Türkiye re'is jumhuri abdullah gül xitay wekili dey binggoni qobul qildi

Süret, istanbulda chaqirilghan asiya bixeterlik hemkarliqi we öz - ara ishench turghuzush teshkilati (CICA) ning aliy derijilik yighinigha kelgen xitay wekili dey binggoni türkiye dölet reisi abdulla gül qobul qiliwatqan körünüsh.

Türkiye re'is jumhuri abdullah gül dey binggoni qobul qilghanda muxbirlargha bayanat bérip, ötken yili xitaygha élip barghan ziyaritide xu jintaw bilen uchriship, ikki dölet otturisidiki munasiwetni tereqqiy qildurush jehette pikir birliki hasil qilghanliqi we ularni emelge ashurghanliqidin xursen bolghanliqini éytqan.

Abdullah gül yene türkiyining xitaygha qiliwatqan éksport miqdarining téz éshiwatqanliqi, özlirining asiyada tesiri küchke ige xitay bilen bolghan munasiwitini tereqqiy qildurushqa ehmiyet bériwatqanliqini bildürgen.

Kéyin dey binggo söz qilip türkiyidiki insaniy yardem wexpi uyushturghan ghezzege qutquzush boyumliri yetküzüsh pa'aliyiti jeryanida, isra'iliye herbiy xadimlirining yardem yetküzüsh paraxotlirigha hujum qilishi bilen 9 türkni öltürgenlikini eyibleydighanliqini bildürgen.

Dey binggu'o xitay dölitining türkiye bilen bolghan munasiwetni tereqqiy qildurushqa alahide ehmiyet bériwatqanliqini éytqan.

Xewerlerge qarighanda bu qétimqi uchrishishta xitay terep nuqtiliq halda siyasiy teleplerni otturigha qoyghan bolsa, türkiye terep nuqtiliq halda ikki dölet otturisidiki soda munasiwetlirini tereqqiy qildurush kéreklikini tekitligen.

Asiya bixeterlik hemkarliqi we öz - ara ishench turghuzush teshkilati (CICA) ning aliy derijilik yighinida xitay dölet re'isi xu jintawgha wakaliten söz qilghan dey binggu'o sözide asiya rayonining hazir xewpsizlik jehettin misli körülmigen purset we nurghun xewplerge duch kelgenlikini tekitligen. Dey sözide xitayning bixeterliki we muqimliqining asiyadiki tereqqiyat we muqimliq bilen munasiwetlik ikenlikini eskertken. U sözining axirida xitay dölitining derijidin tashqiri chong dölet bolushning koyida emeslikini bildürgen.

Dey binggoning abdulla gül bilen bolghan uchrishishining sewebliri we ehmiyiti heqqide doktor erkin ekrem öz köz qarashlirini otturigha qoydi.

Yuqiridiki awaz ulinishidin, bu heqtiki melumatimizning tepsilatini anglaysiler.