Йиңнә санҗиш вәқәсидә төһмәткә учриған уйғур яш ерпан илһам тоғрисида

Өткән йили үрүмчидә йүз бәргән йиңнә санҗиш вәқәсидә, яшанған бир хитай аялниң төһмити билән қолға елинип, 15 йиллиқ қамақ җазасиға учриған оқуғучи ерпан илһамниң гунаһсиз икәнликини билдүргән бир уйғур яш, һөкүмәтниң һәтта ерпанни адвокат тутуш һоқуқидинму мәһрум қалдурғанлиқини билдүрди.
Мухбиримиз әқидә
2010-06-14
Share
Irpan-Ilham-sotta-15-yil-kesilgen-305 Сүрәт, йиңнә санҗиш вәқәсидә төһмәткә учрап 15 йиллиқ қамақ җазасиға учриған оқуғучи ерпан илһамниң үрүмчи сотидики көрүнүши.
www.youtube.com Дин елинди.

Бу уйғур яш өзиниң ялғуз йиңнә санҗиш вәқәсидила әмәс, 5 ‏- июл үрүмчи вәқәсидә йүз бәргән әһваллардин хәвәрдар икәнликини билдүрүп, бизгә өз көзи билән көргән вә аңлиғанлирини ейтип бәрди.

Бир хитай аялға йиңнә санҗиған дегән баһанә билән, өткән йили 9 ‏- айниң 1 ‏- күни қолға елинған ирпан илһамниң бу йеқин дости йеқинда чәтәлгә қечип чиққандин кейин, зияритимизни қобул қилип ерпанниң гунаһсиз икәнликини билдүрди.

Үрүмчидики ата - анисиниң бихәтәрлики үчүн, өзиниң кимликини очуқ ашкарилашни халимиған бу яш, ирпан билән биргә оқуған болуп, униң ейтишичә, ирпан яхши оқуйдиған, тиришчан оқуғучи болупла қалмастин, ярдәм сөйәр шуниңдәк башқиларниң дилини рәнҗитмәйдиған ақ көңүл бала икән. У башқиларға йиңнә санҗиш әмәс, юқири авазда сөзләштинму тартинидиған бир оқуғучи икән.

Униң билдүрүшичә, ерпан алий мәктәпкә юқири нәтиҗә билән қобул қилинишни ирадә қилған, мәктәптики дәрслирини түгәткәндин кейин, шәхс мәктәпкә берип математика дәрс аңлаватқан, дәрстин сирт елип берилидиған тәкрарларғиму алаһидә әһмийәт беридиған оқуғучи икән. У, ерпан қолға елинип 15 йиллиқ қамақ җазасиға һөкүм қилинғандин кейин, униң билән биргә оқуған савағдашлириниң, ерпан дуч кәлгән паҗиәдин қаттиқ қайғурғанлиқини билдүрди.

Хитайда чиқидиған йәр шари дохтурханилар тори вә шинхуән ахбарат торлирида өткән йили, 8 ‏- айниң 20 ‏- күнидин 9 ‏- айниң 3 ‏- күнигичә болған мәзгил ичидә йүз бәргән йиңнә санҗиш вәқәсидә яриланғанларниң омуми саниниң 531 нәпәр икәнлики, буларниң ичидә хитай, уйғур, туңган, қазақ, моңғул қатарлиқ милләт кишилириниң барлиқи елан қилинған.

Йәр шари дохтурханилар тор бетиниң өткән йилқи хәвиридин йәнә, 9 ‏- айниң 3 ‏- күни йиңнә санҗиш вәқәси сәвәбидин үрүмчидә намайиш қилған хитайларниң, 5 нәпәр уйғурни уруп өлтүргәнлики вә 14 нәпәр уйғурни еғир яриландурғанлиқи ашкариланған.

Шинхуа ахбарат агентлиқиниң өткән йили 9 ‏- айниң 15 - күнидики хәвиридә, йиңнә санҗиш вәқәси мунасивити билән тутқун қилинғанларниң омуми сани 75 нәпәр икәнлики, 36 дело турғузулғанлиқи мәлум қилинған.

Хитай һөкүмити юқиридики дело мунасивити билән 2009 ‏- йили 9 ‏- айниң 17 ‏- күни абдурусул абдуқадир, аблимит мәмәт, рахман разақ, абдуқәйюм аюп, мухтәрҗан турди, аманнисагүл қадир, әкбәр имин қатарлиқлар үстидин сот ечип һөкүм елан қилип, алдиға 15 йил, кәйнигә 8 йил қамақ җазаси һөкүм қилған. Булар пәқәт қолға елинған 75 кишиниң ичидики 7 нәпири болуп, қалғанларниң соти давам қилмақта икән.

5 ‏- Июл үрүмчи вәқәси, уйғурлар арисидики иттипақлиқниң күчийишигә түрткә болғанлиқини билдүргән уйғур яш, сөзиниң ахирида уйғурлар арисида бир - биригә ярдәм бериштин баш тартмайдиған бир хил адәтниң шәкилләнгәнликини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт