Барғанчә өрләп кетиватқан гөш вә көктат баһаси уйғурларни әнсирәтмәктә

Хитайниң тавуз чағини вә дөләт байрими мәзгилидә уйғур районидики гөш, көктат қатарлиқ йемәкликләрниң баһаси йәнә бир қетим өрлигән. Бу райондики уйғурларни әндишигә салған.
Мухбиримиз миһрибан
2010-09-20
Share
Uyghur-elidiki-gosh-qassap-baziri-305 2009 - Йили 11-ийул, үрүмчидә бир уйғур йигит қой гөшини көтүрүп кочидин өтмәктә.
AFP

Зияритимизни қобул қилған уйғурларниң билдүрүшичә, бултур қиштики қар апитидә мал - чарвиларниң қирилип кетиши вә йеқинқи бирнәччә йилдин буян қазақистан қатарлиқ оттура асия дөләтлиригә көктатларниң көпләп експорт қилиниши гөш, көктат қатарлиқлар баһасиниң өрләп кетишигә сәвәб болған.

"Тәңритағ тори" ниң бүгүнки хәвиридин мәлум болушичә, бу йил 9 - ай мәзгилидә уйғур районида һәр килограм қой гөшниң баһаси бултурқи 28 - 30 йүәндин һазирқи һәр килограми 40 - 45 йүәнгә, кала гөшиниң баһаси 35 йүәнгә өрләп, гөш сетивалалайдиған пуқралар барғанчә азайған.

Хәвәрдә йәнә, бу йил киргәндин буян қой гөши баһаси өрләп кәткәнлики үчүн, ашхана - ресторанларда қой гөшиниң орниға кала гөши вә тоху гөши ишлитиватқанлиқи, айлиқ мааши 2000 йүән әтрапидики үрүмчи шәһиридә олтурушлуқ маликҗанға охшаш нурғун кишиләрниң, көпинчә һалларда гөш сетивалалмайдиған һаләткә чүшүп қалғанлиқи баян қилинған.

Биз райондики уйғурларға телефон қилип бу һәқтә әһвал игилидуқ. Зияритимизни қобул қилған бирәйлән қиштики қар апити сәвәблик бу йил гөш баһасиниң өрләп, нурғун аилиләрниң гөш сетивелишқа қурби йәтмигини үчүн, гөшниң орниға тухум ишлитиватқанлиқини билдүрди.

Шинхуа агентлиқниң 16 - сентәбирдики хәвиридә, хитай һөкүмитиниң дөләт байрими мәзгилидики гөш баһасини контрол қилиш үчүн, 500 тонна запас қой гөшини базарға салғанлиқи, бу хил қой гөшиниң баһаси йәрлик қой гөши баһасидин 5 йүән әрзанлиқи хәвәр қилинған.

Әмма райондики уйғурларниң инкас қилишичә, уйғур қатарлиқ мусулманлар бу хил гөшләрниң һалаллиқ дәриҗисигә ишәнч қилалмиғанлиқи үчүн, йәнила йезилардики уйғур деһқанлири сойған гөшләрни сетивелишни халайдикән.

Зияритимизни қобул қилған уйғурларниң илгири сүрүшичә йәнә, нөвәттә қазақистан қатарлиқ оттура асия дөләтлиригә көктатларниң көпләп експорт қилинишидин башқа, райондики муһит булғиниш сәвәблик көктатлар айнимиғанлиқи үчүн, бу йил районда пәмидур қатарлиқ көктатларниң баһаси йиллардикидин көп юқири болған.

Тәңритағ ториниң бүгүнки хәвириму, зияритимизни қобул қилған уйғурларниң пәризиниң тоғрилиқини испатлиди. Хәвәрдә дейилишичә, 2010 - йил 20 - сентәбир, чөчәк шәһиридә тунҗи нөвәтлик "оттура асия көктат йәрмәнкиси"ниң ечилиш мурасими өткүзүлгән.

Хәвәрдин мәлум болушичә, 2009 - йили чөчәкниң қазақистан чегрисидики бақту сода еғизидин оттура асияға експорт қилинған көктат 24 миң 600 тонна болған болса, бу йилниң алдинқи йеримида експорт қилинған көктат 36 миң тонниға йетип, бултурқи бир йил ичидә експорт қилинған көктат миқдаридин 3 һәссә ашқан.

Һалбуки, уйғур аптоном районидики һөкүмәт тор бәтлиридә райондики көктат баһасиниң өрләп кетишигә, қазақистан қатарлиқ оттура асия дөләтлиригә көпләп көктат експорт қилинғанлиқи қатарлиқ амилларниң сәвәб болғанлиқи һәққидә һечқандақ мәлумат берилмигән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт