Үрүмчидики кәпилик өйләргә чүшкән паразитлар паш болмақта

Үрүмчи һөкүмәт даирилири, үрүмчи тәвәсидики җәмий 234 кәпилик өйләр районлирини үч йилда чеқип болуш, бәш йилғичә түзәп болушни 2010 - йили рәсмий пиланға киргүзгән иди, үрүмчи хәвәр торлиридин мәлум болушичә, үрүмчидә уйғурлар зич олтурақлашқан кәпилик мәһәллиләрни чеқиш мәзкур пиланлиқ қурулуш башлиништин илгирила башланған шундақла бу пилан йүргүзүлүшниң алди - кәйнидә вә һазирға қәдәр, бу хил кәпилик өй вә мәһәллиләрни көчүрүш вә чеқишқа мәсул хитай кадирларниң еғир дәриҗидә парихорлуқ җинайәтлири давам әткән.

2011-11-21
Share
urumqi-rayun-305 Үрүмчидики чеқилған вә чеқилиш алдида турған җайлар
AFP
Үрүмчи һөкүмәт даирилири, үрүмчи тәвәсидики җәмий 234 кәпилик өйләр районлирини үч йилда чеқип болуш, бәш йилғичә түзәп болушни 2010 - йили рәсмий пиланға киргүзгән иди, үрүмчи хәвәр торлиридин мәлум болушичә, үрүмчидә уйғурлар зич олтурақлашқан кәпилик мәһәллиләрни чеқиш мәзкур пиланлиқ қурулуш башлиништин илгирила башланған шундақла бу пилан йүргүзүлүшниң алди - кәйнидә вә һазирға қәдәр, бу хил кәпилик өй вә мәһәллиләрни көчүрүш вә чеқишқа мәсул хитай кадирларниң еғир дәриҗидә парихорлуқ җинайәтлири давам әткән. Буниң паш болған бир қисмини мухбиримиз гүлчеһрә тәйярлиған мәлуматтин аңлайли :

5 - Июл вәқәсидин кейин хитай даирилири, үрүмчидики яқа - юртлуқ уйғурлар көпрәк олтурақлашқан ат бәйгә мәйдани, ташбулақ қатарлиқ кәпилик районларни, муқимсиз районлар дәп көрситип бу җайлардин көп сандики уйғурларни тутқун қилғандин башқа, мәһәллиләрни көчүрүшкә, яқа юртлуқ уйғурларни үрүмчидин қоғлашқа башлиған иди.

- 5 Июл вәқәсидин кейин үрүмчи даирилириниң алған әң чоң тәдбириниң бири, үрүмчидики уйғурлар зич олтурақлашқан барлиқ кәпилик өйләр районлирини чеқип түзәш пиланидур, йәни үрүмчи шәһәрлик һөкүмити 2010 - йили 26 - номурлуқ һөҗҗәт чиқирип, үрүмчи шәһиридики җәмий 234 кәпилик өйләр райони вә мәһәллиләрни үч йил ичидә пүтүнләй чеқип, бәш йил ичидә түзәп болушни пиланға киргүзгән, бу пилан бойичә җәмий 62миң 400аилә көчүрүп орунлаштурулидиған болуп, шу йили - 4 айда рәсмий иш башлиған иди.

Мәлумки униңдин бурунму бир қанчә йил ямалиқ, ташбулақ қатарлиқ уйғурлар зичрақ олтурақлашқан кәпилик өйләр районлири чеқип түзүлүватқан иди, әмма мәзкур пилан көлими вә даириси әң зор, әң көп мәбләғ селинған бир түр болуп һесаблиниду. Буниңға даир һөҗҗәттә, кәпилик өйләрни омумйүзлүк чеқип түзәш аптоном районниң мәркизи болған үрүмчиниң муһитини түзәш, хәлқниң мәнпәәтини қоғдаш вә узун муддәтлик муқимлиқини ишқа ашуруштики интайин нуқтилиқ вә муһим пиланлиқи көрситилгән.

Үрүмчидин берилидиған хәвәрләргә қариғанда, 2010 - йилиниң ахирғичә бу пилан бойичә таш булақ, ат бәйгә мәйдани мәһәллирини өз ичигә алған 21 кәпилик мәһәллиләр асасән чеқилип көчүрүлүп болған. Буниң үчүн 3 милярд 610 милйон йүән мәбләғ селинған. Бу йилқи чеқилидиған кәпилик өйләрниң көлими йәнә бир һәссә көп болуп 2011 - йилида кәпилик мәһәллидин 50ни чеқиш пилани әмәлийләштүрүлидикән.

Бирақ хитай һөкүмитиниң " бәхт қурулуши" дәп ативалған зор күч вә мәбләғ аҗратқан, бу кәпилик өйләрни чеқип түзәш қурулуш пиланидин, нурғун хитай кадирлар һоқуқидин пайдилинип парихорлуқ қилғанлиқи паш болуватқанлиқи мәлум.

Үрүмчи учур ториниң хәвиригә қариғанда, - 14 ноябир үрүмчи тәңритағ вә сайбағ районлуқ сот мәһкимилири сайбағ районидики ямалиқ тағ кәпилик мәһәллә вә тәңритағ райони таш булақ кәпилик мәһәллилиридики өйләрни чеқип түзәш қурулушиға мәсул дөләт кадир вә мәмурлардин 17 кишини сотлиған болуп, уларниң 2010 - йили кәпилик өйләрни чеқип түзәш қурулуштин пара йегән омумий соммиси төт милйон 530 миң йүәнгә барған.

Үрүмчи сайбағ районлуқ сот мәһкимиси буларниң җйән җяхуй исимлик баш җинайәтчини өз ичигә алған 7сигә 3 йилдин 7 йерим йилғичә қамақ җазаси бәргән, йәнә 10 кишиниң соти давамлашмақта икән. Һазирғичә мәзкур җинайәткә четишлиқ җинайәтчи вә җинайәт гумандарлириниң һәммиси хитайлар икән.

Бу паразитлар асасән кәпилик өйләрни көчүрүш вә чеқиш ишханилириниң мәсуллири болуп, улар өй чеқиш вә түзәшкә мәсул болидиған ширкәтләр билән өз алдиға содилишип аридин зор пайда алғандин сирт, кәпилик өйләрни өз алдиға әрзан баһада сетивелип юқири баһада һөкүмәткә сетип бериш җәрянида пайда алған шундақла өйи чеқиливатқан көчүрүлүш алдида турған өй игилиридинму өй чеқиш вә йеңи өйләрни тәқсим қилиш җәрянидиму хизмәт қолайлиқтин пайдилинип пара алған.

Буниң алдида, шинҗаң ленийиси торида, 9 - ноябир үрүмчи шәһәрлик оттура сотида, үрүмчидики мәлум мәһәллә йол башқармисиниң ли фамилилик мәсулиниң, бу райондики кәпилик өйләрни чеқип түзәш қурулушидин 380 миң йүән пара йигәнлики сәвәблик сотланғанлиқи хәвәр қилинған иди. Бу йил 49 яшқа киргән ли фамилилик бу хитай кадир 2007 - йилидин башлап мәһәллә йол башқармисида вәзипигә олтурған болуп у сотта өзиниң һәқиқәтән хизмәт қолайлиқтин пайдилинип, һөкүмәтниң кәпилик өйдикиләрниң көчүридиған әрзан баһалиқ өйлирини һөкүмәт баһасидинму әрзан елип қиммәт сетиш, көлими кичик өйләрни чоң өйләргә тегишип бериш арқилиқ пайда йегән вә өй ясаш қурулуш материяллирини киргүзүш вә өй қурулуш шеркәтлирини тәклип қилишта җәмий 380 миң йүән пара йигәнликини иқрар қилған.

Шинҗаң қанун торида 23 - сентәбир берилгән йәнә бир хәвәрдә көрситилишичә, үрүмчи сайбағ районлуқ парткоминиң муавин секретари ямалиқ тағ кәпилик районини көчүрүп түзәш ишханисиниң биринчи қол мәсули хизмәт қолайлиқтин пайдилинип өз нәпсигә чоғ тартип, 2009 - йили 11 - айдин 2010 - йили 8 - айға қәдәр кәпилик өйләрни чеқип түзәш қурулушидин җәмий 340 миң йүән пайда алған.

27 - Сентәбир үрүмчидики мәлум мәһәллә комитети мудири болған, 35 яшлиқ чен фамилилик аял 2007 йилидин 2009 - йилиғичә кәпилик мәһәллиләрни чеқиш қурулуши җәрянида 95миң йүән пара йигәнлики үчүн үрүмчи оттура сот тәрипидин 6 йиллиқ қамақ җазаси берилгән.

Үрүмчидики кәпилик мәһәллиләрни чеқишқа мәсул йәнә бир җу фамилилик дөләт мәмури бу җәрянда охшаш җинайи йол вә усул билән 150 миң йүәнгә еришкән. Бу паразитлар өй чеқиш җәрянида өй сетивелиш тохтами болсиму, йәр вә өй хети болмиғанларға пул елиш арқилиқ һөкүмәтниң пайдилиқ сиясәтлиригә игә қилиш, йеңи өйләргә еришиш хети беҗирип бериш, йәр вә өй хети бар кишиләрдин өйләрни әрзан елип қиммәт сетиш, ялған һөҗҗәт беҗирип бериш, һөҗҗәт игилириниң исмини алмаштуруш қатарлиқ қилмишлар арқилиқ көп пара йегән болуп, һазирғичә ашкариланған хәвәрләргә қариғанда, кәпилик өйләр районлирини чеқип түзәш қурулуши давамида пара йегүчи вә пара бәргүчиләр йәни мәзкур делоларға четишлиқ кишиләрниң һәммиси хитай көчмәнлири икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт