Түркийә алий рәһбәрлири хәлқара мәдәнийәт фестивалидики уйғур көргәзмә бөлүмидә
Мухбиримиз әркин тарим
2010.09.27
2010.09.27

RFA Photo / Erkin Tarim
26 - Сентәбир күни ахшам түркийиниң даңлиқ нахшичиси сибәл җан консерт бәрди. Консерт башлиништин бурун милләтчи һәрикәт партийиси башлиқи, сабиқ муавин баш министир дөләт баһчели шәрқий түркистан өйи намидики көргәзмә бөлүмини зиярәт қилди.
Бу фестивални уюштурған әнқәрә әтимәсқут районлуқ һөкүмәт башлиқи әнвәр дәмирел әпәнди сабиқ муавин баш министир дәвләт бағчелигә үрүмчи вәқәсини әкис әттүргән рәсимләрни көрситип туруп "мана бу шәрқий түркистанлиқларниң һазирқи әһвали" деди. Униң билән биллә шәрқий түркистан бөлүмигә киргәнләр ичидә милләтчи һәрикәт партийисиниң алий рәһбәрлири вә башқа партийиләрниң вәкиллириму бар иди.
Даңлиқ нахшичи сибәл җан сәһнигә чиқиштин бурун түркийидики тонулған моделләр османли империйиси мәзгилидики кийим - кечәкләрни көрсәтти. Бу қатарда һәрқайси түркий милләтләрниңму кийимлири тонуштурулди.

Фатиһ шәнтүрк әпәнди билән билгәхан гөктүрк ханим 10 миң тамашибин кәлгән мәйданда сәһнигә чиқип уйғур кийимлирини көрсәтти вә сәһнидә шәрқий түркистанниң ай юлтузлуқ көк байриқини ләпилдәтти. Бу кишиләрниң қаттиқ алқишиға еришти.
Әнқәрәниң әтимәсқут районида өткүзүлгән 7 - нөвәтлик хәлқаралиқ анатолийә мәдәнийәт вә сәнәт фестивалидики бөлүмләр ичидә уйғур бөлүми әң бай мәзмунға игә болуп, бөлүмдә уйғурларниң сәнити, мәдәнийити вә бүгүнки вәзийити тонутулди.
Бу 10 күн җәрянида тәхминән 20 миң әтрапида кишиниң уйғур көргәзмә бөлүмини зиярәт қилғанлиқи пәрәз қилинмақта.
Зиярәт қилған кишиләр арисида түркийиниң бинакарлиқ министири мустафа дәмир қатарлиқ көп санда парламент әзалири, әзәрбайҗан, қирғизистан, түркмәнистан қатарлиқ дөләтләрниң әнқәрәдә турушлуқ баш әлчилири, тонулған сәнәтчиләр вә амма екскурсийә қилди.
Фестивалниң әң ахирқи күни түркийиниң тонулған нахшичиси сибәл җан консерт бәргән болғачқа фестивал мәйдани адәм деңизиға айланди. Бу консертқа 10 миңға йеқин киши қатнашқан болғачқа шәрқий түркистан өйини екскурсийә қилғанларниң саниму интайин көп иди. Биз нәқ мәйданда бу һәқтә мәлумат игилидуқ.
Юқиридики аваз улинишидин, бу һәқтики мәлуматимизниң тәпсилатини аңлайсиләр.