Amérika Uyghurliri birleshmisi saylam ötküzdi

Bu qétimqi saylam 1933 - yili we 1944 - yilliri 12 - noyabirda qurulghan sherqiy türkistan jumhuriyetlirining xatire künige toghrilap uyushturulghan bolup, aldi bilen ikki jumhuriyet xatirilinish bilen bashlan'ghan murasim chüshtin burun we chüshtin kéyin ikki bölekke bölüp ötküzüldi.

Uyghur milliy herikitining rehbiri rabiye qadir xanim hem bashqa munasiwetlik erbablar söz qildi.

Qurultay murasimliri qatarida yene amérika Uyghurliri birleshmisining xizmet netijiliri bayan qilinip, qolgha keltürülgen netijiler tonushturuldi we yekünlendi.

Uyghur milliy herikitining rehbiri rabiye qadir xanim nutuq sözlep, amérika Uyghurliri jem'iyiti, Uyghur kishilik layihisi, démokratiyini ilgiri sürüsh fondi hemde dunya Uyghur qurultiyining qilghan xizmetliri heqqide melumat bérip, özlirining pütün imkaniyetliri bilen tirishchanliq körsitip, Uyghur kishilik hoquqlirini öz ichige alghan siyasiy dawasini xelqara jem'iyetke tonushturushta shuningdek Uyghur musapirliri we bashqa mesililer boyiche qolgha keltürgen netijilirini mu'eyyenleshtürdi. Bolupmu, amérika Uyghurliri jemiyitining xadimlirining bu jehetlerde körsetken pidakarliqlirini alahide tekitlidi.

Rabiye qadir xanimning nutuqidin kéyin, saylam pa'aliyiti resmiy bashlinip, saylam komitéti saylam élip bérish wezipisi boyiche ishqa kirishti hemde mezkur komitétning nazariti astida prézidént namzatliri özlirining qilmaqchi bolghan pilanliri heqqide melumat berdi.

Ikki neper prézidént namzati, yeni amérika Uyghurliri birleshmisining sabiq re'isi alim séyitof bilen, amérikidiki Uyghur ziyaliyliridin qeyser siyit ependi özlirining pilanlirini tonushturushidin kéyin amérika Uyghurliri birleshmisi idare hey'itige saylinidighan 7 neper namzat qisqiche özini we öz meqsetlirini tonushturdi.

Axirida saylam resmiy bashlinip, 90 din artuq özini tizimlatqan ademning erkin bélet tashlishi bilen amérika Uyghurliri birleshmisining prézidénti we idare hey'itining ezaliri saylap chiqildi.

Netijide alim séyitof qaytidin prézidéntliqqa saylandi. Bashqa 6 kishi amérika Uyghurliri birleshmisi idare hey'itining ezaliqigha saylandi. Bu küni kaliforniyidimu pa'aliyet ötküzülüp, bélet tashlandi.

Köpchilikning birdek qol kötürüp, awaz bérishi bilen rabiye qadir xanim amérika Uyghurliri birleshmisining pexriy re'islikige saylandi.

Axirida alim séyitof qisqiche nutuq sözlep, özining choqum tiriship, özige yüklen'gen wezipini orundaydighanliqini bildürdi.

Pütün saylam pa'aliyiti axirlashqandin kéyin, yéngidin saylan'ghan birleshme re'isi we idare hey'et ezaliri hemde saylam komitét ezaliri rabiye qadir xanimning riyasetchilikide wezipe tapshuriwélish qesemyadi qildi.

Amérika Uyghurliri birleshmisining 7 - qétimliq qurultiyi ghelibilik axirlashqandin kéyin, rabiye qadir xanim ziyaritimizni qobul qilip bu qétimqi qurultayning ghelibiliki échilghanliqini körsetti.