Uyghur élide "muqimliqqa tesir körsitish éhtimali bolghan mesililerni bix halitide hel qilish telep" qilindi

Yéngi yil kirish harpisida Uyghur élide "éghir zorawanliq jinayi heriketlirining aldini élish we uninggha qaqshatquch zerbe bérish 100 künlük mexsus herikiti" bashlan'ghan. Melum bolushiche heriket Uyghur aptonom rayonining muqimliqini saqlash xizmitini yaxshi ishlep, keng kölemlik ammiwi heriketlerning aldini élish meqsiti bilen élip bérilghan bolup, inkaslarda buning asasiy nishanining yenila Uyghurlarni basturush ikenliki melum bolmaqta.
Muxbirimiz irade
2010.12.28
Nur-bekri-Urumchi-Basturush-305 Süret, uyghur aptonom rayonining reisi nur bekrining 6 - iyul küni, shinjang téléwiziyisi we xitay merkizi xelq téléwiziyiside söz qilip, shawgüen weqesi we ürümchi namayishi heqqide ipade bildürüwatqan körünüsh.
http://news.cctv.com

Uyghur aptonom rayonluq partkom we hökümet yéqinda chaqirghan muqimliq xizmiti yighinida Uyghur aptonom rayonluq partkomining sékrétari jang chünshen "bölgünchilikke qarshi küresh"ni yene bir qétim tekitlep, "muqimliqni ikki qollap tutush we ikkila qol qattiq bolush" dep, "Uyghur rayonigha kélidighan xewpning bölgünchilerdin kélidighanliqi"ni eskertti.

Jang chünshenning bu sözi jang chünshenning qandaqtur az sanliq milletlerge yumshaq qolluq siyaset emes, yene oxshashla qattiq qol bolidighanliqining béshariti dep qariliwatqan bu künlerde yene Uyghur rayonida 100 künlük qattiq zerbe bérish herikitimu teng bashlandi. Uyghur aptonom rayonluq j x nazariti teripidin 10- dékabirdin bashlan'ghan bu qattiq zerbe bérish herikitide Uyghur élining muqimliqigha kapaletlik qilish eng muhim nishan qilin'ghan bolup, tengritagh torida bérilgen xewerde "j x nazariti bu qétimliq qattiq zerbe bérish herikitide aptonom rayonluq partkomning muqimliqni saqlash toghrisidiki orunlashturushigha asasen, muqimliqni saqlash xizmitini yaxshi ishlep, bu yil qish we kéler yili etiyazda éghir zorawanliq jinayetliri we keng kölemlik ammiwi weqelerning aldi qattiq élinidu", déyilgen.

Igilinishiche, yüz künlük qattiq zerbe bérish herikiti boyiche hazir jaylarda mexsus heriket guruppiliri tesis qilin'ghan bolup, bu heriket guruppilirining birer tasadipiy weqelerge qarita "neq meydan'gha burun bérip, tézdin keskin tedbir qollinip, kishilerning toplishishi, weqening kéngiyip kétishining aldini qet'iy élishi’ körsitilgen.

Dunya Uyghur qurultiyining bayanatchisi dilshat rishit ependining körsitishiche, bu qétimliq 100 künlük zerbe bérish herikitining asasliq nishani yenila Uyghurlarni basturush bolup, xitay hakimiyiti özi yürgüzüwatqan siyasetning aqiwitidin özi endishe qilip, yüz bérish éhtimali bolghan barliq qarshiliq heriketlirining aldini élishqa teyyarliq körmekte iken.

Derweqe, aptonom rayonluq partkom j x nazaritidin bu qétimliq qattiq zerbe bérish herikitide j x orunliridin keng kölemlik ammiwi weqelerning aldini élishni, muqimliqqa tesir körsitish éhtimali bolghan mesililerni bix halitide hel qilishni telep qilghan. Xewerdin melum bolushiche, ularni emeliy xewp shekillendürüshtin burunla yoq qilish bu qétimliq zerbe bérish herikitining asasiy nishani qilin'ghan.

Xitay da'iriliri ürümchi weqesidin kéyin Uyghur rayonining weziyitining muqim ikenliki, her millet xelqining inaq - ittipaqliq ichide yashawatqanliqini tekitlep, ürümchi weqesining chet'ellerdiki "üch xil küch" lerning qutratquluq qilishi we jem'iyettiki ishsiz yashlarning keltürüp chiqirilghanliqini teshwiq qilip kelgen bolsimu, biraq, ichki qisim we sirtqa qarita teshwiq qilghinining eksiche dawamliq türde zerbe bérish heriketliri élip bérip, muqimliqni kapaletlendürüshke tirishmaqta.

Xitay da'iriliri zerbe bérish heriketliri bilen birge yene, idiye qurulushi xizmitini kücheytishnimu muhim xizmetler qatarigha kirgüzgen. Igilinishiche, 27- dékabir küni Uyghur rayonluq partkom yighin chaqirip, herqaysi aliy mektep rehberliridin aliy mekteplerning partiye qurulushi we siyasiy, idiye xizmitini puxta qanat yaydurushini, aliy mekteplerdiki oqutquchi, kadir we oqughuchilargha qaritilghan siyasiy idiyiwi terbiyini kücheytishni telep qilghan.

Chet ‘elde yashawatqan ismini ashkarilashni xalimighan bir siyasiy közetküchining éytishiche xitay da'iriliri yéqindin buyan arqa - arqidin muqimliq xizmiti yighini, ishqa orunlishalmighan aliy mektep oqughuchilirini ishqa orunlashturush xizmiti yighini we aliy mekteplerdiki idiye qurulushini kücheytish yighinlirini échish bilen teng yene zerbe bérish heriketlirinimu bashlap, muqimliqni qoghdash dolqunini yuqiri kötürmekchi bolghan. Dilshat rishit ependi bolsa xitay da'iriliri élip bériwatqan pütün bu heriketlerning xitay da'irilirining özi yürgüzüwatqan siyaset netijiside yene bir qétimliq 5- iyul weqesidek éghir weqelerning chiqishidin qattiq endishe qiliwatqanliqining bir netijisi ikenlikini bildürdi.

Melum bolushiche, 2010-yili axirlashqan 12-ay ichide Uyghur aptonom rayonluq partkom we merkez da'iriliri arqimu-arqidin bir qatar yighinlarni chaqirghan bolup, xitay agéntliqlirining bu heqtiki xewerliridin ashkarilinishiche, mezkur yighinlarda "muqimliqni qoghdash" we "bölgünchilikke zerbe bérish" mesilisi bashtin -axiri asasliq nuqtilarning biri süpitide tekitlen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.