Уйғур академийиси тунҗи қетим омумий йиғин чақирди

Мәркизи түркийиниң истанбул шәһиригә җайлашқан хәлқаралиқ уйғур академийисиниң тунҗи қетимлиқ омумий йиғини 5 - айниң 8 - күни истанбул баби - аләм хәлқаралиқ оқуғучилар уюшмисиниң залида өткүзүлди.
Мухбиримиз әркин тарим
2010.05.10
Uyghur-akadimiyisi-qurultiyi-Istanbulda-echildi-305.jpg Сүрәт, 2010 - йили 5 - айниң 8 - күни истанбул баби - аләм хәлқаралиқ оқуғучилар уйушмисиниң залида өткүзүлгән, мәркизи түркийиниң истанбул шәһиригә җайлашқан хәлқаралиқ уйғур академийисиниң тунҗи қетимлиқ омумий йиғинидин бир көрүнүш.
RFA Photo / Erkin Tarim

Бу йиғинға америка, италийә, германийә, франсийә, полша вә түркийидә хизмәт қиливатқан илмий хадимлар, оқутқучилар, докторлуқ вә магистирлиқ унванлири үчүн оқуватқанлардин болуп 60 әтрапида киши қатнашти.

Йиғинниң күн тәртипигә асасән алди билән йиғин қатнашқучилири өзлирини тонуштуруп өтти, кейин сайлам комитети тәсис қилинди. Йиғинни башқуруш комитетиниң мәсули аблимит қарахан әпәнди хизмәт доклати бәрди вә кона башқуруш һәйитиниң вәзиписидин қалғанлиқи елан қилинди.

Арқидин, демократик усулда сайлам елип берилип, хәлқаралиқ уйғур академийисиниң пәхри рәисликигә доктор әркин сидиқ әпәнди, рәисликигә профессор доктор алимҗан инайәт, муавин рәисликкә әхмәтҗан полат, абдул әзиз бәштоғрақ, мәғпирәт камал қатарлиқлар сайланди.

Булардин башқа йәнә уйғур академийисиниң баш катиплиқиға халмурат алимҗан, иҗраийә комитетиниң башлиқлиқиға аблимит қарахан сайланди.

Хәлқаралиқ уйғур академийиси 2009 - йили, 9 - айниң 9 - күни истанбулда оқу - оқутуш ишлири билән шуғуллиниватқан 9 нәпәр уйғур зиялийси тәрипидин қурулған болуп, 2009 - йили , 11 - айниң 24 - күни түркийә һөкүмити тәрипидин тизимға елинған. Һазир бу академийиниң түркийә ичи - сиртида 33 нәпәр әзаси бар.

Уйғур академийисиниң иҗраийә комитет башлиқи аблимит қарахан вә рәиси проф. Др. Алимҗан инайәт әпәндиләр бу қетимқи йиғин вә уйғур академийисиниң әһмийити һәққидә тохталди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.