Әрздарлар қамалған меһманхана хоҗайини наһийилик партком секретариниң тағиси икән

Җеҗяң лиңхәй меһманханисиниң әрздарлар қамалған өй үчүн һөкүмәттин адәм бешиға күнигә 1000 сом ярдәм пули алғанлиқи паш болғандин кейин, даириләрниң меһманхана хоҗайинлириға юқири һәқ бериш арқилиқ, өз алдиға йәрлик қара түрмиләрни бәрпа қилиш қилмиши әйибләшкә учриди.
Мухбиримиз меһрибан
2013-01-03
Share
beijing-uyghur-erzdar-ghazi-hamut-305.png Иккинчи рәт оңдин биринчиси нурунгул тохти ханим.
RFA/Shohret Hoshur

Йеқинда хитай тилидики "4-июн тор бекити"дә җеҗяң тйәнтәй наһийилик һөкүмәтниң һәр күнлүк ятақ баһаси 138 сом хәлқ пули болған шәрқ меһманханисиға, меһманханиға қамалған әрздарларниң һәр бир күнлүки үчүн адәм бешиға 1000 сомдин ярдәм пули бәргәнлики ашкариланғандин кейин, тордашлар бу хил "қара түрмиләр" ниң хитайниң һәммә җайлирида барлиқини илгири сүрүп, муқимлиқни сақлаш баһанисидә бәрпа қилинған бу хил қара түрмиләрниң хитай әмәлдарлириниң парихорлуқ қилмишлири үчүн пурсәт яритип беридиған йолларниң бири икәнликини билдүрди.

"4-июн тор бекити" дә ашкарилинишичә,җеҗяң тйәнтәй наһийисидики әрздар җаң вәнҗен ханим 2012-йили 10-айниң 25-күнидин таки 2013-йил йеңи йил һарписиғичә тйәнтәй наһийилик һөкүмәт тәрипидин бу наһийигә қошна болған лиңхәй наһийисидики шәрқ меһманханисиға қамалған. Җаң ханим меһманханиға қамалған мәзгилидә, һөкүмәт даирилири әсли баһаси 138 сом болған ятақ өй үчүн меһманхана хоҗайиниға ярдәм пули намида 1000 сом хәлқ пули төлигән.

Чаршәнбә күни радиомиз хитай бөлүми зияритини қобул қилған җаң вәнҗиң ханимниң юртдиши шү җяңчяв өзиниң җаң вәнҗиң ханим билән йеңи йилдин кейин телефонда сөзләшкәнликини баян қилип, меһманханида җаң вәнҗен ханимдин башқа йәнә башқа әрздарларниңму барлиқини илгири сүрди. Шү җяңчявниң билдүрүшичә, лиңхәй наһийисидики җаң вәнҗен ханим қамалған шәрқ меһманханисиниң хо җайини тйәнтәй наһийилик партком секретари ли җиҗәнниң тағиси болуп, лиңхәй наһийисидики шәрқ меһманханиси билән"әрздарларни қамаш тохтамнамиси" имзалиғучи кадир җу ритйән болса тйәнтәй наһийисиниң партком секретари ли җиҗйәнниң нәврә иниси икән.

Лиңхәй наһийисики шәрқ меһманханисиниң хизмәтчиси радиомиз зияритини қобул қилғинида меһманханиға әрздарларниң қамалғинидин һәм меһманханиға қамалған әрздарларниң һәр бири үчүн күнигә 1000 сом хәлқ пули ярдәм берилидиғанлиқидин хәвири йоқлуқини билдүргән болсиму, әмма меһманханиниң бир күнлүк баһасиниң 138 сом хәлқ пули икәнликини ейтти.

Бу әһвални интернетта ашкарилиған "4-июн тор бекити" қурғучиси хуаң чи әпәнди, чаршәнбә күни радиомиз хитай бөлүминиң зияритини қобул қилип, меһманханиға қамалған һәр бир әрздарниң бир күнлүк ятақ һәққи үчүн тйәнтәй наһийилик һөкүмәттин 1000 сом алған лиңхәй наһийисидики "шәрқ меһманханиси" хо җайининиң тйәнтәй наһийисиниң партком секретари вә тйәнтәй наһийисидики кадирлар билән туғқандарчилиқ мунасивитиниң барлиқи һәққидә тохтилип: "ху җиңтав вә вен җябав һакимийәт йүргүзгән мәзгилидә муқимлиқ һәммидин әла дәйдиған дөләт сияситини бәлгиләп, һәрқайси йәрлик һөкүмәт әмәлдарлириниң муқимлиқни қоғдаш намида түрлүк йоллар арқилиқ парихорлуқ вә хиянәтчилик қилип байлиқ топлиши үчүн шараит һазирлап бәрди. Тйәнтәй наһийилик һөкүмәтниң һәр күнлүки 138 сом болған ятақ үчүн, наһийилик партком секретариниң туғқини ачқан меһманханиға һәр бир әрздарниң бир күнлүки үчүн 1000 сомдин ярдәм пули бәргәнлики буниң типик мисали."деди.

Мәлум болушичә, уйғур елидиму әрздарларни қамайдиған бу хил қара түрмә шәклини алған меһманханилар мәвҗут болуп, илгири радиомиз зияритини қобул қилған уйғур әрздарлардин нурунгүл ханим, анаргүл ханим, әмәт қасим вә ғази ака қатарлиқлар өзлириниң әрз үчүн бейҗиңға барғинида йәрлик даириләр тәрипидин сақчиларниң назарити астида мәҗбурий қайтуруп келинип, өз наһийисидики меһманханиларға нәччә айлап қамалғанлиқини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт