Уйғурлар бейҗиңда туруш үчүн кимлик өзгәртишкә мәҗбур

Уйғурлар үчүн, хитай өлкилиридә меһманхана қийинчилиқи йеңи бир әһвал әмәс. Бу қийинчилиқ 90 ‏ - йиллардила башланған. Әмма, меһманханиға тизимлитиш үчүн, юқири дәриҗилик әмәлдар болуш, буниң билән биллә, хизмәткә чақиртилған вә хизмәткә әвәтилгән испат хети болуш йеңи түзүмләрдин болса керәк.
Мухбиримиз шөһрәт һошур хәвири
2008-07-22
Елхәт
Пикир
Share
Принт

 Бүгүнки әһвал игилишимиздә бир уйғурниң билдүрүшичә, бәзи өлкиләрдә уйғурлар үчүн қиммәт баһалиқ меһманханиларда турушқа чәклимә йоқ, төвән вә оттура баһадики меһманханиларда чәклимә бар. Йәнә бир уйғурниң баян қилишичә, бу техи бир қанчә айниң алдидики әһвал, һазирқи әһвал болса буниңдин мүшкүл, алдинқи түзүм буйичә болғанда уйғурлар содигәр болғандила туруш салаһийитигә еришәлигән болатти; һазирқи әһвалда болса пәқәтла әмәлдар болуши керәк, униң үстигә әмәлдар болушла купайә әмәс, чақирилған вә хизмәткә әвәтилгән болуши керәк.

Бу уйғурниң ейтқанлирини хитайдики бир меһманхана хадими зияритимизни қобул қилип испатлиди.

Нөвәттә бейҗиң, шаңхәй, гуаңҗу қатарлиқ шәһәрләрдә ширкәт қурған уйғурларға ашкара чәклимә қоюлмиған, әмма улар уйғур кимлики сәвәбидин коп тәрәплимә аваричилиқларға йолуқуп кимлик өзгәртишкә мәҗбур болған, һәтта бәзилири ширкәтлириниң намини өзгәрткән.

Йәнә бу уйғурниң билдүрүшичә, бейҗиңда уйғурларға ой киралиған аилә вә меһманханиларға 2000 доллар җәриманә қоюш түзүми йолға қоюлған.

Чәтәл паспорти билән хитайға барған уйғурларму охшашла аваричилиққа дуч кәлгән. Йәнә бир уйғурниң хаңҗудики бир меһманханида йолуққанлири буниң испати.

Олимпик мәзгилидә уйғурларниң бешиға кәлгән аваричилиқ бир қисим чәтәл мухбирлириниңму диққитини тартқан. Алдинқи күни канадада чиқидиған йәршари хәвәрләр гезити, бейҗиңда яшаватқан бир яш әр - аялниң кәчүрмишлирини хәвәр қилди. Хәвәрдә билдүрүлишичә, бу аилә 5 йилдин бери бейҗиңда ашхана ачқан болуп, хитай олимпик сәвәблик уларни ашханисини тақашқа мәҗбурлиған, туруватқан қорасидинму һәйдигән. Улар меһманханиға киргәндә дәсләп чәтәлликкә охшитилип қизғин күтүвелинған, арқидин улар салаһийәт кенишкисини чиқарғанда уйғурлиқини билгән мулазимәтчиләр дәрһал муамилисини өзгәрткән вә ятақ түгәп кәткәнликини билдүргән. Бу әһвал изчил тәкрарланғандин кейин, юртиға қайтишқа мәҗбур болған.

Бәзи көзәткүчиләр, олимпикниң хитайни һәқиқий қияпити билән дуняға тонутидиған бир дәрсликла болупла қалмай, уйғурлар үчүнму бир унтулмас миллий кимлик дәрси болуп қалидиғанлиқини билдүрмәктә.

Пикирләр (0)
Share
Толуқ бәт