Barghanche örlep kétiwatqan gösh we köktat bahasi Uyghurlarni ensiretmekte

2009 - Yili 11-iyul, ürümchide bir uyghur yigit qoy göshini kötürüp kochidin ötmekte.

Ziyaritimizni qobul qilghan Uyghurlarning bildürüshiche, bultur qishtiki qar apitide mal - charwilarning qirilip kétishi we yéqinqi birnechche yildin buyan qazaqistan qatarliq ottura asiya döletlirige köktatlarning köplep éksport qilinishi gösh, köktat qatarliqlar bahasining örlep kétishige seweb bolghan.

"Tengritagh tori" ning bügünki xewiridin melum bolushiche, bu yil 9 - ay mezgilide Uyghur rayonida her kilogram qoy göshning bahasi bulturqi 28 - 30 yüendin hazirqi her kilogrami 40 - 45 yüen'ge, kala göshining bahasi 35 yüen'ge örlep, gösh sétiwalalaydighan puqralar barghanche azayghan.

Xewerde yene, bu yil kirgendin buyan qoy göshi bahasi örlep ketkenliki üchün, ashxana - réstoranlarda qoy göshining ornigha kala göshi we toxu göshi ishlitiwatqanliqi, ayliq ma'ashi 2000 yüen etrapidiki ürümchi shehiride olturushluq malikjan'gha oxshash nurghun kishilerning, köpinche hallarda gösh sétiwalalmaydighan haletke chüshüp qalghanliqi bayan qilin'ghan.

Biz rayondiki Uyghurlargha téléfon qilip bu heqte ehwal igiliduq. Ziyaritimizni qobul qilghan bireylen qishtiki qar apiti seweblik bu yil gösh bahasining örlep, nurghun a'ililerning gösh sétiwélishqa qurbi yetmigini üchün, göshning ornigha tuxum ishlitiwatqanliqini bildürdi.

Shinxu'a agéntliqning 16 - séntebirdiki xewiride, xitay hökümitining dölet bayrimi mezgilidiki gösh bahasini kontrol qilish üchün, 500 tonna zapas qoy göshini bazargha salghanliqi, bu xil qoy göshining bahasi yerlik qoy göshi bahasidin 5 yüen erzanliqi xewer qilin'ghan.

Emma rayondiki Uyghurlarning inkas qilishiche, Uyghur qatarliq musulmanlar bu xil göshlerning halalliq derijisige ishench qilalmighanliqi üchün, yenila yézilardiki Uyghur déhqanliri soyghan göshlerni sétiwélishni xalaydiken.

Ziyaritimizni qobul qilghan Uyghurlarning ilgiri sürüshiche yene, nöwette qazaqistan qatarliq ottura asiya döletlirige köktatlarning köplep éksport qilinishidin bashqa, rayondiki muhit bulghinish seweblik köktatlar aynimighanliqi üchün, bu yil rayonda pemidur qatarliq köktatlarning bahasi yillardikidin köp yuqiri bolghan.

Tengritagh torining bügünki xewirimu, ziyaritimizni qobul qilghan Uyghurlarning perizining toghriliqini ispatlidi. Xewerde déyilishiche, 2010 - yil 20 - séntebir, chöchek shehiride tunji nöwetlik "ottura asiya köktat yermenkisi"ning échilish murasimi ötküzülgen.

Xewerdin melum bolushiche, 2009 - yili chöchekning qazaqistan chégrisidiki baqtu soda éghizidin ottura asiyagha éksport qilin'ghan köktat 24 ming 600 tonna bolghan bolsa, bu yilning aldinqi yérimida éksport qilin'ghan köktat 36 ming tonnigha yétip, bulturqi bir yil ichide éksport qilin'ghan köktat miqdaridin 3 hesse ashqan.

Halbuki, Uyghur aptonom rayonidiki hökümet tor betliride rayondiki köktat bahasining örlep kétishige, qazaqistan qatarliq ottura asiya döletlirige köplep köktat éksport qilin'ghanliqi qatarliq amillarning seweb bolghanliqi heqqide héchqandaq melumat bérilmigen.

Yuqiridiki awaz ulinishidin, bu heqtiki melumatimizning tepsilatini anglaysiler.