Uyghur rayonida "Jungxu'a xelq jumhuriyitining tuyuqsiz weqelerge taqabil turush qanunini yolgha qoyush charisi" ijra qilinishqa bashlidi

Uyghur aptonom rayoni "Jungxu'a xelq jumhuriyitining tuyuqsiz weqelerge taqabil turush qanunini yolgha qoyush charisi" ni 1-awghusttin bashlap resmiy yolgha qoyushni qararlashturdi.
Muxbirimiz irade
2012-07-31
Élxet
Pikir
Share
Print
Xitay qoralliq küchliri xitay dölet bayrimi harpisida térrorluqqa qarshi manéwir élip bardi. 2010-Yili 30-séntebir, ürümchi.
Xitay qoralliq küchliri xitay dölet bayrimi harpisida térrorluqqa qarshi manéwir élip bardi. 2010-Yili 30-séntebir, ürümchi.
AFP

"Shinjang Uyghur aptonom rayonining, jungxu'a xelq jumhuriyitining tasadipiy weqelerge taqabil turush qanunini yolgha qoyush charisi" aptonom rayonluq 11-nöwetlik xelq qurultiyi da'imiy komitétining 36-qétimliq yighinida qarap chiqip maqullan'ghan idi. Mezkur chare tasadipiy weqelerge taqabil turush qanunini Uyghur élining emeliy ehwaligha qarap turup emeliyleshtürüshni nishan qilghan halda békitip chiqilghan bolup, eyni chaghda bu qarar élan qilin'ghandila közetküchiler we axbarat sahelirining qattiq diqqitini qozghighan idi.

Chünki, bu charide kishilerning eng asasiy hoquqlirini depsende qilidighan we shuninggha yol achidighan nurghun ziddiyetlik maddilar bar. Mesilen, yolgha qoyush chariside döletning bixeterliki we ammining menpe'itige ziyan yetküzidighan, puqralarning jismaniy we maddiy bixeterlikige ziyanliq ammiwi xaraktérdiki weqeler we térrorluq, zorawanliq weqeliri yüz berse jama'et xewpsizlik organlirining neq meydandiki weziyetke asasen qattiq chare qollinishi, weqeni aldin-ala we téz sürette bir terep qilishi küchke ige qilin'ghan.

Mezkur chare bu yil mayda élan qilin'ghanda istratégiye tetqiqatchisi doktor erkin ekrem xitay da'irilirining Uyghur élidiki musteqilliq heriketlirining aldini élish, muqimliqni saqlap, öz hakimiyitini saqlap qélish üchün mushundaq bir charini belgilep chiqqanliqini bildürgen idi.

Bu charining mezmunidin qarighanda, buningdin kéyin Uyghur élidiki nahiyidin yuqiri derijilik orunlarda mexsus tuyuqsiz weqelerni bir terep qilish qomandanliq shtabi qurulidighan bolup, Uyghur élidiki her derijilik organlar buningdin kéyin herqandaq jiddiy weqe yüz bergende "Jiddiy weqelerni bir terep qilish qomandanliq shtabi" ning buyruqigha birdek boysunidiken.

Mesilen, charining birinchi babi 5-maddisida mundaq déyilgen:
-Nahiyidin yuqiri derijilik organlar mexsus jiddiy ishlarni bashqurush rehberlik apparati we türlük mexsus qomandanliq shtablirini qurup chiqidu. Qomandanliq rehberlik apparatliri shu memuri rayondiki xelq hökümitining rehbiri xadimliri we shundaqla shu yerde turushluq xelq azadliq armiyisi, qoralliq qisimning mes'ul xadimliridin terkib tapidu.

Yuqiridiki jiddiy ishlarni bashqurush rehberlik apparati we türlük mexsus qomandanliq shtablirining jiddiy ishlarni bashqurush xizmiti teshkiliy sistémisini nahiye-sheher, yéza-bazar hökümetlirige, kocha ish bashqarmiliridin, mehelle-kent komitétlirighiche, mehellilerge, ijtima'iy teshkilat, mektep we karxana-kespiy orunlarghiche kéngeytkenning sirtida, kündilik bashqurush xizmiti, weqe tughulushi éhtimalliqi bolghan rayon, orunlar, shexslerni közitishmu chingitilidighan bolup, bu heqte charining 2-babi 15 maddisida-adem jiq yighilghan jaylarda, weziyiti murekkep, sezgür rayonlarda, asasliq nishan rayonlar we oxshimighan shara'itlarda jiddiy ishlarni bir terep qilish sistémisini ornitish, jiddiy ishlarni bir terep qilish iqtidarini ashurush kérek, dep körsitilgen.

Uyghur élide herqandaq bir naraziliq herikiti yüz berse, saqchi organliri weqeni derhal térrorluq bilen baghlap, u kishilerni neq meydanda étip öltürüsh arqiliq bir terep qilip kéliwatqan idi. Bu aptonom rayon rehberlirining "Xewpni uwisidila ujuqturush" deydighan yolyoruqigha bina'en yürgüzülüwatqan bolup, weqeni jayidila tunjuqturuwétish, shu waqitning özidila bir terep qiliwétishni eng asasiy xizmet prinsipi qilip kelmekte. Bu chare mana bu xil xizmet prinsipini qanuniy asasqa ige qilidighan bolup, charining 5 ‏-babi 43-maddisida "Türlük layihini waqtida qozghitip, türlük tasadipiy jama'et weqelirini del waqtida birterep qilish, tedbirni toghra belgilep, ikkilemchi we yéngi bir hadisidin saqlinish, tasadipiy jama'et weqeliri bir terep qilinip bolun'ghandin kéyin xulasilesh" dep belgilen'gen.

"Emeliyleshtürüsh charisi" de yene jiddiy weqelerning yüz bérishi we tereqqiyati hemde bularni bir terep qilish xizmiti heqqide saxta uchur tarqatqan orun we shexslerni jazalash, yolgha qoyush charisini emeliyleshtürmigen orun we shexslerni qandaq jazalash heqqidiki bir qatar maddilar békitilgen.

Bu yolgha qoyush charisi 8-ayning birinchi künidin étibaren Uyghur aptonom rayon miqyasida ijra qilinishqa bashlinidighan bolup, Uyghur rayon da'iriliri 30-iyul küni bu heqte axbarat élan qilish yighini achqan. Aptonom rayonluq xelq qurultiyi da'imiy komitétining mudiri erkin imirbaqi yighinda qilghan sözide, yolgha qoyush charisining élan qilinip yolgha qoyulushi shinjangning halqima tereqqiyati we uzaq eminlikini ilgiri sürüshtiki muhim tedbir shundaqla aptonom rayonning inaq jem'iyet berpa qilish qurulushi, xelqning hayati, mal-mülük bixeterliki, ijtima'iy inaqliq, muqimliqni qoghdashta muhim türtkilik rol oynaydu, dep körsetken.

Emma, chet'ellerdiki közetküchiler bolsa, yuqiridiki qattiq qol charining Uyghur élidiki weziyetni téximu ötkürleshtürüp, sotsiz ölüm weqelirini téximu köpeytiwétidighanliqini bildürmekte.

Toluq bet