Türkiye xitay shirketlirini yermenkige qatnashturmasliqni qarar qildi

Jem'iy 700 etrapida shirket qatnishidighan toqumichiliq malliri yermenkisi échilidighan istanbul xelq'ara yermenke zalining 5-nomurluq bölümi xitaylar üchün tesis qilin'ghandin kéyin, bu yermenkini uyushturghan türkiye toqumichiliq karxanichiliri jem'iyitige eza shirketler xitay shirketlirining qatnishishigha qattiq naraziliq bildürgen.

Toqumichiliq karxanichilirining bésimi bilen bu yermenkige sahibxaniliq qiliwatqan shirketlerdin biri bolghan istanbul yermenke xizmetliri shirkiti xitay shirketlirini yermenkige qatnashturmasliq heqqide qarar chiqarghan. Emma xitay shirketliri bu yermenkige qatnishish üchün burunla toxtamname tüzgen bolghachqa, sotqa erz qilidighanliqini éytip naraziliq bildürgen, shundaqla xitayning istanbulda turushluq konsulxanisimu bu ishqa arilashqan.

Bu yermenkini uyushturghan k n r shirketler guruhining mudiri jeyda erem xanim bu heqte bügün xewer türk téléwiziyisige bergen bayanatida “Biz ötken yili 8-ayning 24-küni xitay shirketliri bilen toxtamname tüzüp, yermenke achidighan bölümlerni ulargha ijarige bergen iduq. Türk shirketliri xitay shirketlirining bu yermenkige qatnishidighanliqini anglap qattiq naraziliq bildürüshti” dédi. Jeyda erem xanim sözide yene, “Türk toqumichiliq shirketliri shangxeyde yermenkilerge qatnishiwatidu, xitay heqiqitini körüshimiz lazim, xitay shirketlirini yermenkilerdin qoghlap chiqirish xitay xewpini hel qilalmaydu. Bundaq qilip xitayni qachan'ghiche tosuwalalaymiz?” dédi.

Türklerning xitay shirketlirige bundaq naraziliq bildürüshidiki seweb néme? xitay shirketlirini yermenkidin qoghlap chiqirish arqiliq xitay mallirining türkiyige kirishini tosuwalghili bolamdu? bu xil jédeller türkiye xitay munasiwitige qandaq tesir körsiter? bu heqte köz qarishini élish üchün toqumichiliq buyumliri tijariti bilen shughulliniwatqan abduréshit abdulxemit we türk-xitay munasiwetliri mutexessisi dr. Erkin ekremler bilen söhbet élip barduq.