Erzdarlar qamalghan méhmanxana xojayini nahiyilik partkom sékrétarining taghisi iken

Yéqinda xitay tilidiki “4-Iyun tor békiti”de jéjyang tyentey nahiyilik hökümetning her künlük yataq bahasi 138 som xelq puli bolghan sherq méhmanxanisigha, méhmanxanigha qamalghan erzdarlarning her bir künlüki üchün adem béshigha 1000 somdin yardem puli bergenliki ashkarilan'ghandin kéyin, tordashlar bu xil “Qara türmiler” ning xitayning hemme jaylirida barliqini ilgiri sürüp, muqimliqni saqlash bahaniside berpa qilin'ghan bu xil qara türmilerning xitay emeldarlirining parixorluq qilmishliri üchün purset yaritip béridighan yollarning biri ikenlikini bildürdi.

“4-Iyun tor békiti” de ashkarilinishiche,jéjyang tyentey nahiyisidiki erzdar jang wenjén xanim 2012-yili 10-ayning 25-künidin taki 2013-yil yéngi yil harpisighiche tyentey nahiyilik hökümet teripidin bu nahiyige qoshna bolghan lingxey nahiyisidiki sherq méhmanxanisigha qamalghan. Jang xanim méhmanxanigha qamalghan mezgilide, hökümet da'iriliri esli bahasi 138 som bolghan yataq öy üchün méhmanxana xojayinigha yardem puli namida 1000 som xelq puli töligen.

Charshenbe küni radi'omiz xitay bölümi ziyaritini qobul qilghan jang wenjing xanimning yurtdishi shü jyangchyaw özining jang wenjing xanim bilen yéngi yildin kéyin téléfonda sözleshkenlikini bayan qilip, méhmanxanida jang wenjén xanimdin bashqa yene bashqa erzdarlarningmu barliqini ilgiri sürdi. Shü jyangchyawning bildürüshiche, lingxey nahiyisidiki jang wenjén xanim qamalghan sherq méhmanxanisining xo jayini tyentey nahiyilik partkom sékrétari li jijenning taghisi bolup, lingxey nahiyisidiki sherq méhmanxanisi bilen“Erzdarlarni qamash toxtamnamisi” imzalighuchi kadir ju rityen bolsa tyentey nahiyisining partkom sékrétari li jijyenning newre inisi iken.

Lingxey nahiyisiki sherq méhmanxanisining xizmetchisi radi'omiz ziyaritini qobul qilghinida méhmanxanigha erzdarlarning qamalghinidin hem méhmanxanigha qamalghan erzdarlarning her biri üchün künige 1000 som xelq puli yardem bérilidighanliqidin xewiri yoqluqini bildürgen bolsimu, emma méhmanxanining bir künlük bahasining 138 som xelq puli ikenlikini éytti.

Bu ehwalni intérnétta ashkarilighan “4-Iyun tor békiti” qurghuchisi xu'ang chi ependi, charshenbe küni radi'omiz xitay bölümining ziyaritini qobul qilip, méhmanxanigha qamalghan her bir erzdarning bir künlük yataq heqqi üchün tyentey nahiyilik hökümettin 1000 som alghan lingxey nahiyisidiki “Sherq méhmanxanisi” xo jayinining tyentey nahiyisining partkom sékrétari we tyentey nahiyisidiki kadirlar bilen tughqandarchiliq munasiwitining barliqi heqqide toxtilip: “Xu jingtaw we wén jyabaw hakimiyet yürgüzgen mezgilide muqimliq hemmidin ela deydighan dölet siyasitini belgilep, herqaysi yerlik hökümet emeldarlirining muqimliqni qoghdash namida türlük yollar arqiliq parixorluq we xiyanetchilik qilip bayliq toplishi üchün shara'it hazirlap berdi. Tyentey nahiyilik hökümetning her künlüki 138 som bolghan yataq üchün, nahiyilik partkom sékrétarining tughqini achqan méhmanxanigha her bir erzdarning bir künlüki üchün 1000 somdin yardem puli bergenliki buning tipik misali.”dédi.

Melum bolushiche, Uyghur élidimu erzdarlarni qamaydighan bu xil qara türme sheklini alghan méhmanxanilar mewjut bolup, ilgiri radi'omiz ziyaritini qobul qilghan Uyghur erzdarlardin nurun'gül xanim, anargül xanim, emet qasim we ghazi aka qatarliqlar özlirining erz üchün béyjinggha barghinida yerlik da'iriler teripidin saqchilarning nazariti astida mejburiy qayturup kélinip, öz nahiyisidiki méhmanxanilargha nechche aylap qamalghanliqini bildürgen idi.