Үрүмчидә кимликиңиз болмиса таксиға чиқалмайсиз

4 - Авғуст һуҗумидин кейин, хитай сақчилири қәшқәр кочилирида халиған уйғурниң сомкисини ахтуруватқан көрүнүш.

 Мәлум болушичә бу хилдики аманлиқ сақлаш тәдбирлиригә таксиға чиққучиларниңму кимликини тәкшүрүштин ибарәт йәнә бир йеңи түрни қошқан болуп, бу һәқтә мухбиримиз гүлчеһрә мәлумат бериду.

Үрүмчи көзники ториниң шәһәр қатнаш учурлиридин ашкарилинишичә, үрүмчи шәһәрлик җамаәт хәвпсизлик идариси үрүмчидә - 15 авғусттин башлап таксиға чиққучиларниң кимликини тәкшүрүштин ибарәт йеңи бир бихәтәрлик тәдбирини иҗра қилишқа башлиған.

Хәвәрдә көрситилишичә, даириләр үрүмчидә бу хил аманлиқ сақлаш тәдбирини олимпик аяғлашқандин кейинму давамлиқ йүргүзүлидиған болуп, ‏17 ‏ - сентәбир мейиплар тәнһәрикәт йиғини ахирлашқичә давам қилидикән.

Буниң алдида үрүмчи бихәтәрлик даирилири, бейҗиң олимпикини тенич аман өткүзүшкә капаләтлик қилиш үчүн, айрудурумларда бихәтәрлик тәкшүрүшини күчәткәндин башқа, үрүмчи аммиви қатнаш ширкитиниң 129 аптобус линийисидики қатнаватқан төт миңдин артуқ аммиви аптобусларға шопурдин башқа бир нәпәрдин көзәтчи хадим қойған вә йәнә һәр бир аптобус бекитигә бирдин иккигичә бихәтәрлик сақлиғучи орунлаштуруп аммиви аптобуслар ичидә, бекәтләрдә, һәр бир йолучиниң сомкилирини ахтуруп тәкшүрүшни елип бармақта, шундақла аммиви сорунлардиму амминиң сомка һәмдә янлирини ахтурушни йолға қойди, - 4 авғуст қәшқәрдә икки нәпәр уйғурниң хитай жандармилириға һуҗум қилиш вәқәсидин кейинла үрүмчидики барлиқ қатнаш түгүнлиридә үрүмчигә кирип чиқидиған барлиқ чоң ‏ - кичик аптомобиллар қаттиқ тәкшүрүлмәктә. Үрүмчи даирилири бу хил аманлиқ сақлаш тәдбири беҗириватқан қатнаш сақчилириниму толуқ қоралландурған.

Радиомизға инкас қилғучиларниң билдүрүшигә қариғанда, қәшқәр һәм кучада йүз бәргән вәқәләрдин кейин үрүмчиниң барлиқ идарә ‏ - орган һәр ‏ - бир мәһәллә комитет, кочилардиму аманлиқ сақлаш хадимлири көзәт қилмақта.

Нөвәттә үрүмчидә йүргүзүлүватқан бу хилдики җиддий бихәтәрлик тәдбирлириниң ичигә таксиға чиққучиларниңму кимликини тәкшүрүштин ибарәт бир йеңи түрни олимпик ахирлишиш басқучида йолға қоюш сәвәби һәққидә йәниму тәпсилий мәлумат елиш үчүн үрүмчи шәһәрлик аммиви қатнашни бир туташ башқуруш идарисиға телефон қилдуқ.

Зияритимизни қобул қилған бир хитай кадир бу тәдбирниң олимпик бихәтәрлики үчүн елиниватқан тәдбирләрниң бири икәнликини ейтти:

Униңдин мәзкүр тәдбирниң олимпик ахирлишай дегәндә йолға қоюлушниң қандақ зөрүрийити барлиқи, бу тәдбирниң йеқинда уйғур елидә йүз бәргән бир туташ вәқәләр билән мунасивити бар ‏ - йоқлуқини сориғинимизда у соалимизға бивастә җаваб бәрмәй " буниңға бир немә демәк тәс, таксиға чиққанларниң кимликини тәкшүрүш пүтүн җуңгода охшаш йолға қоюлуватқан бихәтәрлик тәдбири " деди.

Биз униңдин әгәрдә чәтәлләрдин кәлгән саяһәтчиләр таксиға чиқмақчи болса қандақ қилиду ? паспорти тәкшүрүләмду ? дәп соридуқ, у җавабән, " меһманханиға чүшүш үчүнму кимлик, паспортларни елип йүрүш керәкқу, охшаш таксиға чиққандиму еливалса болидиғу ? " деди. У йәнә, бу тәдбирниң өткән һәптидин башлап йолға қоюливатқанлиқини қачан бикар қилинидиғанлиқи һәққидә һөкүмәтниң бир туташ хәвәр қилидиғанлиқини ейтти.