Үрүмчидә пуқрачә кийингән разветка хадимлар иш башлиди

Үрүмчи сақчи даирлири йеқинда, үрүмчидә аммиви қатнаш аманлиқини сақлаш җамаәт хәвпсизлики шөбә идарисидики хадимлар асасида мәхсус пуқрачә кийингән разветка қошуни қурудиғанлиқини елан қилди.
Мухбиримиз гүлчеһрә
2010.10.27
Nijat-Abdurehim-xitay-saqchisi-305 Сүрәт, сабиқ хитай алаһидә сақчиси ниҗат абдуреһимниң йавропада мәлум паналиқ тиләш мәркизидики көрүнүши.
http://news.boxun.com Дин елинди.

Үрүмчидики мунасивәтлик сақчи даирилиридин игә болған учурлиримиздин пуқрачә кийингән сақчиларға йәнә уйғур җамаити арисидики сиясәткә қарши сөз - чөчәк вә иш - һәрикәтләр үстидин пайлақчилиқ қилиш вәзиписиниңму берилгәнлики дәлилләнди.

Хитай һөкүмити "5 - июл вәқәси" дин кейин уйғур елидә, болупму үрүмчидә қораллиқ сақчи хадимлирини, чарлаш хадимлирини көпәйтиш арқилиқ бихәтәрлик тәдбирлирини үзлүксиз күчәйтип бармақта. Хитай даирилири үрүмчидә йәнә бу һәқтә йеңи тәдбир алди.

Үрүмчи җамаәт хәвпсизлик идариси 15 - өктәбирдики ахбарат елан қилиш йиғинида, үрүмчидә мәхсус пуқрачә кийингән разветка әтрити қурғанлиқини, уларниң пат йеқинда рәсмий вәзипә өтәшкә башлайдиғанлиқини елан қилди. Мәзкур әтрәт әслидики үрүмчи шәһәрлик җамаәт хәвпсизлик әтрити аммиви қатнаш аманлиқ сақлаш җамаәт хәвпсизлик шөбә идарисидики хадимлар асасида қурулған. Әмма пуқрачә кийингән разветка хадимларниң сани ашкариланмиған.

Бу һәқтә шинҗаң қанунчилиқ гезитидә елан қилинған хәвәрдин қариғанда, үрүмчидики мәзкур пуқрачә кийингән сақчилар үрүмчи аммиви қатнаш аманлиқ сақлаш шөбә идариси қармиқидики шималий қовуқ сақчиханиси,җәнубий пойиз истансиси сақчиханиси, йиқилған таш сақчиханиси, үчташ сақчиханиси қатарлиқ төт сақчи понкитидики бир қанчә сақчилардин тәшкиллинип төт гуруппиға бөлинип, үрүмчидики асаслиқ районлардин тәңритағ, сайбағ, шимиго вә йеңишәһәр районлирида пуқрачә кийиниш арқилиқ хәлқ ичигә сиңип кирип вәзипә өтәшкә башлайдикән.

Үрүмчи шәһәрлик җамаәт хәвпсизлик идарисиниң ахбарат елан қилиш йиғинида, буниң алдида пуқрачә кийиндүрүп синақ тәриқисидә кочиға қоюп бәргән сақчиларниң иш үнүмидин, сақчилар пуқрачә кийингәндин кейин адәттики амма арисида йошурунуп йүрүп, җәмийәт аманлиқини бузидиған учурларға игә болуш, көзитиш арқилиқ оғрилиқ, булаңчилиққа охшаш көп йүз беридиған коча җинайәтлиригә вақтида үнүмлүк зәрбә бериш үнүми көрүлгәнлики, шуңа җәмийәт аманлиқи, пуқраларниң бихәтәрлики үчүн пуқрачә кийингән сақчилар қошуни рәсмий турғузулғанлиқи көрситилгән.

Гәрчә, хитайниң бу һәқтики хәвәрлиридә үрүмчидики пуқрачә кийингән сақчилар қошуниниң асаслиқ вәзиписиниң коча җинайәтчилиригә зәрбә бериш икәнлики көрситилгән болсиму, үрүмчи аммиви қатнаш аманлиқ сақлаш шөбисигә қарашлиқ йәни йеңидин пуқрачә кийингән сақчилар қошуниниң асаслиқ тәркиби болған йиқилған таш сақчиханисиға телефон қилғинимизда, пуқрачә кийингән сақчиларниң немә вәзипиләрни өтәйдиғанлиқи техиму рошәнләшти.

Үрүмчи сайбағ районидики йәнә бир уйғур сақчиму пуқрачә кийингән сақчилар қошуни қурулудиғанлиқидин хәвири барлиқини ейтти.

Үрүмчи шәһәрлик җамаәт хәвпсизлик идарисиниң разветка ишханисиға телефон қилғинимизда, телефонни алған хитай сақчи бу һәқтики соаллиримизға җаваб бәрмәй телефонни үзди.

Дуня уйғур қурултийиниң баянатчиси дилшат ришит, хитай даирилириниң үрүмчидә мәхсус пуқрачә кийингән сақчи қошуни қурушиниң пүтүн уйғур ели бойичә қоллиниватқан йеңи бир хил бастуруш усули дәп ишинидиғанлиқини билдүрди.

Үрүмчи шәһәрлик җамаәт хәвпсизлик идариси людаван сақчи әтритиниң сабиқ алаһидә сақчиси, һазир шиветсарийидин панаһлиқ тилигән ниҗат абдуреһим, үрүмчидә хитайниң пуқрачә кийингән разветка қошуни қурғанлиқини тунҗи қетим ашкара елан қилған болсиму, илгири бу хил әтрәтләрниң һәр қайси сақчиханиларда барлиқини, шундақла тәдриҗи көпәйтилгәнликини, уларниң җәмийәткә, һәр қандақ саһәгә суқунуп, сиңип кирәләйдиғанлиқини, үрүмчидә һәтта аммиви һаҗәтханиларда пул йиғидиғанлар арисидиму пуқрачә кийингән сақчи пайлақчиларниң барлиқини, уларниң асаслиқ вәзиписиниң хәлқ ичидики һөкүмәткә қарши идийә вә һәрикәтләр һәққидә учур игиләш вә хәлқ арисида сухәнчилик қилиш икәнликини ашкарилиди.

Зияритимиз җәрянида ниҗат абдуреһим, хитайчә оқуғанлиқи үчүн уйғур тилида яхши сөзлийәлмәйдиғанлиқини вә буниң үчүн аңлиғучилиримиздин кәчүрүм сорайдиғанлиқини әскәртип "бу йәрдә мениң қандақ тилда сөзлишим муһим әмәс, немә демәкчи болғиним муһим" деди.

"Сақчи болуп ишләватқанларниң қандақ бесимда, қанчилик виҗдани азабта яшайдиғанлиқини маңа охшаш шуни бешидин өткүзгәнләр билиду."

"Мениңчә, мәйли пуқрачә кийинсун, мәйли форма кийсун 10 ниң ичидә бири өзи халап қиливатқанлар. Мән әркин асия радиоси арқилиқ, уйғур елидә хитайниң җамаәт хәвпсизлик саһәсидә ишләшкә мәҗбур болуватқан сәпдашлиримға шуни йәткүзгүм бар. Әгәр әқли бар, чошқидин пәрқи бар инсан болса, виҗдани азабта яшавәрмәй, қорқмай алдиға бир қәдәм илгириләш керәк"!

"Истипа бәр! бәлким бир мәзгил хизмәтсиз қилишиң мумкин, иш тапалмисаң өйдә олтур, әмма бу бир мәзгиллик, униңдин кейин хатирҗәмликкә еришисән, азабтин қутулисән. Мән шундақ қилдим, бу йолни тоғра таллидим, асан әмәс. Әмма, өзәмни һазир аҗайип әркин, хатирҗәм һес қилимән. Мән халиғинимни сөзлийәләймән. Мән азад болдум...."

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.