Дуня ислам тәшкилати: үрүмчидики вәқәләрни хитайниң зулуми кәлтүрүп чиқарди

Ислам конфиранси, йәни дуня ислам тәшкилати, үрүмчидә мәйданға кәлгән вәқәләрдин кейин баянат берип, бу вәқәниң аддий бир хәвпсизлик мәсилиси әмәсликини, хитайниң зулими сәвәбидин райондики хәлиқниң мусулман кимликиниң хәвп астида икәнликини баян қилди.
Мухбиримиз ирадә
2009-07-27
Share
Dunya-Islam-Teshkilati-bash-sekritari-305 5 - Ийул үрүмчи қанлиқ вәқәсидин кейин ислам конфранси тәшкилати баш секритари әкмәләддин иһсаноғли бу ишқа алаһидә әһмийәт берип, үрүмчи вәқәси һәққидә тәпсилий мәлумат елиш үчүн түркийә әнқәрә университетиниң оқутқучиси доктор әркин әмәт әпәндини җиддигә тәклип қилған. Сүрәттә, баш секритар әкмәләддин иһсаноғли әпәнди.
www.oic-oci.org Дин елинди.

Бу ислам конфиранси тәшкилатиниң тунҗи қетим уйғур мусулманлири һәққидә очуқ бир ипадә билдүрүши болуп һесаблиниду.

5 - Июл үрүмчи вәқәси мәйданға кәлгәндин кейин ислам конфранси тәшкилатиму һәрикәткә өтти. Конфирансниң Баш секритари әкмәләддин иһсаноғли Бу ишқа алаһидә әһмийәт берип, үрүмчи вәқәси һәққидә тәпсилий мәлумат елиш үчүн түркийә әнқәрә университетиниң оқутқучиси доктор әркин әмәт әпәндини җиддигә тәклип қилған.

Доктор әркин әмәт әпәнди җиддидә ислам конфиранси тәшкилатиға әза дөләтләрниң вәкиллиригә уйғурларниң вәзийити вә бу қетимлиқ үрүмчи вәқәсиниң маһийити һәққидә тәпсилий мәлумат бәргән иди. Кейин ислам конфиранси тәшкилати баш секритари әкмәләддин иһсаноғли мухбирларға уйғур мәсилиси һәққидә баянат берип, уйғур диярида барғансери яманлишип кетиватқан вәзийәттин әнсирәватқанлиқини вә уйғур хәлқиниң мәсилилириниң пәқәтла хәвпсзлик тәдбирлирини елиш биләнла һәл болмайдиғанлиқини ипадә қилған. У йәнә уйғур хәлқиниң бу тупрақларниң әсли игиси болуш сүпити билән миллий вә диний кимликлирини оттуриға қоюш вә шундақла сияси вә иҗтимаий һоқуқлириға игә чиқиш үчүн тиришиватқанлиқини, шуңа бу мәсилиләрниң сөһбәт йоли арқилиқ һәл болидиғанлиқини әскәрткән иди.

Әкмәләддин иһсаноғлиниң йолйоруқи билән 22 - июл күни ислам конфиранси тәшкилати әзалири бир йәргә җәм болуп үрүмчи мәсилиси һәққидә мәлумат бериш йиғини чақирди. Йиғинда алди билән баш секритарниң мусулман милләтләр вә аз санлиқлар мәсилиси мәслиһәтчиси әл - масрий уйғурларниң тарихи, ислам мәдәнийитигә қошқан төһписи вә һазирқи вәзийити һәққидә мәлумат берип өткәндин кейин 5 - июлда мәйданға кәлгән вәқәләрниң һәргизму аддий бир хәвпсзлик мәсилиси әмәсликини бәлки у йәрдики мусулманлар учраватқан инсан һәқлири дәпсәндилиридин келип чиққан мәсилә икәнликини баян қилған. У йәнә ислам конфиранси тәшкилатиниң бу мәсилә үстидә тәшкилатқа әза дөләтләр, бирләшкән дөләтләр тәшкилати инсан һәқлири алий кеңиши вә хитай дөлитиниң вәкиллири билән елип барған учришишлири һәққидиму мәлумат бәргән. Униң дийишчә ислам конфиранси тәшкилати баш секритари әкмәләддин иһсаноғли учришишларда хитайға, мәйданға кәлгән вәқәләрни пәқәтла әскирий тәдбирләр арқилиқ һәл қилғили болмайдиғанлиқини әскәртип, уларни мәсилиниң сәвәблири үситидә издинишкә вә буни һәл қилишқа чақирған. Вә йәнә уйғур райониға адәм әвәтип әһвалларни өз көзи билән көрүш тәлипини оттуриға қойған.

Ислам конфиранси тәшкилати үрүмчи вәқәсигә нисбәтән арқа - арқидин хитайни әйибләйдиған кәскин позитсийә билдүргәндин кейин, хитай даирилири дәрһал һәрикәткә өткән вә ислам конфрансиға адәм әвәтип вәқә һәққидә "чүшәнчә" бәргән шундақла ислам конфиранси вәкиллириниң уйғур дияриға бериш тәлипини қобул қилған.

Мәлум болушичә, һазир икки тәрәп зиярәтниң күн тәртипи һәққидә көрүшүватқан болуп, зиярәтниң қачан болидиғанлиқи техи ениқ әмәс. Биз ислам конфирансиниң бу қетимлиқ вәқәләргә билдүргән позитсийини чөридигән һалда, сәуди әрәбистандики уйғур журналист сираҗидин әпәнди билән телефон зиярити елип бардуқ.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт