Partkom sékrétarining “Xasiyetlik” chüjisi uchturpan déhqanlirigha payda élip kelmidi

Ashkarilinishiche, aqsu uchturpan nahiyisining partkom sékrétari özining bir yéqinining toxu férmisini ronaq tapquzush üchün, nahiyidiki aqtoqay qatarliq bir qisim yézining déhqanlirini toxu béqishqa mejburlighan.
Muxbirimiz shöhret hoshur
2012.05.17
toqsun-charwichi-yaylaq-305.jpg Toqsunning gholbuyi yézisidiki 410 ming mo yayliqi tartiwélin'ghan charwichilar. 2012-Yili yanwar.
RFA/Shohret Hoshur

U yézilarda her bir a'ilige 25 tin toxu béqishni wezipe qilghan. Déhqanlar 4 yüendin mejburiy sétiwalghan chüjining bazardiki bahasining bir yüen ikenlikini uqup, chüjini sétiwélishni ret qilghanda tehditke uchrighan.

3 Yildin béri bu “Xasiyetlik” chüjilerni ey qilip bolalmighan yéza ahaliliridin biri yéqinda radi'omizgha téléfon qilip, yéza emeldarlirining türlük zorawanliqliri üstidin shikayet qildi.

Xelq sha'iri hékim siyit ikki yilning aldida shé'iri arqiliq yéngisar nahiye rehberlirining déhqanlarni mejburiy jangdu téritish pilanigha qarshiliq körsetken. Nöwette mana mushuninggha oxshash bir ehwal, aqsu wilayitining uchturpan nahiyiside dawam qilmaqta.

Melum bolushiche, uchturpan da'iriliri déhqanlarni bay qilish nami astida déhqanlar özi xalimighan ishlepchiqirish türlirige mejburlanmaqta. Xitayning yéza igilik qanunida déhqanlar ishlepchiqirish matériyallirini özi xalighan jaydin sétiwélish we mehsulatlirini özi xalighan bahada sétish hoquqigha ige dep belgilen'gen. Emma xitayning uchturpandiki emeldarliri bu belgilimige ashkara halda buzghunchiliq qilghan.

Yéza déhqanliri mejburiy sétiwalghan bu chüjilerge “Xasiyetlik chüje” dep kinaye isim qoyghan. Emma bu chüjilerni eyweshke keltürelmigendin kéyin, naraziliq bildürüp, chüjilerni sétiwélishni ret qilghan.

Uchturpan déhqanliridiki bu xil naraziliq keypiyatini, xelq sha'iri hékim séyit özining “Yéngisarda déhqan bolmaq tes” dégen shé'irida epchil ipadiligen idi.

Uchturpan déhqanliri axiri éniqlash élip bérip, mezkur chüjilerni satqan férmining uchturpan nahiyilik partkom sékrétari bilen shérikchiliki barliqini bayqighan.

Radi'omizgha ehwalni melum qilghan bu déhqanning bildürüshiche, uchturpandiki emeldarlarning zawut, karxanilar bilen shérikliship, déhqanlarni qaqti-soqti qilish ehwali yalghuz bu emes, ularning bu qilmishlirini bayqashmu qiyin emes.

Xelq sha'iri hékim siyit shé'iri seweblik özi köpligen awarichilikke yoluqqan bolsimu, bu shé'irning amma arisidiki tesiri sewebidin da'iriler mejburiy jangdu téritish pilanidin waz kechken. Nöwette uchturpan déhqanlirining naraziliqliri gerche da'irilerni yolsizliqliridin waz kechtürüshke qadir bolalmaywatqan bolsimu, bu naraziliqning pat yéqinda ewj élish we da'irilerni temtiritish éhtimalliqi körülmekte.

Bu programmining tepsilatini we hékim siyitning misralirini yuqiriqi awaz ulinishidin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.