18-Qurultay aldida jow yunkang “Üch xil küchlerning yiltizini qomurush” ni telep qildi

Xitayda 18-qurultay échilishqa az qalghan bir mezgilde jow yunkangning otturigha chiqip, Uyghur élide menggülük eminlikni ornitishni nahayitimu qattiq teleppuz bilen tekitlishi némining ipadisi? közetküchiler, bu nöwetlik qurultaydiki rehberlik özgirishidin peyda bolghan sezgür bir weziyet tüpeyli, xitay da'irilirining muqimliqtin, bolupmu Uyghur élining muqimliqidin endishe qiliwatqanliqini bildürdi.

23-Öktebir küni xitay siyasiy byurosining bashliqi jow yunkang béyjingda shinjanggha alaqidar xizmetlerni orunlashturush yighini achqan. Shinxu'aning bu heqte tarqatqan xewiridin qarighanda, bu yighin'gha Uyghur rayonluq hökümet, shinjangdiki ishlepchiqirish -qurulush armiyisi, ma'arip ministirliqi, emgekchiler we ijtima'iy parawanliq ministirliqi, jama'et xewpsizlik ministirliqi, merkizi birliksep, teshwiqat ministirliqi we shundaqla béyjing, tyenjin, shenshi, shangxey, jyangsu qatarliq Uyghur élige yardem bériwatqanliqi ilgiri sürülüwatqan ölkilerning hemde néfit, éléktr shirketlirining alaqidar mes'ul xadimliri qatnashqan.

Jow yunkang yighinda qilghan sözide, Uyghur élining muqimliq mesilisini qayta tekitlep, “Üch xil küchler” ni yiltizidin qomurup tashlash dégen ibarini ishletken. U shinjang xizmiti yighini échilghandin buyan Uyghur élining iqtisadiy we xelq turmushida misli körülmigen tereqqiyatning meydan'gha kelgenlikini ilgiri sürüp, “Nahayiti qéyin qolgha kelgen bu weziyetni qoghdap, Uyghur élide menggülük eminlikni berpa qilish üchün, idiyide birlikke kélishni, ikki qolda tutup, her ikkila qol qattiq bolushni, 19 ölkining shinjanggha “Yardem bérish” xizmitini dawam qildurushni, asasiy küchni yézilargha we kocha -koylargha qaritip, üch xil küchlerning yiltizini qomurup tashlap, mesilini menbedin, yiltizidin hel qilish” ni telep qilghan.

Xitayda 18-qurultay échilish aldida turghan bir mezgilde jow yunkangning tuyuqsiz otturigha chiqip, Uyghur éli muqimliqini tekitlishining sewebi néme idi? türkiyidiki istratégiye mutexessisi doktor erkin ekrem ependining qarishiche, xitayda herqandaq bir chong yighin échilishtin burun muqimliqni tekitlesh xitay kompartiyisining bir en'enisi bolsimu, emma bu qétimliq 18-qurultayda hoquqni alidighan rehberlerni saylap chiqish jeryani bir qeder murekkep bolghanliqtin, xitay hökümitining bolupmu Uyghur rayonigha oxshash sezgür rayonlarning muqimliqigha jiddiy qarawatqanliqini bildürdi.

Derweqe, jow yunkang yighindiki sözide, hazirqi qolgha keltürgen netijiler yuqiridin-töwen'giche hemmimizning bir nishan, bir meqset boyiche ittipaqlishishimiz we öz ‏-ara hemkarlishishimiz netijiside qolgha kelgen. Bundin kéyinmu yoldashlarning merkizi hökümetning yétekchilikide zich ittipaqlishishini ümid qilimen, dégen. Jow yunkangning bu sözlirimu bu yighinning 18-qurultay aldidiki bir nöwetlik meydan mustehkemleshni meqset qilidighanliqini körsitip turmaqta. Erkin ekrem ependi yene buning jow yunkangning wezipisidin qélishtin awwal özi ishligen xizmetlerni tonushturup ötüsh xaraktéri barliqinimu eskertti.

Bügün jow yunkangning “Üch xil küchlerni yiltizidin qomurup tashlash kérek” dégen sözi xelq'ara metbu'atlarningmu diqqitini qozghidi. Dunya Uyghur qurultiyi jow yunkangning bu sözige naraziliq bildürdi. Dunya Uyghur qurultiyining bayanatchisi dilshat rishit ependi radi'omizgha bayanat bérip, xitay hökümiti Uyghurlargha qaratqan siyasitini özgertmey turup, muqimliqqa érishelmeydighanliqini bildürdi. U sözide xitay hökümitining ürümchi weqesidin kéyin Uyghur élini 19 ölkining éhtiyajigha asasen ishlitishi üchün bölüp bergenlikini eskertip, buning zémin igilesh we bayliq igileshtin bashqa bir nerse emeslikini éytti.