawatqan Uyghurlar, öz milliy medeniyitini saqlap qélish bilen birge, chet'elliklergimu tonushturush intayin muhim. Chünki chet'ellerde biz Uyghur xelqini qanchilik yaxshi tonushturalisaq, Uyghur xelqi kim, sherqiy türksitan qeyerde, bular qandaq qiyinchiliqlargha düch kéliwatidu dégen mesililer ularni oylandurushqa türtke bolidu. Bu peqet medeniyet pa'aliyetlerni tonushturush bolupla qalmastin, belki siyasi pa'aliyetler üchün asas salghanliq bolidu, dep qaraymen.

So'al: sherqiy türkistan wexpi Uyghur medeniyitini tonushturush üchün pa'aliyet qilip kéliwatidu, buningdin kéyin yene qandaq xizmetlerni qilmaqchi?

Jawab: biz bu xil pa'aliyetlerni dawamliq qiliwatimiz, emma bu yéterlik emes dep qaraymen, shuning üchün yéngi - yéngi pilanlarni otturigha qoyup emeliyleshtürüshimiz kérek bolidu. Biz sherqiy türkistan wexpi bolush süpitimiz bilen 2013 - yili Uyghur xelqining medeniyitini asas qilghan chong bir pilan - layihe tüzüsh üchün teyyarliq qiliwatimiz, bu pilan - layihe pütkendin kéyin uni türkiye bash ministirliqigha sunimiz. Aldimizdiki yilda yaxshi xizmetler élip bérilidu we xelqimiz üchün paydiliq ishlar otturigha chiqidu dep oylaymen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet