Xitayning Uyghur élidiki sezgür künler hoshyarliqi ahalilerni bi'aram qilmaqta

Xitay hökümiti Uyghur élide muqimliqni qoghdash nami astida bir qatar yéngi bixeterlik tedbirliri we bixeterlik términlirini otturigha qoymaqta. "Nuqtiliq a'ile"," sezgür kün" we " üch péshqedem " qatarliqlar yéqinqi mezgillerde otturigha chiqqan yéngi bixeterlik términliridur.
Muxbirimiz shöhret hoshur
2010.03.19
Share on WhatsApp
Share on WhatsApp
Urumqi-kochisi-Charlash-305.jpg 2009 - Yili 15 - awghust küni tartilghan bu süret, ürümchining melum köchisi bolup, sürette, xitayning bir guruppa charlighuchiliri uyghurlar mehelliside charlash élip bériwatqan körünüsh.
Süretni ürümchidin yéngi kelgen mushtirilirimizdin biri teminligen.

Melum bolishiche, xitay hökümiti 18 - we 19 - mart künlirinimu sezgür künler dep békitip, mushu hepte ichide Uyghur rayonidiki bixeterlik tedbirlirini yene bir baldaq küchlendürgen.

2008 - Yili 3 - ayning 23 - küni, xotende ayallar namayishi yüz bergen. Shuningdin 1 hepte awwal yeni 3 - ayning 18 - küni ürümchide birla waqitta 4 orunda aptobus partlash weqesi yüz bergenliki heqqide jem'iyette uchur tarqalghan. Xitay hökümiti eyni chaghda xoten ayallar namayishi yüz bergenlikini étirap qilghan bolsimu, mezkur aptobus partlash weqesini inkar qilghan idi. Radi'omiz xitayche bölümining igilishiche, xitay da'iriliri Uyghur élide 18 - we 19 - mart künlirini sezgür künler dep qarap, bu künlerdiki bixeterlik tedbirlirini normaldin tashqiri küchlendürgen.

Biz bügün yéqinda chet'elge chiqqan bir Uyghur doxturdin 2 yilning aldidiki weqe heqqide qayta melumat igiliduq.

Ürümchidiki sheher ahaliliridin biri, bu hepte ichide ürümchi shehirini bir ensizchilik qaplighanliqini bildürgen. U özining üzlüksiz chirqirighan saqchi mashiniliri, top - top qoralliq saqchilarning jiddiy heriketliridin bi'aramchiliq hés qilghanliqi, bu ehwalning özining xizmet keypiyatidin bashqa, perzentlirining oqush keypiyatighimu tesir körsitiwatqanliqini éytqan. Biz bügün ürümchidiki sheher ahaliliridin birini ziyaret qilduq. U tünügün kech körgenliri bildürdi.

Uyghur élide yolgha qoyuluwatqan adettin tashqiri bixeterlik tedbirlirige köp sandiki xitay ahalilirining narazi emesliki melum. Emma bu jeryanda menpe'etliri dexli uchrighan xitay ahalilirining chékidin ashqan bixeterlik tedbirlirige qarshi ikenlikini bilinmekte. Bolupmu intérnétning téxiche teltöküs eslige kelmesliki bir türküm xitay tijaretchi we karxanichilarning naraziliqini qozghimaqta.

Melum bolishiche, Uyghur élidiki bir qisim soda - karxanichilar, intérnétning cheklinishi sewebidin tijaretliri toxtap qalghan, bezliri bashqa ölkilerge yötkilishke mejbur bolghan.

Ismini ashkarilashni xalimighan yene bir Uyghur, ürümchining bu xil ensiz hawasigha xéli burunla könüp qalghanliqi, saqchilarning qolliridiki kaltek, eskerlerning astidiki bronéwik, qatarliqlargha özining pisent qilmaydighanliqini bildürdi. U, emeliyette bu xil weziyetning 5 - iyul weqesidin burunla mewjutluqi, bolupmu 2008 - yilliq olimpik teyyarliq mezgilidin bashlap özini urush weziyitidiki bir dölette yashawatqandek hés qilishqa bashlighanliqi, hazir bolsa etraptiki gheyriy normal bixeterlik tedbirlirining héchbirige heyran qalmaydighanliqini bildürdi.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.