Таҗикистандики түркийә әлчиханиси 3 уйғурниң әһвалини йеқиндин сүрүштә қиливатқанлиқини билдүрди

Мухбиримиз бүгүн бу мунасивәт билән таҗикистандики түркийә әлчиханисиға телефон қилип, 3 уйғурниң әһвали һәққидә мәлумат сориди. Әлчихана баянатчиси мустафа түркәл йилмаз, вәқәни йеқиндин сүрүштә қиливатқанлиқини, әмма таҗикистанниң техичә вәқә һәққидә җаваб қайтурмиғанлиқини билдүрүп мундақ деди:

Биз бу вәқәдин 9-январ күни хәвәр таптуқ; шу күндин башлап, әлчиханимиз таҗикистан ташқи министирлиқидин мәлумат тәләп қилди. Бизниң түркийә ташқи ишлар министирлиқимизму, түркийидики таҗикистан әлчиханисидин мәлумат тәләп қилди. Әмма, һазирғичә һечқандақ бир җавабқа еришмидуқ. Биз бу һәқтә җаваб елиш үчүн 10 күндин бери изчил һалда һәрикәт қиливатимиз. 

Мустафа түркәл йилмаз мәсилини түрк вәтәндашлириниң бихәтәрлик мәсилиси дәп қарайдиғанлиқини, әмма таҗикистан тәрәптин ениқ бир җаваб алмай туруп вәқә үстидә пикир баян қилмайдиғанлиқини һәм вәқәни сүрүштә қилишни тохтатмайдиғанлиқини билдүрди. Биз баянатчидин вәқә сәвәблик таҗикистандики хитай әлчиханиси билән көрүшкән яки көрүшмигәнликини сориғинимизда, у "һазирқи басқучта, сүрүштә қилиш обйектимиз, таҗикистан ташқи ишлар министирлиқи" дәп җаваб бәрди.

Түркийидики таҗикистан әлчиханисиға телефон қилғинимизда, әлчиханидики нөвәтчи хадим, алақидар мәсул хадимларниң нөвәттә иш орнида йоқлуқини, өзиниң вәқәдин ахбарат арқилиқ хәвәр тапқанлиқини һәм әлчиханиниң бу түр мәсилиләргә телефон арқилиқ җаваб берәлмәйдиғанлиқини билдүрди.

Түркийидики шәрқи түркистан маарип вә һәмкарлиқ җәмийитиниң мәсули оғузхан, түнүгүн түрк телевизийисидә қилған сөзидә, мәсилә ялғуз 3 уйғурниң мәсилиси әмәсликини, оттура асия вә шәрқий җәнуби асиядики дөләтләрдиму, уйғур муһаҗирларниң охшаш мәсилигә дуч келиватқанлиқини билдүрүп, түркийә һөкүмитини бу тоғрида җиддий һәрикәт қилишқа чақирди. Оғузхан йәнә, түркийә һөкүмитиниң уйғур мәсилисигә мәлум мәзгиллик яки вәқә чиққан чағдила әмәс, давамлиқ түрдә арилишишни, хитай билән сода вә дипломатик келишимләрни түзгәндә бу хил пурсәтләрни қачурмаслиқини тәләп қилди.

Оғузхан сөзидә ислам дөләтлириниму, шәрқи түркистан мәсилисигиму худди пәләстин, чечән вә кәшмир мәсилисигә көңүл бөлгәндәк көңүл бөлүшкә чақирди.

Түркийидики истратегийә мутәхәссиси әркин әкрәм, таҗикистан билән хитай арисидики мунасивәтниң йеқинқи тәрәққиятини тилға елип, бу 3 уйғурниң тәқдириниң һәқиқәтән әндишә қилишқа тегишлик икәнликини билдүрди.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар