Türkiye bilen xitay diniy sahede hemkarlishish toxtamnamisi tüzdi

Türkiye diniy ishlar idarisi bashliqi proféssor doktor mehmet görmez ependi xitayda élip bériwatqan resmiy ziyariti jeryanida xitay bilen diniy sahede hemkarlishish toxtamnamisi tüzgen.
Ixtiyariy muxbirimiz erkin tarim
2011.06.24
turkiye-bilen-xitay-toxtamname-tuzdi-305.jpg Türkiye bilen xitay diniy sahede hemkarlishish toxtamnamisi tüzdi. 2011-Yili iyun.
diyanet.gov.tr

40 Yildin buyan tunji qétim türkiye diniy ishlar idarisining bashliqi xitayda ziyaret élip barmaqta.

Türkiye diniy ishlar idarisining tor bétide élan qilin'ghan xewerge qarighanda, türkiye bilen xitay otturisidiki bu toxtamnamide ikki dölet otturisida diniy terbiye, diniy xizmetler, diniy neshriyatchiliq we hej ishliri jehettin hemkarlishish qarar qilin'ghan.

Bu toxtamname boyiche, xitaydin her yili türkiyidiki imam xatip toluq ottura mektepliride, uniwérsitétlardiki islam fakultétlirida oqush üchün oqughuchi ewetilidiken. Bu oqughuchilarning pütün oqush rasxotini türkiye diyanet wexpi kötüridiken. 14 Maddidin terkib tapqan mezkur toxtamname boyiche xitaydiki 40 ming meschitning 50 ming imami nöwet bilen türkiyige kélip bilim ashuridiken.

xitay-islam-jemiyiti-bashliqi-we-turk-dini-ishlar-bashliqi-385.jpg
Xitay islam jem'iyiti bashliqi we türk dini ishlar bashliqi proféssor doktor mehmet görmez ependi. 2011-Yili iyun.
diyanet.gov.tr

Türkiye diniy ishlar idarisi bilen xitay diniy ishlar idarisining otturisida tüzülgen bu toxtamnamide, qur'ani kerim, hedis qatarliq diniy eserlerni xitaychigha terjime qilip neshr qildurush, türkiye bilen xitay 2012-yili béyjingda, 2013-yili istanbulda ortaq diniy yermenke we ilmiy muhakime yighinliri ötküzüsh qarar qilin'ghan.

Türkiye diniy ishlar idarisi tor bétidiki xewerde körsitilishiche, türkiye bilen xitay otturisida tüzülgen 14 maddiliq bu toxtamname yéqinqi yillardin béri küchiyiwatqan türkiye xitay munasiwitide achquchluq rol oynaydiken.

Toxtanamigha qol qoyush murasimigha türkiye diniy ishlar idarisi bashliqi proféssor doktor mehmet görmez, xitay diniy ishlar idarisining bashliqi wang zowen qatarliq kishilerdin bashqa türkiyining béyjingda turushluq bash elchisi murat sélim esenli, türkiye diniy ishlar idarisi tashqi munasiwetler müdüri proféssor doktor memet pachachi, xitay islam jem'iyiti bashliqi gu'ang yüen qatarliq kishilermu qatnashqan.

Türkiye diniy ishler idarisi mudiri prof. Dr. Mehmet görmez ependi hazir ningshya tunggan aptonom rayonini ziyaret qiliwatqan bolup, bu ziyaritini axirlashturghandin kéyin 6-ayning 25-küni türkiyige qaytip kélidiken.

5-Iyul ürümchi weqeside türkiye bash ministiri rejep tayyip erdoghanning xitayni eyiblishi, kéyin istanbul chaghlayan meydanida 10 minglarche insanning namayish ötküzüp xitayni eyiblishidin kéyin xitay hökümiti aktip halda türkiye bilen bolghan munasiwitini kücheytishke tirishmaqta. Bolupmu türkiye xitay bilen 1971-yili diplomatiyilik munasiwet ornatqandin kéyin tunji qétim türkiye diniy ishlar idarisi bashliqining xitayni ziyaret qilishi buning eng muhim ispati bolsa kérek.

Türkiye bilen xitay arisidiki bu toxtamnamigha türkiyidiki Uyghur din tetqiqatchiliri qandaq qaraydu? bu hemkarliqning Uyghurlargha qandaq paydisi bolar?

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.