Alim séyitof : 2012 - yili Uyghurlarning siyasiy pa'aliyetliri üchün yaxshi bir yil boldi

Alim séyitof ependi 2012 - yilining Uyghur milliy dawasi üchün yene bir parlaq yil bolghanliqini bildürdi. Töwende muxbirimiz irade teyyarlighan programma diqqitinglarda bolsun.

Chet'ellerdiki Uyghur teshkilatliri Uyghur milliy herikiti rehbiri rabiye qadir xanimning yétekchilikide Uyghurlarning siyasiy hoquqlirini qolgha keltürüsh üchün élip bériwatqan kürishini bir künmu toxtitip qoymay dawamlashturmaqta. Meyli dunya Uyghur qurultiyi bolsun, meyli herqaysi döletlerde qurulghan ammiwi teshkilat, jem'iyetler bolsun türlük pa'aliyetler arqiliq Uyghurlarning milliy dawasining téximu keng tonulushi, téximu zoriyishi üchün özining tégishlik hessisini qoshup, Uyghur milliy dawasini algha sürdi. Rabiye qadir xanim bu yilmu oxshashla özining dunya Uyghur qurultiyidiki sepdashliri bilen birge nurghun döletlerni ziyaret qilip, bu döletlerdiki bezi parlamént ezaliri, kishilik hoquq organlirining alaqidar mes'ulliri hem shundaqla u ellerdiki Uyghur jama'etchiliki bilen bir qatar muhim uchrishi'ishlarni élip bardi.

Yawrupa, amérika, awstraliye qatarliq döletlerde Uyghurlarning weziyiti heqqide guwahliq bérish yighinliri ötküzüldi. Yawrupa parlaméntida yene “Xitayning sherqiy türkistandiki yadro siniqi we uning tesiri” namliq muhakime yighini ötküzüldi. 23 - Aprél yaponiye parlaméntida “Uyghur dostluq guruppisi” resmiy quruldi. Birleshken döletler teshkilati kishilik hoquq kéngishining jenwediki yighinida d u q wekilliri Uyghurlarning weziyitini otturigha qoydi.... Yeni mushuninggha oxshaydighan Uyghurlarning siyasi weziyitige alaqidar yéngi - yéngi küntertipler toxtimay meydan'gha kélip turdi. Elwette bu yerde waqit munasiwiti bilen bu pa'aliyetlerning hemmisini bir - birlep tilgha élip ötüsh mumkin emes. Emma bu heqte, bizning ziyaritimizni qobul qilghan alim séyitof ependi chet'ellerdiki siyasiy pa'aliyetlerge nezer tashlighanda, bu yil ichide eslep ötüshke tégishlik ikki chong ishning barliqini bildürdi.

Dunya Uyghur qurultiyining 4 - nöwetlik omumiy yighini we Uyghur rehberlirini terbiyilesh kursi xitayning qattiq qarshiliq bildürüshige qarimay 14 - may küni yaponiyining paytexti tokyoda daghdughiliq bashlan'ghan. 18 Dölettin kelgen 120 din artuq wekil jem'iy bir hepte boyiche asiyadiki démokratiye ülgisi bolghan bu dölette jem bolup, Uyghurlarning siyasiy weziyitige alaqidar muhim qararlarni alghan idi. Qurultayning 3 - künide élip bérilghan saylam netijiside rabiye qadir xanim toluq awaz bilen qaytidin d u q re'islikige saylandi.

Amérika Uyghur birleshmisining 7 - nöwetlik omumiy saylimi bolsa 11 - ayning 10 - küni washin'gtonda ötküzülgen. Saylamda özini tizimlatqan 90 din artuq ademning erkin bélet tashlishi bilen amérika Uyghurliri birleshmisining prézidénti we idare hey'itining ezaliri saylap chiqildi. Netijide alim séyitof qaytidin prézidéntliqqa saylandi. Bashqa 6 kishi amérika Uyghurliri birleshmisi idare hey'itining ezaliqigha saylandi. Bu küni kaliforniyidimu pa'aliyet ötküzülüp, bélet tashlan'ghan. Rabiye qadir xanim bolsa, amérika Uyghurliri birleshmisining pexriy re'islikige saylan'ghan idi. Alim séyitof ependi bu xil démokratik saylamlarning démokratiyidin mehrum halda yashawatqan Uyghurlar üchün ehmiyitining zorliqini tekitlidi.

Alim séyitof ependi sözining dawamida, 2012 - yilining Uyghur siyasiy heriketliri jehettin beriketlik bir yil bolghanliqini bildürüsh birge, Uyghur siyasiy herikitining kelgüsige ümid bilen qarash kéreklikini bildürdi.